"İran ilk dəfə idi ki, Dağlıq Qarabağ probleminin Azərbaycanın ərazi bütövlüyü prinsipləri çərçivəsində həllinin mümkün olduğunu bəyan etdi"
İran Xarici İşlər Nazirliyinin sözçüsü Bəhram Qasimi bildirib ki, Dağlıq Qarabağda referendum keçirilməsi yersiz və bəyənilməz bir işdir: "Düşünürük ki, bu addım Azərbaycan və Ermənistan arasında böhranın həllinə heç bir kömək etməyəcək. Problemin həlli yalnız danışıqlar yolu ilə baş tuta bilər".
B.Qasimi xatırladıb ki, Azərbaycan Prezidenti İlham Əliyev yaxın vaxtlarda Tehrana səfər edəcək. Onun sözlərinə görə, İranın Azərbaycana baxışı aydın və dəqiqdir: "Bizim münasibətlərimiz möhkəmdir və çalışırıq ki, daha da inkişaf etsin".
XİN-in sözçüsü qeyd edib ki, bu günlərdə İranın ədliyyə naziri Azərbaycanda səfərdə olub: "Cənab Prezident İlham Əliyevin İrana səfəri bu yaxşı əlaqələrin daha da yaxşılaşmasına zəmin yaradacaq".
İranın "referendum"la bağlı mövqeyini necə dəyərləndirmək olar?
Politoloq Mübariz Əhmədoğlunun sözlərinə görə, qondarma "referendum" məsələsi Azərbaycanla yanaşı, beynəlxalq aləm tərəfindən də tənqid edilib: "ATƏT-in Minsk Qrupu, Avropa Birliyi, Rusiya, İran, Türkiyə və digər dövlətlər bu "referendum"u qanunsuz saydıqlarını və Azərbaycanın ərazi bütövlüyünü tanıdıqlarını bəyan ediblər.
Dağlıq Qarabağda ermənilər "referendum" addımı atmaqla əks-effekt yaratdılar. ATƏT-in Minsk Qrupunun həmsədrləri, Avropa Birliyi, Rusiya, Türkiyə, İran Ermənistanın əleyhinə bəyanat verdilər. İranın bəyanatı dolğun bir bəyanat idi. İran ilk dəfə idi ki, Dağlıq Qarabağ probleminin Azərbaycanın ərazi bütövlüyü prinsipləri çərçivəsində həllinin mümkün olduğunu bəyan etdi. Təbii ki, qonşu ölkənin bu mövqeyini obyektiv sayırıq. Dağlıq Qarabağda "prezident üsul-idarəli respublika"ya keçməklə hakimiyyəti bir əldə cəmləşdirmək istəyirlər.
Qondarma Dağlıq Qarabağ "ordusu"nun 2 minə yaxın şəxsi heyəti var. Separatçı rejimin əsgərləri ilə yanaşı, 20 minə qədər Ermənistan əsgəri də Qarabağ ərazisindədir. Ermənistan ordusuna da əmr verə bilmək üçün qondarma Dağlıq Qarabağ "prezidenti"nə səlahiyyət vermək istəyirlər. Bu onu göstərir ki, ermənilər müharibəyə hazırlaşır.
"Referendum"da separatçı rejim Dağlıq Qarabağın adını da dəyişir. Bəlli olur ki, Dağlıq Qarabağ adı ilə separatçı rejimin müstəqilliyini tanıda bilmədilər. Ona görə Dağlıq Qarabağın adını dəyişib Artsax qoyurlar ki, bəlkə bu yolla beynəlxalq ictimaiyyəti aldada bilsinlər.
Ermənilərin 20 dövlətdə normal səfirlikləri var. Onların da 4-5-i çox güclüdür. Yerdə qalan dövlətlərdəki səfirliklərin heyəti 3-4 nəfərdən ibarətdir. Belə diplomatiya vasitəsilə ermənilərin Artsax adı altında Dağlıq Qarabağı tanıtdırması da mümkün deyil".
Məhəmmədəli QƏRİBLİ