Beynəlxalq institut Azərbaycanın Ermənistandan 20 qat hərbi üstünlüyünü rəsmi təsdiqlədi...
Dağlıq Qarabağ münaqişəsinin dinc yolla həlli imkanlarının Ermənistanın mövqeyi üzündən gedərək tükənməsi fonunda məsələnin hərb müstəvisində çözülmə ehtimalı sürətlə artır. Bu fonda Azərbaycan Ermənistan üzərində hərbi üstünlüyünü davamlı şəkildə artırır.
İndi Azərbaycan Ermənistanla müqayisədə daha çox gücə malikdir və bu səpkidə imkanlarını genişləndirir. Bunu Stokholm Beynəlxalq Sülh Problemlərinin Araşdırılması İnstitutu (SİPRİ) da təsdiq edir. Qurumun son hesabatında deyilir ki, 2012-2016-cı illərdə silah ticarəti sahəsində dinamik inkişaf qeydə alınıb. Hesabatda bildirilir ki, satılan silahların 74%-i ABŞ, Rusiya, Çin, Fransa və Almaniyanın payına düşür. 2007-2011-ci illərlə müqayisədə hesabat dövründə silah ticarətinin həcmi 8.4% artıb. Bildirilir ki, qeyd olunan dövrdə 50 ölkə Rusiyadan hərbi texnika alıb. Rusiyanın satdığı silah və texnikanın 4 faizini Azərbaycan alıb. Hesabatda qeyd olunur ki, 2012-2016 illərdə Azərbaycan Ermənistandan 20 dəfə çox silah alıb. Xatırladaq ki, bundan əvvəlki hesabatında qurum Azərbaycanın Avropanın ən böyük silah idxalçısı olduğunu diqqətə çatdırırdı. Belə ki, 2011-2015-ci illərdə Azərbaycanın silah tədarükü 217% artıb. İndi isə bildirilir ki, 2012-2016-cı illərdə Azərbaycan Ermənistandan 20 dəfə çox silah alıb. Ölkəmizin silah aldığı əsas ölkə isə Rusiyadır. Xatırladaq ki, ötən ay Prezident İlham Əliyev Davosda keçirilən Beynəlxalq İqtisadi Forum çərçivəsində RİA "Novosti"yə müsahibəsində bu xüsusda maraqlı fikirlər səsləndirmişdi. Rusiyanın hərbi sənayesinin yüksək səviyyədə inkişaf etdiyini bildirən dövlət başçısı qeyd edirdi: "Biz xüsusilə ən müasir müdafiə silahları ilə maraqlanırıq. Bunlara helikopterlər, müdafiə sistemləri-bütün kompleks daxildir. Bu daimi prosesdir". Azərbaycan Prezidenti bildirib ki, Rusiya ilə Azərbaycan arasında müdafiə sahəsində yeni müqavilələrin imzalanması üçün yaxşı perspektivlər var: "Rəqəmlər elan olunub. 5 milyard dollarlıq müqavilələr imzalanıb. Onların əksəriyyəti artıq reallaşıb".
Özü də maraqlıdır ki, Azərbaycan məhz Rusiyadan Ermənistanla müqayisədə daha müasir silahlar alır. Belə vəziyyət isə Azərbaycanın ermənilər üzərində hərbi üstünlüyünü daha da artırır. İndinin özündə də Azərbaycan Rusiya ilə hərbi-texniki sahədə əməkdaşlığın inkişafında maraqlıdır. Rusiya Azərbaycanın hərbi-texniki sahəsində əməkdaşlığın ümumi həcminə görə ölkələr arasında birinci yerdədir. Azərbaycan son vaxtlar Rusiyadan T-90 tankları, ağır odsaçan sistemlər, özüyeriyən artilleriya sistemi olan "Msta", zərbə helikopterləri Mi-35M, BMP-3 piyada döyüş maşınları, BTR-82 zirehli maşınları və digər texnika alıb. O da məlumdur ki, Azərbaycan Rusiyanın "MS-21? təyyarələri ilə maraqlanır və 2017-ci ildə 10 belə təyyarənin alınması üçün müqavilə imzalanması gözlənir. Azərbaycanla digər layihə "Ruslan", "An-124? təyyarələrinin alınması ilə bağlıdır və bu da tezliklə gerçəkləşəcək. Rusiyadan digər müasir aviasiya texnikasının alınması da gözlənir. Bu istiqamətdə "SU-30SM" qırıcılarının alınması daha çox mümkün sayılır. Ölkəmiz, Rusiya ilə yanaşı, İsrialdən də müasir silahlar alır. İndiyədək Azərbaycan və İsrail şirkətləri tərəfindən müdafiə avadanlığının alınması ilə bağlı imzalanmış müqavilələrin dəyəri 5 milyard dollara yaxındır. Türkiyə də Azərbaycana müasir silahlar satır və bu sıraya artıq Paksitan da qoşulmaq istəyir. Pakistanın müdafiə sənayesi naziri Rana Tanver Hüseyn bildirir: "Pakistan Azərbaycanla müdafiə sənayesi sektorunda əməkdaşlığı genişləndirməkdə və birgə layihələr həyata keçirməkdə maraqlıdır". Nazir qeyd edib ki, Pakistanın müdafiə sənayesi sahəsində böyük təcrübəsi var və Azərbaycanla bu istiqamətdə yaxşı əlaqələri mövcuddur: "Azərbaycan Prezidentinin Pakistana səfəri bu əlaqələri daha da dərinləşdirəcək. Biz Azərbaycanı qardaş olaraq görürük və ona görə əməkdaşlığı dərinləşdirməyə çalışırıq. Biz Azərbaycanla geniş spektrdə - kiçikçaplı silah və sursat istehsalından təyyarə istehsalına qədər əməkdaşlıq etməyi hədəfləyirik. Qardaş Azərbaycanla birgə müəssisələrin yaradılmasına və texnologiya transferinə hazırıq", - deyə nazir qeyd edib. O əlavə edib ki, "JF-17 Thunder" döyüş və "Super Mushshak" təlim təyyarələrinin Azərbaycana satışında heç bir problem yoxdur: "Biz "Super Mushshak" təyyarəsinin Azərbaycana çatdırılmasına hazırıq". Bütün bunlar isə Azərbaycanın Ermənistan üzərində hərbi üstünlüyünü daha da artırır.
Tahir TAĞIYEV
