"Bu, Azərbaycanın güclü olmasının göstəricisidir"
Fransada səfərdə olan Azərbaycan Prezidenti İlham Əliyev bir sıra önəmli və vacib görüşlər keçirdi. Prezidentin işgüzar və siyasi dairələrlə keçirdiyi görüşlər olduqca yüksək səviyyədə alındı. Baxmayaraq ki, səfərdən əvvəl Fransanın erməni təşkilatlarının Azərbaycan liderinə qarşı təxribat hazırlayacağı haqqında məlumat var idi.
Belə ki, Fransa erməni təşkilatlarının "Collectif Van" nəşri bütün fransızlara müraciət edərək, onları Prezident İlham Əliyevin səfərinə qarşı erməni diasporunun aksiyalarını dəstəkləməyə çağırmışdı. Ancaq bunların hamısı iflasa uğradı.
Keçirilən görüşlər zamanı Azərbaycan dövlətinin başçısı sənədlərin imzalanması mərasimindən sonra mətbuata bəyanatında bir daha tam açıq şəkildə ölkənin mövqeyini bəyan etdi. Bu, Qarabağla bağlı status-kvonun qəbuledilməzliyi və münaqişənin tezliklə həllinin vacibliyi məsələsi idi. Fransa Minsk Qrupuna həmsədr olan ölkələrdən biri kimi bir daha bizdən mesaj aldı ki, tezliklə status-kvo dəyişdirilməlir və münaqişəyə son qoyulmaqla bölgədə sülh təmin edilməlidir. Səfər zamanı bəlli oldu ki, Azərbaycanın, təkcə iqtisadi deyil, bir çox sahələrinin gələcəkdə Fransa dövlətinin müvafiq qurumları ilə işbirliyi qurması baxımından da önəmi böyükdür. Müdafiə və təhlükəsizlik sektoru ilə də bağlı önəmli danışıqlar və müzakirələrin olduğu məlumdur. Başqa bir tərəfdən, Avropada yaşayan azərbaycanlılar İlham Əliyevə dəstək nümayiş etdirmək məqsədilə Parisin Joffre meydanında - Sülh divarının yaxınlığında aksiya keçirib. Mitinqdə 400-dən çox həmvətənimiz iştirak edib. Mitinq iştirakçıları Prezident İlham Əliyevin rəhbərliyi altında Azərbaycanın regionda müstəqil siyasət yürütdüyünü vurğulayıblar.
Bütün bunların fonunda Prezidentin səfəri zamanı erməni təxribatlarının baş tutmaması nəyin göstəricisidir? Məsələyə münasibət bildirən Tarix elmləri üzrə fəlsəfə doktoru Məhərrəm Zülfüqarlı bunu bir sıra faktorlarla əlaqələndirdi: "Bu, Azərbaycanın güclü olmasının göstəricisidir. Tək hakimiyyətin yox, o cümlədən xaricdə olan Azərbaycan diasporunun, onlara dəstək verən türk disporunun birgə fəaliyyətinin nəticəsidir. Məsələ ondadır ki, bu istiqamətdə işlər yaxşı qurulub. Əvvəllər, yəni 90-cı illərdə bu işlər zəif qurulmuşdusa, indi situasiya fərqlidir. Yəni Fransada və digər Avropa ölkələrində yaşayan ermənilərin hər hansı təxribatına qarşı Azərbaycanın güclü lobbisi formalaşıb. Ona görə də, ermənilərin hay-küyünə baxmayaraq, təxribatları alınmadı. Azərbaycan getdikcə güclənir və bu artıq faktdır. Ermənilərin zəifləməsi artıq seçkiqabağı kampaniyada da özünü göstərir. İqtisadi çətinlik, böhran içində yaşayan bir ölkə artıq parçalanma ərəfəsindədir. Azərbaycan isə regionun ən güclü dövləti kimi həm daxildə, həm də xaricdə hər hansı təxribatın qarşısını almağa qadirdir. Ona görə də Fransada erməni lobbisinin bütün cəhdləri iflasa uğradı". Vidadi ORDAHALLI