"Hətta gələcəkdə Minsk Qrupu həmsədrləri belə yanlışlığa yol verərsə, Azərbaycanın sərt mövqeyi ilə rastlaşar"
Ermənistanın xarici işlər naziri Edvard Nalbandyan "Rossiya Seqodnya"ya müsahibəsində Dağlıq Qarabağ probleminin nizama salınması ilə bağlı aparılan danışıqlar və gedən proseslərdə bir sıra faktları kökündən təhrif edib. Nalbandyan bildirib ki, guya qondarma qurum olan "Dağlıq Qarabağ Respublikası" danışıqlar prosesinə cəlb olunub və beynəlxalq qurumlar bu istiqamətdə onlarla yaxından təmas qurur.
O bildirib ki, ATƏT-in Minsk Qrupunun həmsədrləri mütəmadi olaraq qondarma qurumun rəhbərliyilə görüşlər keçirir. Bunu əsas götürən diplomat qondarma qurumun iştirakı olmadan bu prosesin həllinin mümkün olmadığını dilə gətirib.
ATƏT-in Minsk Qrupu həmsədrlərinin qondarma qurum rəhbərlərilə bu istiqamətdə görüşləri, təmasları olubmu?
Ekspert Elşən Həsənov qəzetimizə bildirdi ki, bu açıqlamanı da ermənilərin növbəti məkri kimi dəyərləndirmək olar: "Ermənistanın istəyi də məhz budur ki, dünyada heç bir dövlət tərəfindən tanınmayan bir qurumu müstəqil dövlət kimi dünyaya sırısın. Keçirilən "referendum" da məhz buna hesablanıb. Ancaq uzun illərdən bəri onların bu istiqamətdə apardığı siyasət heç bir effekt vermir. Minsk Qrupu münaqişənin nizama salınması öhdəliyini üzərinə götürən ciddi bir təsisatdır. Onların başlıca qayəsi neytrallığı qorumaqdan ibarət olmalıdır. Qondarma qurumu danışıqlarda tərəf kimi qəbul edib onlarla müzakirə aparmaq Minsk Qrupunun mandatını pozmaq anlamına gəlir. Bu heç vaxt ola bilməz. Belə təmaslar və problemin həlli istiqamətində müzakirələr aparılıbsa, onda bu böyük qanun pozuntusudur. Şəxsən bizdə bu barədə məlumat yoxdur. Nalbandyan çox böyük bir yanlışlığa yol verərək deyir ki, qondarma qurum tərəf olaraq qəbul edilir. Bu belə deyil. Bilirsiniz ki, Dağlıq Qarabağın azərbaycanlı və erməni icması var. Onlar paritet əsaslarla hansısa müzakirələrdə iştirak edə bilər. Ancaq hansısa hərbi cinayətkarlardan ibarət bir xuntanın Dağlıq Qarabağın adından danışması heç vaxt mümkün ola bilməz. Hətta gələcəkdə Minsk Qrupu həmsədrləri belə yanlışlığa yol verərsə, Azərbaycanın sərt mövqeyilə rastlaşar".
Məhəmmədəli QƏRİBLİ