"Bununla da erməni vandalizmi bir daha öz əyani təsdiqini tapacaq"
Azərbaycan Prezidenti İlham Əliyev "Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı"nın icrasının üçüncü ilinin yekunlarına həsr olunmuş konfransda deyib ki, son illər məcburi köçkünlər üçün 100-ə yaxın qəsəbə tikilib, 5 milyard manatdan çox vəsait ayrılıb.
Dövlət başçısı bidirib ki, qəsəbələrdə fərdi evlərin tikintisi də həyata keçirilməlidir: "Çünki o qəsəbələrdə artıq infrastruktur var. Tapşırıq verilib ki, bu il yataqxanalardakı məcburi köçkünlərin köçürülməsinə başlansın. Bu il və qarşıdakı illərdə vəsait ayrılacaq ki, yataqxanalardakı məcburi köçkünlərin mənzil şəraiti yaxşılaşdırılsın. Yaxın bir ay ərzində vəsait ayrılacaq".
Dövlət başçısı eyni zamanda qeyd edib ki, artıq Cəbrayıl rayonunun Cocuq Mərcanlı kəndinin bərpasına da başlanıb: "Biz vətəndaşlarımızı işğaldan azad edilmiş kəndlərə qaytarırıq. Kənd sakinləri bunu böyük məmnuniyyətlə qarşılayır. Sakinlər böyük səbrsizliklə Cocuq Mərcanlıya qayıtmağı gözləyirlər. Biz qısa müddətdə bu kəndi yenidən quracağıq. Bunun böyük tarixi əhəmiyyəti var. Cocuq Mərcanlı kəndi bir neçə ay işğal altında olub, Heydər Əliyevin rəhbərliyi altında Horadiz əməliyyatında işğaldan azad edilib.
Ancaq ermənilər bu müddət ərzində kəndi tamamilə dağıdıblar. Mən tapşırmışam ki, beynəlxalq təşkilatların nümayəndələrinin o kəndə səfəri üçün müraciət edilsin, görsünlər ki, özlərini mədəni xalq kimi təqdim edənlər hansı vəhşilikləri törədiblər.
Orada foto, video görüntülər çəkilməli, lazımi işlər görülməlidir ki, bu vəhşiliklər sənədləşdirilsin. O kənddə infrastruktur bərpa olunmalı, tibb məntəqəsi, uşaq bağçası tikilməlidir. İlk mərhələdə 50 ev bərpa olunacaq, gələcəkdə 100 və daha çox ev bərpa ediləcək. Kənddə iş yerləri də açılmalıdır. Biz insanlarımızı doğma torpaqlarına qaytaracağıq".
Ölkə başçısının beynəlxalq təşkilatların nümayəndələrinin Cocuq Mərcanlı kəndinə dəvət olunması ilə bağlı verdiyi göstəriş ermənilərin daha hansı iç üzünü açacaq?
Ekspert Vəfa Heydərli qəzetimizə bildirdi ki, bu olduqca vacib təklifdir: "Çünki uzun illərdi biz bu tezisləri irəli sürürük. Ermənilərin hansı vəhşiliklər törətməsi barədə müxtəlif kanallar vasitəsilə dünya ictimaiyyətini məlumatlandırırıq. Artıq dünyanın bir çox ölkələri Xocalı faciəsi zamanı ermənilərin vəhşilikləri barədə məlumatlıdır. Ancaq proseslər göstərir ki, ermənilərin vəhşilikləri yalnız canlı insanlara qarşı yönəlməyib. Onların vandallığını konkret faktlarla sübut etmək üçün bu olduqca səmərəli təklifdir. Sübut olunur ki, ermənilər ələ keçirdikləri ərazilərdə olan tarixi abidələri, məscidləri, hətta qəbirləri belə dağıdıb. Qəbiristanlıqların təhqir olunmasına da rast gəlinib. Ölkə başçısının dediyi təklif reallaşarsa, beynəlxalq qurumlar bizim dediklərimizin şahidi ola bilər. Artıq hiss olunur ki, Cocuq Mərcanlı ilə bağlı baş verən proses dünyada da böyük marağa səbəb olub. Yəqin ki, biz yaxın zamanlarda beynəlxalq qurumların ora səfərinin şahidi olacağıq. Bununla da erməni vandalizmi bir daha öz əyani təsdiqini tapacaq".
Məhəmmədəli QƏRİBLİ