Bu gün Avropada özünü qabarıq formada büruzə verən əsas problemlərdən biri də islamofobiya, bir sıra proseslərə ikili standartlardan yanaşmadır. Bir çox dünya dövlətləri, o cümlədən Azərbaycan bu məsələ ilə bağlı narahatlığını ən yüksək səviyyədə bildirib.
Rəsmi Bakı qeyd edir ki, Avropada multikultural dəyərlərin iflasa uğraması, islamofobiyanın güclənməsi yolverilməzdir. Eyni zamanda, Azərbaycanın narazı qaldığı əsas məsələlərdən biri də ikili standartlardır. Məsələn, Dağlıq Qarabağ münaqişəsinin həllinə, insan hüquqlarına yanaşmada Avropa ölkələrinin ikili standartlardan çıxış etməsi birmənalı həqiqətdir.
Son dövrlərdə isə Avropada narahatlıq yaradan məqamlardan biri də burada türkofobiya meyllərinin yaranmasıdır. Bunu Avropa ölkələrinin, xüsusən də Almaniyanın qardaş Türkiyəyə qarşı tutduğu mövqe də açıq şəkildə nümayiş etdirir. Məhz bu ölkənin addımları nəticəsində Niderland və Danimarka da Türkiyəyə heç də xoş olmayan, millətçiliyə əsaslanan münasibət sərgiləyir. Qeyd edək ki, Niderland hakimiyyəti Türkiyənin xarici işlər naziri Mövlud Çavuşoğlunun təyyarəsini ölkəyə buraxmayıb. Nazir Türkiyə vətəndaşlarını aprelin 16-da keçiriləcək referendumla ölkə konstitusiyasına nəzərdə tutulmuş dəyişikliklər barədə məlumatlandırmaq üçün Rotterdamda mitinqdə iştirak etmək istəyirdi. Bundan sonra Almaniyada səfərdə olan Türkiyənin ailə və sosial siyasət naziri Fatma Betül Sayan Qaya yerüstü nəqliyyat vasitəsilə Rotterdama gələrək mitinqdə iştirak etməyə cəhd edib. Lakin Niderland Daxili İşlər Nazirliyinin əməkdaşları yolu bağlayıb, hakimiyyət isə naziri "arzuolunmaz şəxs" elan edərək ölkədən çıxarıb. Bundan əvvəl Avstriya referendum kampaniyası üçün gələn türk nazirlərin girişinə qadağa qoydu. Daha sonra Almaniya bu addımı atıb. Hesab olunur ki, hadisələrin bu səpkidə inkişafının əsas günahkarı məhz Almaniyadır. Elə Almaniyanı təsiri altında Avstriya, Niderland və Danimarka Türkiyəyə qarşı qərəzli mövqedən çıxış edib. Rəsmi Ankara bütün bunlara sərt reaksiya verir. Türkiyə prezidenti Rəcəb Tayyib Ərdoğan isə Niderlandı soyqırım törətməkdə ittiham edir: "Biz Niderlandı Srebrenitsadakı qırğından tanıyırıq. Onlar səkkiz min bosniyalını qırmaqla öz mahiyyətini göstərib". Onun sözlərinə görə, Türkiyənin inkişafı və böyüməsi kimin üçünsə ümidverici olsa da, Niderland və Almaniya kimi ölkələr üçün bu əsl kabusdur: "Ankara Avropa ölkələrinin rəhbərlərinə dəfələrlə bəyan edib ki, faşistlərə və irqçilərə uymasınlar. Bu onlara ciddi ziyan vura bilər. Təəssüf ki, son həftədə baş verən hadisələr bizim gümanlarımızı doğrultdu. Niderland hökumətinin nazirimizə qarşı hərəkətlərini Türkiyəyə, türk xalqına, beynəlxalq hüquqa və diplomatiyaya hörmətsizlik kimi qəbul edirik". Ərdoğan Almaniyanı terrora dəstəkdə günahlandırıb: "Almaniya ən amansız şəkildə terrorçulara dəstək verir". Almaniya Federal Kansleri İdarəsinin rəhbəri, ölkənin xüsusi tapşırıqlar naziri Peter Altmayer isə bildirir ki, Almaniya hökuməti türk siyasətçilərinin ölkəyə girişinə qadağa qoymaq hüququnu özündə saxlayır. Amma bu mövqeyə Almaniyada etiraz edənlər də var. Avropa İttifaqının (Aİ) genişlənməsi və mehriban qonşuluq məsələləri üzrə sabiq komissarı Günter Ferxoygen Ankaranı müdafiə edərək deyir ki, Türkiyə ilə münasibətlərdə yaranmış böhranın səbəbkarı Avropadır. Ferxoygen Avropanın siyasətinin səmimi olmadığını vurğulayaraq, əks istiqamətdə hərəkət etməyin zəruri olduğunu bildirib. Almaniyalı siyasətçi bu ölkənin ərazisində 4 milyondan çox türk yaşadığını xatırladaraq bildirib ki, bu insanların türkiyəli siyasətçiləri dinləmək və onlardan məlumat almaq haqqı var: "Biz özümüzdən soruşmalıyıq: Almaniyada söz azadlığı varmı?". Ferxoygen Aİ-nin Türkiyəyə verdiyi vədə əməl etmədiyini xatırladaraq vurğulayıb ki, indiki vəziyyətdə Türkiyə deyil, Avropa öz mövqeyini dəyişməlidir.
Onu da bildirək ki, Almaniya qanunlarına görə, əcnəbi vətəndaşların bu ölkə ərazisində siyasi xarakterli, o cümlədən seçkiqabağı tədbirlər keçirməsinə icazə verilir. Xarici ölkə hökumətlərinin nümayəndələrinin təşviqatla məşğul olması da, prinsip etibarilə, qadağan edilməyib. Bütün bunlar bir daha Almaniyanın Türikyəyə qarşı kifayət qədər qərəzli mövqedə olduğunu göstərir. Baş verənlər bəzi Avropa ölkələrinin özündə də narazılıq yaradır. Misal üçün, Macarıstan Türkiyəyə qarşı hücumlara kəskin reaksiya verib. Bu ölkənin xarici işlər naziri Piter Siyyarton bildirib ki, Avropa ölkələri türk nazirlərə qoyduqları qadağalarla ikili standart nümayiş etdirirlər: "Biz Avropa İttifaqının Türkiyə ilə bağlı mövqeyini tamamilə inkar edirik. Ankara bizim yaxın müttəfiqimizdir və bu müttəfiqlik təkcə NATO çərçivəsi ilə yekunlaşmır. Biz Türkiyə hakimiyyətinə yönəlik əsassız tənqidlərə qarşıyıq. Məsələn, Avropa İttifaqı 15 iyulda dövlət çevrilişinə cəhd edən qiyamçıların taleyindən daha çox narahatdır, nəinki çevrilişdən. Avropa İttifaqı münasibətləri gücləndirməli və miqrantlarla bağlı razılaşmadakı öhdəliklərini yerinə yetirməlidir". Polşa da Macarıstanla eyni mövqedən çıxış edir. Bu ölkənin xarici işlər naziri Vitold Vaşikovski hollandların səhv etdiyini deyib: "Ankara ilə münasibətlərin pozulması Brüssel üçün əlverişsizdir. Türkiyə qaçqınlar üçün sərhədləri yenidən açacaqsa, miqrant dalğası Avropanı boğacaq". Türkiyə isə artıq Avropada baş verənlərdən sonra miqrant razılaşmasına yenidən baxacağını açıqlayıb.
Tahir TAĞIYEV