"İndi həmin cinayətkar rejimə hər hansı dəstək verən xarici ölkə vətəndaşına qarşı..."
Məlum olduğu kimi, Azərbaycan Respublikasının Baş Prokurorluğu Avropa Parlamentinin üzvləri - Lüksemburq Böyük Hersoqluğunun vətəndaşı Frank Engel, Kipr Respublikasının vətəndaşı Eleni Teoxarus və Çex Respublikasının vətəndaşı Yaromir Ştetina "Dağlıq Qarabağ Respublikası" adı altında yaradılmış qondarma rejimin beynəlxalq səviyyədə təbliğ edilməsi məqsədilə kütləvi informasiya vasitələrinə verdikləri müsahibələrində, iştirak etdikləri beynəlxalq tədbir və konfranslarda işğal edilmiş ərazilərdə qanunsuz fəaliyyət göstərən qurumu "müstəqil dövlət" kimi təqdim etmələrinə, Azərbaycan Respublikasının mühafizə olunan dövlət sərhədinin nəzarət-buraxılış məntəqələrindən kənarda dəfələrlə, xüsusən son dəfə 2017-ci il fevralın 20-də Azərbaycanın işğal olunmuş ərazilərində keçirilmiş qondarma "referendum"da "müşahidəçi" qismində iştirak etmək üçün keçmələrinə əsaslı şübhələr olduğundan, Azərbaycan Respublikası Cinayət Məcəlləsinin müvafiq maddələri ilə təqsirləndirilən şəxslər qismində cəlb olunmaqla, məhkəmənin qərarı əsasında həbs-qətimkan tədbiri seçilərək barələrində beynəlxalq axtarış elan olunması üçün "İnterpol"a müvafiq sorğu göndərilib.
Azərbaycan öz suverenliyi və ərazi bütövlüyünün pozulması halları ilə heç vaxt barışmayacaq. Qanun çərçivəsində öz mübarizəsini davam etdirəcək. Necə ki, görülən tədbirlər nəticəsində bloger Lapşin məsuliyyətə cəlb olundu. Bu arada Ermənistan mətbuatı Azərbaycan tərəfinin Avropa Parlamentinin bəzi üzvləri barədə gördüyü bu tədbirləri guya insan haqlarının pozulması kimi təqdim etməyə çalışıb. Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlının fikrincə, bu kimi iddiaların heç bir əsası yoxdur: "Bu, erməni həyasızlığının növbəti nümunəsidir. O erməni təmsilçilərinə demək lazımdır ki, onların Azərbaycan ərazilərini işğal etməsi nəticəsində nə qədər insan faciə ilə üzləşib, şəhid olub, yaralanıb, yerindən-yurdundan olub, xəstəlik tapıb ölüb və s. Bu zaman heç insan haqları yada düşmür. İndi həmin cinayətkar rejimə hər hansı dəstək verən xarici ölkə vətəndaşına qarşı Azərbaycan beynəlxalq hüquqdan istifadə edərək addımlar atanda, insan haqlarından danışırlar. Yəni erməni həyasızlığı ötən əsrin əvvəllərindən indiyə qədər müxtəlif formada özünü göstərir. Böyük dövlətlərin dəstəyi olduğuna görə yalanları dünyaya yayırlar. Ancaq indi Azərbaycan dövləti gücləndikcə, bu yalanların üstü açılır. Ora gedən insanlar da peşman olacaq. Lapşinin həbs olunması onlara dərsdir. Ona görə də Azərbaycanın atdığı addımlar beynəlxalq hüquqa uyğundur və ermənilər də bundan təşviş keçirərək həyasızlıq edir". Vidadi ORDAHALLI