Qulu İsmayılov: "Hələlik bunu yalnız istək kimi nəzərə ala bilərik"
Ermənistan analitikləri ölkələrini çətin iqtisadi vəziyyətdən çıxarmağın yollarını arayır. Bunun üçün də öz KİV-lərində müxtəlif ideyaları ortaya atıb ətrafında ictimai müzakirələrin aparılmasını təşkil edirlər. Ortaya atılan yeni ideayalardan biri Ermənistanın dünya ökeanına çıxışını təmin edəcək blokun yaradılması ilə bağlıdır.
Bildirilir ki, Ermənistan-İran-Tacigistan-Suriya-İraq-Livandan ibarət ölkələrin yeni birlik formatının əsası qoyulmuş olsa, blokada şəraitində yaşayan ölkə vəziyyətdən çıxış yolunu tapa bilər. Bu ideyanın reallaşacağını nə dərəcədə əsaslı saymaq olar?
Ekspert Qulu İsmayılov qəzetimizə açıqlamasında bildirdi ki, Ermənistanın bu çabaları başadüşüləndir:
"Artıq bir neçə onillikdi ki, Ermənistanı ələ keçirmiş kriminal rejim həmin ölkənin vətəndaşlarına zülm edir. Ermənistan iqtisadiyyatını təhlil etdikdə ortada ciddi tənəzzülün olduğu qənaəti yaranır. Əhali bu vəziyyətə tab gətirə bilmədiyi səbəbindən ölkəni kütləvi şəkildə tərk edir. Bunu doğuran səbəb aydındır. Ermənistan ətrafında olan qonşularına qarşı işğalçı, yeni ərazi iddialarına bağlı siyasət yürütdüyü səbəbindən belə duruma düşüb. Ölkə onun ətrafında ərsəyə gələn ən böyük layihələrdən təcrid edilib və bunun da nəticəsində külli miqdarda qazancdan mərhum olub. Ancaq dəfələrlə bəyan edilib ki, bundan çıxış yolu var. Ermənistan işğalçı siyasətindən əl çəkməlidir. Görünür, bunu etməyi düşünmürlər və bu səbəbdən də utopiya sayıla biləcək bir formatın ərsəyə gələcəyinə ümidlərini bağlayıblar. Həmin blokda Ermənistanla qonşu olan İranın adının qeyd edilməsi şübhəli deyil. Çünki İran həmin ölkəyə bütün mümkün vasitələrlə kömək edir. Ancaq İran vasitəsilə digər ölkələrə çıxışın əldə olunması da bir qədər inandırıcı deyil. Nəzəri cəhətdən mümkün olan, praktik olaraq isə müşkül görünən bu layihənin ərsəyə gələ biləcəyi inandırıcı görünmür. Çünki deyilən ölkələrin bir çoxunun ətrafında heç adi stabillik belə təmin olunmayıb. İrana qarşı yeni sanksiyaların tətbiqi isə əlavə problemlər yarada bilər deyə, hələlik bunu yalnız istək kimi nəzərə ala bilərik".
Məhəmmədəli QƏRİBLİ