"Çox təəssüf ki, beynəlxalq təşkilatlar təcavüzkar Ermənistana qarşı sanksiyalar tətbiq etməkdən hələ də çəkinir"
Prezident İlham Əliyev Münhen Təhlükəsizlik Konfransı çərçivəsində Avrasiyada əməkdaşlıq və problemlər məsələlərinə həsr olunan panel-müzakirədə ümid etdiyini bildirib ki, Ermənistan-Azərbaycan, Dağlıq Qarabağ münaqişəsi BMT qətnamələri əsasında həll olunacaq.
İlham Əliyev vurğulayıb ki, Avropa İttifaqının danışıqlar prosesinə birbaşa cəlb olunmasını gözləmirik: "Baxmayaraq ki, Avropa Komissiyası münaqişənin həlli ilə məşğul olan Cənubi Qafqaz üzrə xüsusi nümayəndəsini təyin edib. Biz Avropadan və hər bir ölkədən postsovet məkanında olan bütün münaqişələrə dair vahid standart yanaşmanı gözləyirik. Biz bu gün xanım Merkelin ərazi bütövlüyü ilə bağlı söylədiklərini yüksək qiymətləndiririk. Lakin biz bu prinsipin seçmə üsulla yox, bütün münaqişələrə tətbiq olunmasını istəyirik. Fikrimizcə, baxmayaraq, Azərbaycanın Avropa İttifaqı ilə Assosiasiya Sazişi sazişdən çox birtərəfli təlimatlar siyahısına bənzəyirdi, onun imzalanmamasının səbəblərindən biri də, hətta əsas səbəbi onunla bağlı idi ki, onlar Ermənistan ilə Azərbaycan arasında münaqişənin Azərbaycanın ərazi bütövlüyü əsasında həll olunması ilə bağlı dəqiq ifadə edilmiş mətnin bu Sazişə daxil edilməsini istəmirdilər. Onların Gürcüstan və Moldova ilə razılaşmalarında bu müddəa var idi. O zaman Ukraynanın belə bir problemi yox idi. Lakin Azərbaycana gəldikdə, ikili standartlar üzə çıxır. Ukraynada baş verənlərlə bağlı Rusiyaya qarşı sanksiyalar tətbiq olunub. Dağlıq Qarabağda baş verənlərlə bağlı Ermənistana qarşı sanksiyalar tətbiq olunmayıb. Bu ikili standartlı yanaşma aradan qaldırılmalıdır. Əlbəttə ki, bu, dərhal münaqişənin həllinə gətirib çıxarmayacaq. Lakin biz səylərimizi birləşdirsək və təcavüzkar Ermənistana torpaqları boşaltmaq üçün təzyiq göstərsək, düşünürəm ki, onda münaqişə daha tez həll olunacaq. Çünki bizim məsələyə gəldikdə, dəfələrlə bu auditoriyada qeyd etdiyim kimi, BMT Təhlükəsizlik Şurasının dörd qətnaməsi var. Ermənistan qoşunlarının çıxarılmasını tələb edən aparıcı beynəlxalq təşkilatların qətnaməsi var və bu qətnamələr icra olunmalıdır".
Göründüyü kimi, ölkə başçısı səviyyəsində də Ermənistana effektiv təzyiq göstərilməsi üçün sanksiya tətbiqi tələb edilir. Bunun həyata keçməsi mümkündürmü?
Politoloq Vüqar Qədirov qəzetimizə açıqlamasında bildirdi ki, Ermənistanı konstruktiv mövqeyə getirməyin yeganə yolu beynəlxalq sanksiyaların tətbiqidir: "Ölkə başçısı tamamilə doğru vurğulayır ki, bu məsələdə belə Azərbaycan ikili standartla üzləşib. Paralellər aparanda görürük ki, oxşar hadisələr zamanı dərhal sanksiyalar işə düşüb. Dağlıq Qarabağ problemilə bağlı isə vəziyyət fərqlidir. Ermənistan Azərbaycana qarşı ərazi iddiaları irəli sürərək Dağlıq Qarabağ və ətraf 7 rayonu işğal edib, soyqırımı törədib, 1 milyon insanı qaçqın və məcburi köçkün vəziyyətinə salıb, insan hüquqlarını kütləvi surətdə pozub. Çox təəssüf ki, beynəlxalq təşkilatlar təcavüzkar Ermənistana qarşı sanksiyalar tətbiq etməkdən hələ də çəkinir. Bu faktlara görə beynəlxalq təşkilatlar və dövlətlər Ermənistana mütləq sanksiya tətbiq etməlidir. İyirmi ildən çoxdur sürən atəşkəs dövründə və danışıqlarda irəliləyiş yoxdursa, deməli, mütləq yeni variantlar tətbiq olunmalıdır və bu da ancaq Ermənistana təzyiq vasitələrindən ibarət ola bilər. Proses çox uzun çəkdi. Amma son zamanlar postsovet ölkələrində baş verənlər ümid etməyə əsas yaradır ki, Dağlıq Qarabağ münaqişəsinin də nizamlanması üçün tezliklə zəmin yaranacaq. Ukraynadakı hadisələrlə bağlı Rusiyaya konkret təzyiqlər var, sanksiyalar tətbiq olunub. Sanksiyanı ayrı-ayrı ölkələr və BMT tətbiq edə bilər. BMT üçün belə addım atmağa kifayət qədər hüquqi əsas var. Çünki həmin qurumun 4 qətnaməsi icra olunmur".
Məhəmmədəli QƏRİBLİ