"Təmas xəttində baş verən son insident regionda davamlı sülh və təhlükəsizliyin təmin olunması üçün tərəflərin tez bir zamanda danışıqları bərpa etməsinin vacibliyini göstərir". APA-nın məlumatına görə, bu sözləri ATƏT-in Minsk qrupunun amerikalı həmsədri Riçard Hoqland “armenpress.am” saytına müsahibəsində deyib.
“Mən və ATƏT-in Minsk qrupunun digər həmsədrləri fevralın 25-də bəyanat yayaraq atəşkəsə və güc tətbiq edilməməsi prinsipinə sadiqlik göstərilməsinə çağırış etmişik”, - deyə həmsədr qeyd edib.
“Aprel müharibəsinin bütün təfərrüatları bu günədək üzə çıxmayıb”
“Beynəlxalq vasitəçilər atəşkəs rejiminə riayət olunması üçün Dağlıq Qarabağ münaqişəsi tərəflərinə kömək etməlidir”. Bunu isə ATƏT-in Minsk qrupunun keçmiş həmsədri Ceyms Uorlik deyib.
O bildirib ki, ilk növbədə insan həyatını qorumaq, habelə danışıqlar prosesində irəliləyişə nail olmaq üçün vəziyyəti normallaşdırmaq və atəşkəs rejiminə əməl etmək vacibdir: “Nə qədər ki, münaqişə aktiv vəziyyətdədir və hərbi əməliyyatlar davam edir, nizamlama prosesində irəliləyişə nail olmaq çətindir. Ümid edirəm ki, prezidentlər görüşməyə razılıq verəcək və danışıqlar prosesində irəliləyiş müşahidə olunacaq. Mən ötən il dekabrın sonunda həmsədrlik postundan gedərkən danışıqlar masasında tərəflər arasında müzakirə imkanı yaradacaq maraqlı təkliflər var idi”.
C. Uorlik bildirib ki, bu günədək aprel müharibəsinin bütün təfərrüatları üzə çıxmayıb: “Ötən ilin aprelində biz çoxsaylı itkilərin şahidi olduq. Mən hələ bu gün də əmin deyiləm ki, biz dəqiq qurbanların sayını bilirik. Artıq sülhün vaxtı gəlib çatıb. Sülh regionda hər şeyi dəyişəcək. Ermənistan üçün isə sülh bütün cəmiyyətin əsasını dəyişəcək”.
BMT-nin baş katibi Dağlıq Qarabağ münaqişəsi zonasında vəziyyətin gərginləşməsindən narahatdır
“BMT-nin baş katibi Antonio Quterreş Dağlıq Qarabağ münaqişəsi zonasında vəziyyətin gərginləşməsindən narahatdır”. Trend-in TASS-a istinadən verdiyi xəbərə görə, bu barədə jurnalistlərə baş katibinin rəsmi nümayəndəsi Stefan Cüjarrik bildirib.
"Biz Dağlıq Qarabağda təmas xətti boyunca toqquşmalar haqqında məlumatlardan narahatıq", - deyə Stefan Cüjarrik qeyd edib.
Onun sözlərinə görə, BMT-nin baş katibi gərginliyin qarşısını alması üzrə ATƏT-in Minsk qrupunun həmsədrlərinin səylərini tamamilə dəstəkləyir.
Yıldırım “Bu haqq işində Türkiyə həmişə Azərbaycanın yanındadır” dedi
“Türkiyə Ermənistan və Azərbaycan qoşunlarının qarşıdurma xəttində qeydə alınmış toqquşmalar nəticəsində hərbçilərin həlak olması ilə əlaqədar Azərbaycan xalqının kədərini bölüşür”. Bunu isə Ədalət və İnkişaf Partiyasının iclası zamanı Türkiyənin Baş naziri Binəli Yıldırım deyib.
Onun sözlərinə görə, Dağlıq Qarabağ münaqişəsi uzun illərdir ki, qanayan yaradır.
Baş nazir bildirib: “Azərbaycan ərazisi Ermənistan tərəfindən işğal olunub və bu problem hələ həll olunmayıb. Azərbaycanın dərdi - Türkiyənin dərdidir, Azərbaycanın xoşbəxtliyi – Türkiyənin xoşbəxtliyidir. Bir daha vurğulamaq istəyirəm ki, bu haqq işində Türkiyə həmişə Azərbaycanın yanındadır”.
Bahçeli cəbhədə gərginliyin artması ilə bağlı bütün məsuliyyəti Ermənistanın üzərinə qoydu
“Ermənistan və Azərbaycan qoşunlarının qarşıdurma xəttində gərginliyin artması ilə bağlı bütün məsuliyyət Ermənistanın üzərinə düşür”. Bunu Türkiyə Böyük Millət Məclisində çıxışı zamanı Türkiyənin müxalif Milliyyətçi Hərəkat Partiyasının sədri Dövlət Bahçeli deyib.
O bildirib ki, artıq Dağlıq Qarabağ probleminin ədalətli həllinin vaxtı çatıb: “Ermənistan atəşkəs rejimini pozmağı dayandırmalı və qoşunlarını işğal olunmuş Azərbaycan torpaqlarından çıxarmalıdır”.
“Dağlıq Qarabağ münaqişəsi postsovet məkanında ən “fəal” münaqişələrdən biridir”
Dağlıq Qarabağ münaqişəsi postsovet məkanında ən “fəal” münaqişələrdən biridir. Bunu Trend-ə “Yeni Rusiya” hərəkatının rəhbəri Nikita İsayev deyib.
Onun sözlərinə görə, Dağlıq Qarabağda münaqişənin eskalasiyası təkcə tərəflər üçün yox, bütün region üçün təhlükəlidir.
Ekspert qeyd edib ki, münaqişə gərgin mərhələyə keçərsə bu, regionda Ukrayna və Suriyadan sonra üçüncü qaynar nöqtə ola bilər.
N.İsayevin sözlərinə görə, Rusiya münaqişənin həllinə daha fəal cəlb olunmalıdır: “Rusiya Ermənistan, Azərbaycan və ABŞ-ın iştirakı ilə dördtərəfli danışıqlar formatı yarada bilər. Bundan başqa, Rusiya Türkiyənin də prosesə cəlb olunmasının tərəfdarıdır, amma Ermənistan qətiyyətlə buna qarşı çıxır”.