"Görünən budur ki, ikitərəfli görüşdə status-kvodan daha çox Ermənistan-Rusiya dostluğundan danışılıb"
Ermənistanın xarici işlər naziri Edvard Nalbandyan Rusiyaya səfəri zamanı rusiyalı həmkarı Sergey Lavrovla görüşüb. Nazirlər Rusiya XİN-in iqamətgahında iki ölkə arasında diplomatik münasibətlərin qurulmasının 25 illiyinə həsr olunan sərgi ilə tanış olublar. Sərgi ilə tanışlıqdan sonra nazirlərin təkbətək görüşü baş tutub. Görüşdə nazirlər iki ölkə arasında münasibətlər, eyni zamanda, hərbi və hərbi-texniki sahədə əməkdaşlığa dair müzakirələrin aparılacağını deyiblər.
Daha sonra görüş mətbuatın iştirakı olmadan davam etdirilib. Görüşdən sonra birgə mətbuat konfransı keçirilib, ancaq maraqlıdır ki, Dağlıq Qarabağ münaqişəsində status-kvonun dəyişdirilməsi ilə bağlı hər hansı müzakirənin aparıldığı bildirilməyib. Belə müzakirə niyə aparılmayıb, aparılıbsa, hansı səbəbdən bu barədə məlumat verilməyib?
Ekspert Aqşin Əliyev qəzetimizə bildirdi ki, görünür, Ermənistanın XİN başçısı E.Nalbandyanın Moskvaya səfər etməsində məqsəd Dağlıq Qarabağ münaqişəsinin nizamlanması deyil, əksinə, məsələnin həllini uzatmaq olub. Çox güman ki, bu səfər Ermənistanda keçiriləcək parlament seçkilərilə bağlı olub. Ermənistanın əsas istəyi apreldə keçiriləcək parlament seçkilərinə qədər vaxt qazanmaqdır. Çünki Sarkisyan yenidən hakimiyyətə gəlmək istəyir.
Bilirsiniz ki, son zamanlar Ermənistanın daxilində qarşıdurma yüksək səviyyəyə çatıb. Qarabağ erməniləri ilə Ermənistan erməniləri bir-birini qəbul etmək istəmir. Bütün bunlara baxmayaraq, Azərbaycanın mövqeyi bəllidir. Rusiya xarici işlər naziri S.Lavrov erməni həmkarı E.Nalbandyanı qısa zaman kəsiyində ikinci dəfə Moskvaya çağırıb. Bunun İlham Əliyevin Münhen Təhlükəsizlik Konfransındakı çıxışlarından sonraya düşməsi də təsadüfi deyil. Çünki həmin toplantıda İlham Əliyev münaqişənin nizama salınması ilə bağlı ciddi bəyanatlar səsləndirib. Səfər çərçivəsində S.Lavrovun erməni həmkarını "Dostluq" ordeni ilə təltif etməsi də təsadüfi deyil. Yəni görünən budur ki, ikitərəfli görüşdə status-kvodan daha çox Ermənistan-Rusiya dostluğundan danışılıb".
Məhəmmədəli QƏRİBLİ