Vüqar Qədirov: "Onlar düşünürdü ki, münaqişənin həlli uzandıqca yeni nəsil yetişəcək və onlar Dağlıq Qarabağ problemini tamamilə unudacaq. Aprel döyüşləri tamamilə əksini sübut etdi"
"Bunun başqa bir səbəbi isə aparılan təbliğatla bağlıdır"
Dağlıq Qarabağ münaqişəsinin həllinin uzanması konfliktin hərb müstəvisində çözülmə ehtimalını da getdikcə artırır. Artıq əksər ekspertlərin fikri bir məsələdə daha çox uzlaşır ki, tezliklə konfliktin çözümü yönündə əməli addımlar atılmasa, müharibə qaçılmaz olacaq.
Bunu ABŞ-ın "Foreign Policy Research İnstitute" analitik mərkəzinin Cənubi Qafqazla bağlı məqaləsində yer alan fikirlər də təsdiq edir. Burada qeyd olunur ki, cari il ərzində hərbi toqquşmalar risqi kifayət qədər yüksəlib: "Dağlıq Qarabağ münaqişəsinin bir çox ağrılı səbəbi var. Cənubi Qafqaz sakinləri ötən il hesab edirdilər ki, 2017-ci ildə bu münaqişə ətrafında gərginlik olmayacaq, bölgədə ümumilikdə hər şey müsbət yöndə cərəyan edəcək. Lakin pozitiv danışmaq bir qədər çətindir".
Britaniyalı ekspertlər yazır ki, Azərbaycan 2016-cı ilin aprelində müəyyən ərazilərini geri qaytara bilib, bunun psixoloji təsiri qat-qat böyük olub: "Azərbaycanda aprel hadisələrindən sonra vətənpərvərlik hissləri, münaqişənin hərbi yolla həllinə ümidlər artıb". "WIN Gallup İnternational" tərəfindən dünyanın 64 ölkəsində aparılan qlobal sorğu zamanı məlum olub ki, Azərbaycan vətəndaşlarının 85 faizi öz vətəni uğrunda döyüşməyə hazırdır. Ümumilikdə, respondentlərin 61 faizi ölkəsi uğrunda döyüşməyə hazır olduğunu, 27 faizi isə döyüşməyə hazır olmadığını bildirib. Vətəndaşları uğrunda döyüşməyə hazır olan ölkələr daha çox Yaxın Şərq və Şimali Afrikada (83 faiz), Qərbi Asiyada (82 faiz), ən az isə Qərbi Avropa regionundadır (25 faiz). Sorğunun nəticələrinə görə, azərbaycanlıların 85 faizi vətən uğrunda döyüşməyə hazırdır. Azərbaycanlılar ölkəsi uğrunda döyüşməyə hazır olan xalqlar sırasında 6-cı yerdə qərarlaşıb. Gürcülər 76 faizlik göstərici ilə 9-cu, ermənilər 72 faizlik göstərici ilə 15-ci yerdə qərarlaşıb. Bütün bunlar Azərbaycanın, ermənilərdən fərqli olaraq, müharibəyə tam hazır olduğunu göstərir.
Nüfuzlu qurum tərəfindən aparılan sorğunun nəticəsi barədə yerli ekspertlər nə düşünür?
Qaçqın və Məcburi Köçkün Gəncləri İctimai Birliyinin sədri Vüqar Qədirov qəzetimizə açıqlamasında bildirdi ki, belə əhval-ruhiyyənin olmasını biz gözəl bilirik: "Düşmən təbliğatı isə başqa istiqamətə yönəlib. Onlar düşünürdü ki, münaqişənin həlli uzandıqca yeni nəsil yetişəcək və onlar Dağlıq Qarabağ problemini tamamilə unudacaq. Aprel döyüşləri tamamilə əksini sübut etdi. Birinci Qarabağ müharibəsinin üstündən uzun illər keçsə belə, Azərbaycan əsgərləri daha böyük şücaətlər göstərdi. Bu döyüşlərdə göstərilən qəhrəmanlıq keçmişdəkilərdən də artıq oldu. Hətta münaqişə yarananda anadan olmayan gənclərimiz belə ölümün gözünə dik baxmağı bacardı. Bu baxımdan da azərbaycanlıların torpağı uğrunda vuruşmağa ermənilərə nisbətdə daha meylli olması ilə bağlı beynəlxalq dairələrin açıqladığı rəqəm tam reallığı əks etdirir. Bunun başqa bir səbəbi isə aparılan təbliğatla bağlıdır. Hökumətimiz bu istiqamətdə təbliğatın aparılması üçün QHT-lərə lazım olan vəsaiti ayırır. Biz gənclər arasında bu təbliğatın gücləndirilməsilə bağlı bir neçə layihə icra etmişik. Orduda, demək olar ki, fərariliyə rast gəlinmir. Ermənistanda isə vəziyyət tamamilə fərqlidir. Gənc nəsil onlara lazım olmayan müharibədən can qurtarmaq üçün kütləvi şəkildə ölkəni tərk edir. Bütün bu faktorların həmin hesabatdakı rəqəmlərin alınmasına böyük təsiri olub. Hesab edirəm ki, get-gedə bu nisbət daha da bizim xeyrimizə dəyişəcək".
Məhəmmədəli QƏRİBLİ