"Bunun üçün əllərində kifayət qədər yetərli mexanizmlər var"
ATƏT-in Minsk Qrupunun həmsədr ölkələri olan Rusiya, ABŞ və Fransa BMT Təhlükəsizlik Şurasının daimi üzvləri kimi təcavüzkar Ermənistana təzyiq göstərməli, onların iştirakı ilə münaqişənin həllinə dair Təhlükəsizlik Şurası tərəfindən qəbul olunan dörd qətnamə yerinə yetirilməlidir.
Bunu Azərbaycan Prezidenti İlham Əliyev fevralın 18-də Münhen Təhlükəsizlik Konfransı çərçivəsində Avrasiyada əməkdaşlıq və problemlər məsələlərinə həsr olunan panel-müzakirədə Rusiyanın Dağlıq Qarabağ münaqişəsinin həllindəki fəaliyyəti ilə bağlı suala cavabında deyib.
"Ermənistan təkcə Dağlıq Qarabağı yox, həmçinin erməni əhalisinin heç vaxt yaşamadığı ətraf yeddi rayonu da işğal edib", - deyən dövlət başçısı qondarma Dağlıq Qarabağ rejiminin keçirəcəyi "referendum"un tamamilə qanunsuz olduğunu və dünyanın heç bir ölkəsi tərəfindən tanınmadığını bildirib. Rusiya, ABŞ, Fransa və Avropa İttifaqının artıq Dağlıq Qarabağı müstəqil bir subyekt kimi tanımadığını və bu "referendum"un nəticələrini tanımayacağını bildirən bəyanatlar verdiyini diqqətə çatdırıb.
Azərbaycanın beynəlxalq qurum və təşkilatlarla əlaqələrinə toxunan Prezident İlham Əliyev ölkəmizin Avropa Komissiyasına təklif etdiyi layihə əsasında danışıqlara başlandığını və bu razılaşmanın tezliklə tamamlanacağına ümidvar olduğunu bildirib. Bununla yanaşı, dövlət başçısı Avropa İttifaqına üzv ölkələrin doqquzu ilə Azərbaycan arasında strateji tərəfdaşlığa dair sazişlərin imzalandığını vurğulayıb.
"Avropanın Dağlıq Qarabağ münaqişəsinin nizamlanmasında rolu ilə bağlı gözləntiləriniz nədir?" sualına cavabında Prezident İlham Əliyev bildirib ki, Dağlıq Qarabağda baş verənlərlə bağlı Ermənistana sanksiyalar tətbiq olunmayıb və bu ikili yanaşma aradan qaldırılmalıdır. Dövlət başçısı səylərin birləşdiriləcəyi və təcavüzkar Ermənistana torpaqları boşaltmaqla bağlı təzyiq göstəriləcəyi təqdirdə münaqişənin tezliklə həll olunacağına ümid etdiyini diqqətə çatdırıb.
Prezidentin bu çağırışından sonra həmsədrlər Ermənistana hansı formada təzyiq göstərə bilər?
Ekspert Elşən Mustafayevin sözlərinə görə, ATƏT-in Minsk Qrupu həmsədrlərinin Dağlıq Qarabağ probleminin həlli məsələsində nümayiş etdirdiyi passivlik, bir sıra hallarda isə ermənilərin maraqlarına xidmət edən açıqlamaların verilməsi Azərbaycan cəmiyyətində haqlı narazılığa səbəb olur: "Narazılıqla yanaşı, həmin təsisat öz üzərinə düşən missiya çərçivəsində hər hansı bir yeniliyə də imza ata bilməyib. Aydın olur ki, həmsədr ölkələr Qarabağ məsələsini həll etmək niyyətində deyil, əksinə, mövcud vəziyyəti qoruyub saxlamaq üçün bütün gücləri ilə çalışırlar. Prezident təzyiqin kimə göstərilməli olduğu ilə bağlı ünvanı düz göstərib. Ermənistanın Azərbaycanın ərazilərini, o cümlədən Dağlıq Qarabağı işğal etməsini nəzərə alsaq, onda təzyiq Azərbaycana yox, Ermənistana edilməlidir. Ancaq bu münaqişəni beynəlxalq hüquq normalarına uyğun tənzimləmək fikrində olduqlarını bəyan edən həmsədrlərdən biz analoji addımları görmürük. Status-kvo-nun qorunması məqsədilə onlar tez-tez "münaqişəni müharibə yolu ilə qətiyyən həll etmək olmaz" şəklində bəyanatlar verməklə, ermənilərə Azərbaycandan qorxmamaq işarəsini verirlər. Məlumdur ki, Minsk Qrupunun bu üç həmsədr dövləti Qarabağ münaqişəsini beynəlxalq hüquq çərçivəsində sülh yolu ilə həll etməyə yardım etmək missiyasını üzərlərinə götürüb. Ermənistan qeyri-konstruktivlik ortaya qoyursa, mütləq təzyiq vasitələrinə əl atılmalıdır. Onun hansı formada olacağını isə həmin ölkələr bizdən yaxşı bilir. Bunun üçün əllərində kifayət qətər yetərli mexanizmlər var".
Məhəmmədəli QƏRİBLİ