"Bu niyətlərini gizlətmirlərsə, hər an bərpa olunmuş kəndə həmlə oluna bilər"
Azərbaycanın xarici işlər naziri Elmar Məmmədyarov Moskva görüşünün yekunları ilə bağlı keçirdiyi mətbuat konfransında bir sıra maraqlı açıqlamalar verib.
"Bəzi təkliflər var ki, Rusiya tərəfinin iştirakı ilə Azərbaycan və Ermənistan xarici işlər nazirlərinin görüşü keçirilsin. Təəssüf ki, hələ alınmayıb" - deyə nazir bildirib.
O bildirib ki, bu təkliflə Rusiya tərəfi çıxış edib: "Azərbaycan buna razıdır. Amma bu görüş nəticəli olmalıdır".
Nazir bildirib ki, fevralın 17-19-da Münhendə keçiriləcək Münhen Təhlükəsizlik Konfransında ATƏT-in Minsk qrupunun həmsədrləri ilə görüşü planlaşdırılır. "Görüş fevralın 17-19-da olmalıdır. Mən bu görüşə razılıq vermişəm", - deyə o, söyləyib.
Qeyd edək ki, yanvarın 24-də E.Məmmədyarov Rusiya tərəfinin təşəbbüsü əsasında Moskvaya işgüzar səfəri çərçivəsində RF xarici işlər naziri Sergey Lavrovla görüşüb. Görüşdə Ermənistan-Azərbaycan, Dağlıq Qarabağ münaqişəsinin həlli məsələləri ətraflı müzakirə olunub. Prezidentlərin Vyana və Sankt-Peterburq görüşlərində qaldırılan məsələlər üzrə geniş fikir mübadiləsi aparılıb.
Məmmədyarov Cəbrayıl rayonunun Cocuq Mərcanlı kəndinin bərpasına beynəlxalq təşkilatların cəlb olunması məsələsinə də münasibət bildirib. Məmmədyarov deyib ki, Azərbaycan erməni işğalından azad edilmiş ərazilərin bərpası üçün beynəlxalq təşkilatlarla danışıqlar aparır. Nazir bildirib ki, bu, sadə proses deyil. Təhlükəsizliklə, texniki məsələlərlə bağlı bir sıra suallar qalır: "Bütün təklifləri hazırlamaq, beynəlxalq təşkilatların bu prosesə hansı formada cəlb olunması məsələsini düşünmək lazımdır".
E.Məmmədyarov əlavə edib ki, ilk növbədə, ərazilərin bərpası prosesini Azərbaycan hökuməti öz üzərinə götürəcək, ikinci mərhələdə isə bu prosesə beynəlxalq təşkilatlar cəlb oluna bilər.
Beynəlxalq təşkilatlar Cocuq Mərcanlının bərpasına hansı formada cəlb oluna bilərlər?
Ekspert Elşən Həsənov qəzetimizə açıqlamasında bildirdi ki, bu məsələdə beynəlxalq təşkilatların rolu mütləq olmalıdır: "Məsələnin maliyyə və texniki tərəflərini Azərbaycan öz üzərinə götürür. Buna bizim gücümüz çatır. Ancaq beynəlxalq qurumların prosesdə yaxından iştirakı vacibdir. Birinci təklif Prezidentdən gəlib. Yəni beynəlxalq təşkilatlar dəvət olunsun ki, ermənilərin vandal əməllərilə əyani tanış olsunlar. Elmar Məmmədyarovun irəli sürdüyü tezis isə həmin kəndin təhlükəsizliyinə veriləcək zəmanətlə bağlıdır. Yadınızdadırsa, aprel döyüşlərindən sonra ermənilər bildirdi ki, onlar işğaldan azad edilən ərazilərin geri qaytarılmasına çalışacaqlar. Bu niyətlərini gizlətmirlərsə, hər an bərpa olunmuş kəndə həmlə oluna bilər. Bura beynəlxalq qurumların mütəmadi monitorinqlərinin aparılması mexanizmi də əlavə olunmalıdır".
Məhəmmədəli QƏRİBLİ