Ramiz Tağıyev: "ABŞ kəşfiyyatına istinadən açıqlanan məlumatlar bizim indiyə qədər sahib olduğumuz məlumatları rəsmən təsdiqlədi"
ABŞ Mərkəzi Kəşfiyyat İdarəsi tərəfindən ictimaiyyətə açılan sənədlərdə terror təşkilatı PKK və erməni terror təşkilatı ASALA-nın 1980-ci illərdən ittifaq içində olduğu, birlikdə hücumlar həyata keçirdikləri və PKK-nın tərkibində ermənilərin də olduğu haqda məlumatlar yer alıb.
MKİ tərəfindən məxfiliyi qaldırılaraq dünya ictimaiyyətinin tanış olmasına icazə verilən sənədlərdə PKK və ASALA-nın adları birlikdə çəkilir. İki terror təşkilatı arasındakı əlaqənin 1980-ci illərdən etibarən MKİ-nin kəşfiyyat sənədlərində və terrorizm haqqında hesabatlarında əks olunduğu üzə çıxıb.
Bu sənədlər arasında diqqətçəkənlərdən biri 1984-cü ilin yanvar ayında hazırlanmış "Erməni Gizli Ordusu" adlı hesabatdır. Hesabatda ASALA haqqında MKİ-nin verdiyi ətraflı məlumatlar yer alıb və terror təşkilatının quruluşu ilə bağlı təhlillər aparılıb.
Hesabatın "Təşkilatın dəyişən taktikaları və təşkilatçılığı" başlıqlı hissəsində PKK və ASALA arasındakı əlaqə haqqında məlumat verilib. Bu hissədə ASALA-nın PKK ilə ittifaq qurduğu və 1980-ci ilin noyabrında PKK ilə birlikdə Fransanın Strasburq şəhərindəki türk konsulluğuna hücum təşkil etdiyi bildirilir.
26 avqust 1985-ci il tarixli sənəddə isə PKK ilə ermənilərin əlaqəsi haqqında söhbət açılır.
"1984-cü ilin yayında PKK öz adamlarından, digər kürd və solçu qruplardan və bəzi erməni militanlardan ibarət olan HRK adlı bir təşkilat qurub" - deyə hesabatda bildirilir.
Həmin sənəddə PKK-nın quruculuq və terror aktları həyata keçirmə məsələsində erməni terror təşkilatlarını özünə model olaraq seçdiyi qeyd olunur.
Bu iki terror təşkilatını birləşdirən ortaq maraqlar nədən ibarət ola bilər?
Siyasətçi Ramiz Tağıyev qəzetimizə bildirdi ki, belə faktlar mövcud olub və hamının bu barədə bilgisi var: "ABŞ kəşfiyyatına istinadən açıqlanan məlumatlar bizim indiyə qədər sahib olduğumuz məlumatları rəsmən təsdiqlədi. Erməni terror təşkilatları xarici dünyanın təzyiqləri üzündən 1980-ci illərdə taktikanı dəyişmək qərarına gəldilər. Bu, əslində, taktikanın dəyişilməsi ilə strategiyanın qurulması və inkişafı demək idi. 1984-cü ildə cərəyan edən Eruh və Şəmdinli basqınları ilə PKK səhnəyə çıxmış və ASALA terroru geri plana çəkilib. Ermənilərlə PKK arasındakı bağlantını sübut edən bəzi nümunələri diqqətinizə çatdırmaq istərdim:
PKK terror təşkilatı 1980-ci ildə 21-28 aprelarası tarixlərini "Qızıl həftə", 24 aprel tarixini "erməni soyqırımı günü" elan etmiş, anım mərasimləri keçirmiş və bu mövzu barədə toplantılar təşkil etməyə başlayıb. 8 aprel 1980-ci ildə Livanın Sidon şəhərində PKK və ASALA terror təşkilatları ortaq mətbuat konfransı düzənləmiş və qətnamə yayıb. Ancaq bu qətnamənin ictimaiyyətdə mənfi qarşılanmaması üçün əlaqələrin leqal deyil, gizli olaraq davam etdirilməsi qərara alınıb. 1980-ci ildə Türkiyənin Strasburqdakı Baş Konsulluğuna və Roma Türk Hava Yolları Bürosuna qarşı həyata keçirilən hücumlar, terror aktları PKK və ASALA tərəfindən birgə həyata keçirilib. PKK-nın ideoloqlarından və dəstəkçilərindən olan Abdulla Öcalan erməni yazarlar birliyi tərəfindən "Böyük Ermənistan ideyasına xidmətlərindən ötrü" "qürur üzvləri" arasına seçilib. Erməni terror təşkilatlarının "Kürdüstan" adlı komitəsi də fəaliyyət göstərir. 4 iyun 1993-cü ildə erməni Hnçak Partiyası, ASALA və PKK terror təşkilatları mənsubları Beyrutda birgə toplantılar keçirib.
Erməni-PKK əlaqələri ilə bağlı daha bir maraqlı məqam isə 1993-cü il yanvarın 6-da Beyrutdakı iki ayrı kilsədə düzənlənən və Livan Ortodoks Baş Yepiskopluğu, Ermənistanın müxtəlif partiya nümayəndələrinin iştirak etdiyi mərasimdir. Bütün bu faktlar bir daha sübut edir ki, sözügedən iki terror təşkilatı bu gün də birgə əməkdaşlıq edir".
Məhəmmədəli QƏRİBLİ