Aqşin Əliyev: "Düşünürəm ki, bununla bağlı bir ortaq məxrəc tapılacaq"
Məlum olduğu kimi, ABŞ prezidenti Donald Tramp müsəlman ölkələrindən olan miqrantlarla bağlı fərman imzalayıb. Trampın hədəfində Yaxın Şərq ölkələrindən olan müsəlman miqrantlardır. Prezidentin imzaladığı fərmanda İraq, İran, Liviya, Suriya, Sudan, Somali və Yəməndən olan qaçqınların və vizası olan şəxslərin Amerikaya girişinə məhdudiyyətlərin qoyulması nəzərdə tutulub.
Prezident Trampın 7 müsəlman ölkəsinin vətəndaşlarına qarşı tətbiq etdiyi viza qadağasından sonra ABŞ-da kritik proseslər baş verir. Ölkənin, demək olar ki, hər yerində etiraz aksiyalarının başladığı bir vaxtda, içlərində Kaliforniya, Pensilvaniya və Nyu-Yorkun da olduğu 16 ştatın baş prokurorları ABŞ prezidenti Trampın viza qadağasına qarşı ortaq bir bəyanat yayıb. Prokurorlar yaydıqları bəyanatda Trampın bu qərarını pisləyib. ABŞ prezidenti ölkədə xaos yaratmaqda ittiham olunub.
Bu amil İslam Əməkdaşlığı Təşkilatı ilə ABŞ arasındakı münasibətlərə necə təsir edəcək?
Ekspert Aqşin Əliyev qəzetimizə bildirdi ki, prezident Donald Trampın bəzi müsəlman ölkələrinin vətəndaşlarının ABŞ-a girişinin qadağan edilməsinə dair fərmanında dəyişikliklərin edilməsi zərurəti ortaya çıxıb: "Həmin ölkələrdən olan şəxslərin Birləşmiş Ştatlarda yaşamaq hüququ varsa, onlara ABŞ-da yaşamağı qadağan etmək doğru deyil. Eyni zamanda, qərar verilməzdən əvvəl qanuni şəkildə ABŞ-a viza alan şəxslərin təyyarələrdən düşürülməsi də tamamilə qanunaziddir. Tramp konkret ölkələri bu siyahıya salıb. Əsaslandırılması da belə verilir ki, həmin ölkələrdə din pərdəsi altında terror qrupları fəaliyyətdədir. Ancaq bu heç də həmin müsəlman ölkələrinin tamamilə terrora qurşanması anlamına gəlmir. Çünki araşdırmalar göstərir ki, terrordan ən çox əziyyət çəkənlər məhz həmin dövlətlərdir. Tramp ABŞ vətəndaşlarının təhlükəsizliyinin qeydinə qalırsa, bu normaldır. Bunun üçün təhlükəsizlik tədbirlərini gücləndirmək olar. Artıq ABŞ-dakı bəzi dairələr bu qərara etiraz edir. Çox maraqlıdır ki, D.Trampın 7 müsəlman ölkəsinin vətəndaşlarına viza verilməməsi qərarı ilə bağlı siyahıda Səudiyyə Ərəbistanı yoxdur. Halbuki, bu ərəb ölkəsi Vaşinqtonun müttəfiqi olsa da, 2001-ci ilin 11 sentyabrında ABŞ-da terroru planlaşdıran və həyata keçirənlərin 80 faizi Səudiyyə Ərəbistanı vətəndaşı idi. Tramp isə deyir ki, guya son qərarı ilə terrorçuların Amerikaya girişinə mane olacaq. Bir qədər ziddiyyətli məqamlarla zəngin qərar olduğu üçün, təbii ki, İslam Əməkdaşlığı Təşkilatı buna etiraz edəcək. Düşünürəm ki, bununla bağlı bir ortaq məxrəc tapılacaq".
Məhəmmədəli QƏRİBLİ