Aqşin Əliyev: "İran nüvə çalışmalarını dayandırıbsa, sanksiyalardan sonra nüvə çalışmalarına başlayacaq"
İsrail müdafiə naziri Aviqdor Liberman məlumat verib ki, yeni amerikalı həmkarı Ceyms Mettislə görüşdə "İran tərəfdən təhlükəni müzakirə edib və bu yöndə qəti fəaliyyət vədi alıb". Onun sözlərinə görə, "biz ölkəmizin üzləşdiyi üç əsas problemi müzakirə etmişik - bu, İran, İran və İrandır".
Libermana görə, Tehrana qarşı tələblər dəsti yenə də köhnədir: uzaqmənzilli ballistik raketlər, raket texnikasının inkişafı, nüvə texnologiyası əldə etmək. "İsraillə coğrafi sərhədləri olmayan İran terrorçu təşkilatların əsas sponsoru olmaqla, Livandakı "Hizbullah" və Qəzzadakı HƏMAS vasitəsilə buna nail olub", - nazir dəqiqləşdirib. "Pentaqon başçısı Mettislə İsrailin təhlükəsizliyinin təmini və Yaxın Şərqdə ABŞ maraqlarının saxlanması məqsədilə açıq və səmimi dialoq aparmaq və əməkdaşlıq etmək razılığına gəldik. Həmçinin razılaşdıq ki, ən yaxın vaxtda təzədən görüşək".
Liberman deyir ki, Mettis, öz növbəsində, ABŞ-ın yeni administrasiyasının "İrana qarşı qəti hərəkət etmək" niyyətini təsdiq edib ki, bu da ABŞ prezidenti Donald Trampın son bəyanatı ilə səsləşir: "Biz İran dövlətinə qarşı yeni sanksiyalar tətbiq etmişik. O, əvvəlki prezident Barak Obama administrasiyası sayəsində tam mənfəət götürür. O, dünyada terrorizmin baş sponsorudur".
Eyni zamanda Tramp xəbərdarlıq edib ki, "bu məsələ düzgün şəkildə həll olununca" Vaşinqton Tehrana təzyiq göstərəcək, çünki, onun sözlərinə görə, indi İran məsələsi "lazım olduğu kimi" həll olunmur və Tehranla nüvə sazişini yenidən tənqid edib.
İrana qarşı yaradılan ABŞ-İsrail koalisiyası nə vəd edir?
Ekspert Aqşin Əliyev qəzetimizə bildirdi ki, bu qayda ilə ABŞ və İsrail Yaxın Şərqdə özü üçün baş təhlükəni İŞİD-də deyil, İranda görür, onu terrorizmin sponsoru sayır: "Düzdür, İranın nüvə proqramı probleminin tənzimlənməsi üzrə 2015-ci ilin iyulunda Vyanada saziş imzalamış "altılığın" başqa üzvləri ABŞ və İsrailin siyasətini dəstəkləmək niyyətində deyil. Amma bu, indiki mərhələ üçün belədir.
İsrail ilə Amerika İrana qarşı sanksiyaları sərtləşdirsə, bölgədəki vəziyyət daha da mürəkkəbləşər. İran nüvə çalışmalarını dayandırıbsa, sanksiyalardan sonra nüvə çalışmalarına başlayacaq. Bu da bölgə üçün arzuedilən deyil. Bununla da beynəlxalq aləmdə gərginlik artacaq. İndi İsrail-ABŞ rəhbərliyi İranla bağlı nələr edəcək, hər şey bundan asılıdır. Trampın İranla müharibəyə risq etməsi inandırıcı deyil. İstənilən halda, yaxın qonşumuzla bağlı vəziyyətin gərginləşməsi Azərbaycan üçün yaxşı nəsə vəd etmir.
Çünki İranda milyonlarla azərbaycanlı yaşayır. Müharibə olarsa, onlar Azərbaycana gələ bilər. Bu da böhrana səbəb olar. Bundan əlavə, İran hakimiyyəti həmişə Azərbaycan tərəfinə şübhə ilə yanaşır. Yenə elə biləcəklər ki, Amerika və İsrail tərəfi Azərbaycan sərhədlərindən istifadə edir. Bu da İran-Azərbaycan münasibətlərini gərginləşdirə bilər".
Məhəmmədəli QƏRİBLİ