"Bu yaxınlarda təsdiqlənmiş məlumat yayıldı ki, həmin nəzarətsiz ərazilərdən Ermənistan İrana spirtli içkilər keçirir"
İran Xarici İşlər Nazirliyinin sözçüsü Bəhram Qasimi keçirdiyi mətbuat konfransında Ermənistan müdafiə nazirinin İrana səfərini şərh edərkən maraqlı açıqlama verib: "İran və Ermənistan arasında yaxşı əlaqələr mövcuddur. Bu, tarixi əlaqələrdir və yeni deyil. Bu ölkə digərləri ilə müqayisədə bizim üçün daha az problem yaradan qonşu ölkə olub".
B.Qasimi bildirib ki, İran həmişə qonşu ölkələrlə dostluq münasibətlərinə çalışır: "Qafqaz bölgəsi qədim zamanlardan çox həssas və önəmli bir bölgədir. Siyasi əlaqələrdən başqa, tarixi və mədəni oxşarlıqlar bizi region ölkələri ilə müzakirələr aparmağa məcbur edir. Bu səfər İran və Ermənistan prezidentlərinin qarşılıqlı səfərlərindəki razılıqlar əsasında baş tutub. Biz ikitərəfli iqtisadi, siyasi, mədəni və regional məsələləri, eləcə də Suriya məsələsini müzakirə etmişik. Ermənistan rəsmilərinin çoxu Hələbdə doğulub. Bizim Ermənistanla münasibətlərimiz digər ölkənin əleyhinə yönəlməyib".
Göründüyü kimi, İran rəsmisi ölkəsinin Ermənistanla qonşuluğundan böyük məmnunluğunu ifadə edir. İranlı diplomat bildirir ki, Ermənistan onlar üçün daha az problem yaradan ölkədir. Deməli belə çıxır ki, burada müqayisə aparılıb. Çünki daha az deməklə diplomat digər qonşulara nisbətdə bu qərara gəldiyini ifadə etmiş olub. Ancaq İranın ətrafındakı ölkələrin bəzilərində qaynar proseslərin getdiyini, hətta bəzilərində müharibənin yaşandığını əsas gətirsək, həmin ölkə rəsmisinin Ermənistandan "sakit" ölkə kimi bu dərəcədə məmnunluq ifadə etməsi qəribə görünür. İran rəsmisinin bu açıqlamasından hansı nəticəyə gəlmək olar?
Milli İstiqlal Partiyasının beynəlxalq məsələlər üzrə katibi Elşən Mustafayev qəzetimizə açıqlamasında bildirdi ki, diplomatın bu cür təqdimatı səmimiyyətdən xəbər vermir:
"Bu ifadəni kiçik ranqlı biri işlətsəydi, fikir verməmək də olardı. Ancaq İranın xarici siyasətini yürüdən bir qurumun sözçüsünün belə fikri ifadə etməsi müzakirə üçün yer qoyur. İran ərazi baxımından böyük ölkədir. Təbii ki, belə ölkənin çoxlu sayda qonşusu olmalıdır. Gəlin İranın bəzi qonşularındakı vəziyyəti müqayisə edək. Belə nəticəyə gələrik ki, İraq və bəzi qaynar nöqtələri istisna etməklə, onun digər qonşuları ilə münasibətləri doğrudan da normaldır. Rusiya, Türkiyə, Azərbaycan, Xəzər vasitəsilə qonşu olduğu Orta Asiya ölkələrilə münasibətlər yaxın və mehriban qonşuluq münasibətlərinə əsaslanır. Gəlin Ermənistanı müqayisə edək. Ola bilər ki, həmin ölkənin bəzi hərəkətləri, İrana yönəlik davranışı Tehranın ürəyincədir. Amma mən hesab edirəm ki, Ermənistan İranın qonşularının içində ən problemlisidir. Çünki həmin ölkə qonşu müsəlman ölkəsinin 20 faiz torpağını işğal edib. Bu, İran üçün daha ciddi problem sayılmalıdır. İşğal olunmuş torpaqların bəzi hissəsi məhz Azərbaycan-İran sərhədini əhatə edir və faktiki olaraq biz ora nəzarət edə bilmirik. Bundan böyük problem ola bilər? Bu yaxınlarda təsdiqlənmiş məlumat yayıldı ki, həmin nəzarətsiz ərazilərdən Ermənistan İrana spirtli içkilər keçirir. Bir islam ölkəsi üçün bu, problem deyilsə, bəs nədir?"
Məhəmmədəli QƏRİBLİ