Aqşin Əliyev: "Ermənistan hakimiyyəti iqtisadi və siyasi sahədə dərin tənəzzülü belə yalanlarla kompensasiya etmək istəyir"
Ermənistan işğalçı siyasətinin əsas sütunlarından biri də Azərbaycana qarşı informasiya müharibəsidir. İnternet indi Azərbaycanla Ermənistan arasında həm də getdikcə daha qızğın savaş meydanına çevrilir ki, bunun "atəşkəsi" isə ümumiyyətlə mümkün deyil. İnformasiya müharibəsi insanların şüuru uğrunda savaşdır, burada silah yox, qələm söz sahibidir. Düzgün qurulub aparılan informasiya müharibəsi ilə hərbi qələbəni məğlubiyyətə və ya əksinə, hərbi məğlubiyyəti qələbəyə çevirmək olar.
Ölkəmiz müstəqillikdən üzü bəri savaşın düz ortasındadır, Azərbaycana qarşı xüsusilə müxtəlif cəbhələrdən aktiv informasiya müharibəsi gedir. Bunlardan ən aktivi Ermənistan cəbhəsidir.
Son aylar cəbhədə uğursuzluqla üzləşən Ermənistan rəhbərliyi ölkəmizə qarşı informasiya savaşını yenə də genişləndirib.
Xüsusilə də güya hansısa hərbçimizin girov düşdüyü və itki verdiyimiz barədə Ermənistan KİV-ində yayılan məlumatlar təsdiqini tapmır. Son vaxtlar Ermənistanın belə üsullardan daha intensiv istifadə etməsi nə ilə bağlıdır?
Ekspert Aqşin Əliyev qəzetimizə bildirdi ki, bu, müharibənin tələblərindən irəli gəlir: "Bilirsiniz ki, müharibə şəraitində olan ölkələr yalnız səngərdə deyil, həm də informasiya sahəsində döyüş aparır. Amma bu məsələdə də müəyyən kriteriyalar qorunub saxlanmalıdır. Xüsusilə də KİV-lər bu işdə həm də bir jurnalist məsuliyyəti daşımalıdır. Çünki hazırda oxucuya yalan məlumat vermək çətin məsələdir. İnternet bunları mümkünsüz edir. Ermənistan tərəfi bizim saytları, biz isə onların KİV-ni izləyə bilirik. Hansısa ağ yalan həmin anda ifşa olunur. Məsələn, Ermənistan yalan informasiya verir ki, hansısa üstünlüyü əldə edib. Həmin dəqiqə bizim resurslar faktlarla onu ifşa edirsə, deməli, "yalan ayaq tutur, amma yerimir". Son vaxtlar belə halların intensivləşməsi Ermənistanın daxilindəki gərginliklə əlaqəlidir. Ermənistan hakimiyyəti iqtisadi və siyasi sahədə dərin tənəzzülü belə yalanlarla kompensasiya etmək istəyir".
Məhəmmədəli QƏRİBLİ