"Ona görə də keçiriləcək həmin tədbirin əhəmiyyətini yüksək qiymətləndirirəm"
Məlum olduğu kimi, Yaxın Şərq ölkələrinin indiki və sabiq xarici işlər nazirləri V Qlobal Bakı Forumunda bir araya gələcək. Tədbirdə Liviyanin xarici işlər naziri Mohamed Əl Dayri, Misirin sabiq xarici işlər naziri və Ərəb Liqasının baş katibi olmuş Əmr Musa, Türkiyə xarici siyasət idarəsinin keçmiş rəhbəri Hikmət Çətin və ilk dəfə olaraq İran İslam Respublikasının sabiq xarici işlər naziri Mənuçöhr Mottaki iştirak edəcək.
Diplomatlar forum çərçivəsində beynəlxalq münasibətlərin gələcəyini, bu münasibətlərin nizama salınmasında zəruri olan ittifaqların qurulmasını, terrorizmlə mübarizənin yollarını, transatlantik münasibətlərin gələcəyini, ekstremizm və populizmin beynəlxalq təhlükəsizliyə qarşı təhdidlərini müzakirə edəcək, qlobal problemlərin həll yolları barədə təkliflərini səsləndirəcək.
Onu da qeyd edək ki, Qlobal Bakı Forumu Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə martın 16-17-də keçiriləcək.
Ümumilikdə, Azərbaycan son illər bir sıra beynəlxalq əhəmiyyətli tədbirlərə çox uğurla ev sahibliyi edib. Azərbaycan regionda aparıcı nüfuza malikdir. Sözügedən tədbirin paytaxtda keçirilməsi Bakının sülh mərkəzi olaraq rolunu artırır.
Sözügedən məsələni dəyərləndirən şərqşünas Seyid Camal Əzimbəylinin fikrincə, Bakıda belə mötəbər tədbirlərin keçirilməsi ümumilikdə Azərbaycan dövlətinin uğurudur: "Bu həm də xalqın uğurudur. Ölkədə bu cür tolerant mühitin yaradılmasında ölkə başçısı İlham Əliyevin xidmətləri böyükdür. Məsələ ondadır ki, 2017-ci ilin İslam Həmrəyliyi İli kimi elan olunması bütün dünyaya Azərbaycanın bir sülh çağırışı kimi qəbul olunmalıdır. Bu baxımdan böyüyən dünyanın bir parçası olan Azərbaycanda belə tədbirlərin keçirilməsi ölkənin uğurudur. Bu həm də Azərbaycana artıq beynəlxalq güc mərkəzlərinin etimad göstərməsi deməkdir. Eyni zamanda, Bakının sülh mərkəzi olaraq rolunu artırır. Ona görə də bu cür tədbirlərə Azərbaycanın ev sahibliyi etməsi önəmli hadisədir. Çünki dünyanı təhdid edən terror təhdidləri və digər problemlərin qarşısını vaxtında almaq üçün belə müzakirələrin keçirilməsinə hər zaman ehtiyac var. Bu, dünyəvi bir müsəlman ölkəsi olan Azərbaycanın inkişafının göstəricisidir. Ona görə də keçiriləcək həmin tədbirin əhəmiyyətini yüksək qiymətləndirirəm".
Vidadi ORDAHALLI