Məhərrəm Zülfüqarlı: "Sadalanan səbəblər üzündən Ermənistanda keçirilən seçkilərdə baş verən saxtakarlıqları, qanun pozuntularını görmək istəmirlər"
Məlum olduğu kimi, aprelin 2-də Ermənistanda parlament seçkiləri keçiriləcək. Ölkə konstitusiyasına edilən dəyişikliklərə görə, Ermənistan parlamentli respublika elan olunub. Dəyişikliklər prezidentin səlahiyyətlərini məhdudlaşdırdığı halda, baş nazirin vəzifə səlahiyyətlərini artırıb. Bu mənada növbəti seçkilərdə qalib gələcək partiya Ermənistanı idarə etmək imkanlarına malik olacaq.
Serj Sarkisyanın rəhbəri olduğu Respublika Partiyası və ona müxalif partiyalar artıq seçkilərə ciddi hazırlaşmağa başlayıb. Hakim respublikaçılara qarşı mübarizədə kifayət qədər reytinq qazanmış Levon Ter-Petrosyanın başçılıq etdiyi Erməni Milli Konqresi və keçmiş prezident Robert Koçaryanın tərəfdarları yer alıb. Seçkilərdə iştirak edən bütün siyasi qüvvələrin platformasında Dağlıq Qarabağ münaqişəsinin müxtəlif müstəvilərdə həlli qabarıq yer tutub. Görünür, onlar bu məsələni qabartmaqla seçicilərin rəğbətini və dəstəyini qazanmaq niyyətindədir. L.Ter-Petrosyan və R.Koçaryan nisbətən "yumşaq" xətt tərəfdarı olsa da, S.Sarkisyan, əksinə, davakar siyasətindən əl çəkmir, seçkiqabağı kampaniyada cəbhə xəttində gərginliyin saxlanmasına rəvac verir. Bununla da sanki rəqiblərinə yerlərində sakit oturmaq mesajı verir.
Bütün bunlarla yanaşı, indiyə qədər ölkədə keçirilən bütün seçkilər - prezident, parlament seçkiləri ciddi saxtakarlıq və qanun pozuntuları ilə müşayiət olunub. 2008-ci ilin martında keçirilən prezident seçkilərində saxtakarlıq o həddə gəlib çatdı ki, əhali kütləvi şəkildə etirazlara qalxdı. Bu zaman nümayişçilər atəşə tutuldu. Nəticədə ölən və yaralananlar oldu. Ən qəribəsi odur ki, nə o zaman, nə də ondan sonra seçkidə baş verən ciddi qanun pozuntularını, saxtakarlıqları beynəlxalq qurumlar tənqid etmədi. Əksər hallarda belə pozuntuları görməzdən gəlirlər. Ən yaxşı halda, yumşaq bəyanatlarla ötüşdürürlər. Azərbaycana gəldikdə isə, hələ seçki başlamamış, qərəzli tənqid kampaniyası başlıyır. Bütün bunların səbəbi nədir? Məsələyə münasibət bildirən İctimai Problemlərin Tədqiqi Assosiasiyasının rəhbəri Məhərrəm Zülfüqarlı bunu bir sıra amillərlə əlaqələndirdi: "Bu, bir sıra beynəlxalq qurumlarda olan ikili standartlarla bağlıdır. Xüsusən də Azərbaycana qarşı ögey münasibət özünü göstərməkdədir. Ermənistanda 1999-cu ildə parlament, 2008-ci ildə etiraz aksiyası keçirən ölkə vətəndaşları gülləbaran edildi. Avropa Şurasının Sərsəng su anbarı ilə bağlı məruzəçisi Ermənistana buraxılmadı. Bütün bunlarla bağlı Ermənistana yönəlik heç bir tənqid və təzyiq olmadı. Baxmayaraq ki, ilk mərhələdə bununla bağlı müəyyən gözləntilər var idi. Yəni məruzəçini ölkəyə buraxmamaq, bu artıq Avropa Şurasına qarşı təhqirdir. Bütün bunlar onu göstərir ki, sözügedən məsələdə xristian təəssübkeşliyi var. Ermənilərin ABŞ-da, Avropada olan lobbilərinin təsiri var. Sadalanan səbəblər üzündən Ermənistanda keçirilən seçkilərdə baş verən saxtakarlıqları, qanun pozuntularını görmək istəmirlər. Ona görə də Azərbaycanın səlahiyyətli nümayəndələri bu məsələləri daim nəzarətdə saxlamalı və görüşlərdə qeyd etməlidir. Fikrimcə, son illər bu sahədə mühüm işlər aparılır".
Vidadi ORDAHALLI