Xəzər Teyyublu: "Çünki ABŞ-lı diplomat bu suala başqa cür cavab verə də bilməzdi"
Erməni jurnalistlər İrəvanda səfərdə olan ATƏT-in Minsk qrupunun yeni amerikalı həmsədri Riçard Hoqlanda təxribat xarakterli sual ünvanlayıb. Onlar Azərbaycanın işğal altında olan Dağlıq Qarabağ bölgəsini demokratik institutları və seçki mexanizmi olan "müstəqil dövlət" kimi təqdim ediblər.
Hoqland isə cavabında bildirib: "Birləşmiş Ştatlar Dağlıq Qarabağı tanımır. Onu, Ermənistan da daxil olmaqla heç bir ölkə de-fakto tanımır".
Amerikalı həmsədr bildirib ki, ATƏT-in Minsk qrupu atəşkəs rejiminə əməl etmək, Vyana və Sankt-Peterburqda əldə olunan razılaşmaların tam şəkildə həyata keçirilməsi daxil olmaqla bir sıra vacib məsələlərin müzakirəsi məqsədilə tezliklə prezidentlər və xarici işlər nazirləri arasında görüşün təşkil olunması üzrə işləri davam etdirir.
ATƏT-in ABŞ-dan olan yeni sədrinin bu bu mövqeyini necə qiymətləndirmək olar?
Klassik Xalq Cəbhəsi Partiyasının sədr müavini Xəzər Teyyublu qəzetimizə açıqlamasında bildirdi ki, ABŞ-lı diplomatdan başqa cavab gözləməyə dəyməzdi: "Çünki ermənilərin faktiki olaraq işğal etdiyi torpaqlarda yaratdıqları qondarma qurumu dünyanın heç bir ölkəsi tanımayıb. Hətta Ermənistanın özünün tanımadığı bir qurumun müstəqilliyi barədə nizamlanma missiyasının nümayəndəsinə verilən bu tip sualın bir adı var, o da təxribatdır. Çünki ABŞ-lı diplomat bu suala başqa cür cavab verə də bilməzdi. Ermənilərin qondarma qurumla bağlı bir məqsədləri var. Status-kvo olduğu kimi qalsın, münaqişənin həlli uzadılsın və bu dövr ərzində müxtəlif növ təbliğat vasitələrilə qondarma qurumun adı gündəmdə qalsın. Onların həmin ərazidə keçirdikləri seçkilərin legetimliyini də heç kim tanımır. Ancaq görürsünüz ki, mütəmadi şəkildə belə seçkiləri keçirirlər. Belə addımlar, hansısa mətbuat konfransında yönəldici sualların verilməsi sırf piara hesablanır. Bunun başqa adı ola da bilməz. Yəni ABŞ-lı diplomat elə bir fövqəladə iş görməyib, reallığa uyğun doğru cavab verib".
Məhəmmədəli QƏRİBLİ