"Rusiyanın problemin həlli ilə bağlı nümayiş etdirdiyi çarəsizliyi imitasiyadır"
Ermənistan prezidenti ölkəsinin Rusiyadan tam asılı olduğunu etiraf edib. Serj Sarkisyan hərbi birləşmə komandanları ilə keçirdiyi müşavirədə çıxışı zamanı bildirib ki, Rusiya olmasa, təhlükəsizliyimiz sual altında qalar.
S.Sarkisyan açıq etiraf edib ki, Rusiyasız Ermənistan müstəqil dövlət ola bilməz: "Rusiya Ermənistanın təhlükəsizliyinin qarantıdır. Bu gün Ermənistan müstəqil dövlət olduğu üçün Rusiyaya borcludur. Rus və erməni xalqları çox zəngin tarixə malikdir. Xalqlarımız tarix boyu çiyin-çiyinə vuruşublar və heç zaman fərqli tərəflərdə yer almayıblar. Biz Kollektiv Təhlükəsizlik Müqaviləsi Təşkilatında fəaliyyətimizi daha da gücləndirməliyik. Çünki NATO-ya üzv olan Türkiyə bizim üçün təhdid yaradır. Kollektiv Təhlükəsizlik Müqaviləsi Təşkilatı isə bu təhdidə qarşı sipərdir".
Əslində, Sarkisyanın söylədiyinin həqiqət olduğunu biz bilirik. Hətta Azərbaycan rəsmiləri belə bunu açıq mətnlə dəfələrlə ifadə ediblər. Bir müddət əvvəl Azərbaycanın xarici işlər naziri Elmar Məmmədyarov Rusiyada keçirilən diplomatik danışıqlardan sonra belə bir fikir işlətdi: "Rusiya istəsə, Ermənistan hakimiyyətinə təsir edib münaqişənin həllini sürətləndirə bilər".
Həm Sarkisyanın etirafı, həm də Məmmədyarovun açıqlaması onu deməyə əsas verir ki, Rusiya problemin həllində maraqlı deyil. Rusiya bu problemin həllində niyə maraqlı deyil və bu istiqamətdə Sarkisyana təzyiq göstərmir?
Klassik Xalq Cəbhəsi Partiyasının sədr müavini Xəzər Teyyublunun fikrincə, Dağlıq Qarabağ probleminin yaranması və konservləşməsində Rusiyanın fəaliyyəti danılmazdır: "SSRİ dağılandan sonra Rusiya onun siyasi varisi kimi gündəmə gəldi. Onun maraqlarının təmin olunmadığı yerlərdə oxşar qaynar ocaqlar yaradıldı. Abxaziya, Cənubi Osetiya, Dnestryanı və başqalarını buna misal göstərə bilərik. Azərbaycan üçün təzyiq rıçaqı kimi Dağlıq Qarabağ kartı ortaya atıldı. Bunu hamı bilir ki, Dağlıq Qarabağ və ona bitişik rayonları Ermənistan öz gücünə işğal etməyib. Rusiya problemin həlli ilə məşğul olan Minsk Qrupunun həmsədrlərindən biridir. Amma hesab edirəm ki, Rusiyanın münaqişənin həllinə təsir imkanları həmin qurumdan çoxdur. Ortada konkret həll planları var. Onlar Sarkisyanın nümayiş etdirdiyi qeyri-konstruktivlik ucbatından həyata keçmir. Sarkisyan, faktiki olaraq, Rusiyanın for-postu olduğunu etiraf edir. Rusiya Sarkisyanı istənilən güzəştə məcbur edə bilər. Amma bunu etməkdə maraqlı görünmür. Hiss olunur ki, mövcud status-kvonun saxlanması Rusiya üçün lazımdır. Bunun da səbəbi bəllidir. Rusiya Azərbaycandan istədiyini tam ala bilmir. Bu səbəbdən də Rusiyanın problemin həlli ilə bağlı nümayiş etdirdiyi çarəsizliyi imitasiyadır".
Məhəmmədəli QƏRİBLİ