Vəfa Heydərli: "Təbii ki, bu amil erməni lobbisini daha da qıcıqlandıracaq və nəticədə onların ABŞ rəhbərliyilə münasibətləri pisləşəcək"
Rusiya Silahlı Qüvvələrinin Baş Qərargah rəisi Valeri Gerasimovla ABŞ-ın Birləşmiş Qərargah Rəisləri Komitəsinin sədri, general Cozef Danfordun Bakı görüşü dünya mediasının əsas mövzularından biridir. Hərbçilərin görüşü müxtəlif aspektlərdən şərh olunsa da, Rusiya Müdafiə Nazirliyi bu təmas barədə açıqlama yayıb.
Nazirlikdən bildirilib ki, tərəflər Rusiya-ABŞ münasibətlərinin hazırkı vəziyyətini, Avropa, Yaxın Şərq, Şimali Afrika və digər regionlarda beynəlxalq təhlükəsizliklə bağlı məsələləri müzakirə ediblər: "Söhbət zamanı hərbi fəaliyyətin təhlükəsizliyinin artırılması ilə bağlı birgə işin, habelə gərginlik və insident risqlərinin azaldılmasının istiqamətləri müəyyən edilib".
Dünya mediasında həm də görüşün niyə məhz Bakıda təşkil olunduğu haqda detallar müzakirə edilir. Hər halda, görüşün Bakıda keçirilməsinə ABŞ-ın razılıq verməsi erməni lobbisini qıcıqlandıran amil kimi nəzərdən keçirilir. Belə məntiqi nəticəyə gəlmək olarmı ki, ABŞ-ın yeni administrasiyası erməni lobbisinin rəyini ümumiyyətlə nəzərə almayacaq?
Politoloq Vəfa Heydərli qəzetimizə bildirdi ki, qərargah rəhbərlərinin görüşünün məhz Bakıda keçirilməsi böyük rezonans doğurub: "İddialara görə, Rusiya görüşün başqa ölkələrdə keçirilməsini istəyib. Sonradan ABŞ həmin təklifləri qəbul etməyib. Yekun nəticədə tərəflər Bakını seçməli olublar. İstənilən halda, bu, Ermənistan üçün böyük zərbədir. Çünki bununla dünyanın iki superdövləti Azərbaycana hansı önəmi verdiklərini ortaya qoydular. ABŞ-da erməni lobbisi güclü təsir imkanlarına malik olub. Bu səbəbdən də istənilən məsələdə onların rəyini nəzərə alırdılar. Maksimum dərəcədə onları qızışdırmamağa çalışırdılar. ABŞ-ın yeni administrasiyasının son addımı göstərdi ki, artıq belə detallara fikir verilmir. Yəqin ki, bu, son prezident seçkilərində erməni lobbisinin yanlış stavkasının nəticəsidir. Onlar nəin ki, Trampı dəstəkləmədi, əksinə, ona qarşı həyata keçirilən qara piara rəhbərlik etdilər. Təbii ki, bu amil erməni lobbisini daha da qıcıqlandıracaq və nəticədə onların ABŞ rəhbərliyilə münasibətləri pisləşəcək.
Bununla həm də sübut olundu ki, Azərbaycan islam ölkələri içərisində ən təhlükəsiz, ən sabit münasibətlərin mövcud olduğu ölkə kimi digərlərini üstələyir. Azərbaycanı bu keyfiyyətlərinə, beynəlxalq münasibətlərdə oynadığı dinamik rola görə seçiblər. Azərbaycanın Rusiya və ABŞ-la münasibətləri yüksək səviyyədə olduğuna görə görüş yeri kimi Bakı seçilib".
Məhəmmədəli QƏRİBLİ