Ermənistanda parlament seçkiləri yaxınlaşdıqca siyasi aktivliyin də əhəmiyyətli dərəcədə artması müşahidə olunur. hazırda ən çox diqqət cəlb edən məqamlardan biri isə son dövrlərə qədər Serj Sarkisyan hakimiyyətində təmsil olunan, lakin sonradan istefaya göndərilən məmurların birləşərək indiki prezidenti hakimiyyətdən devirmək cəhdləridir. Bu xüsusda Sarkisyan üçün təhlükə yaradan əsas tərəflər Ermənistanın keçmiş baş naziri Ovik Abramyan və sabiq müdafiə naziri Seyran Ohanyandır.
Xatırladaq ki, bu günlərdə Ovik Abramyan hakim Respublika Partiyasından istefa verərək müxalifətə keçib. Buna qədər isə o, Respublika Partiyasının sədr müavini olub. Serj Sarkisyan bunu narazılıqla qarşılayıb və bildirib ki, böyük çaylar bütün həyatı boyu inkişafı təmin edir, həyat, çörək və su verir: "Ondan ayrılan qollar isə bir daha geri dönmür, quruyaraq yoxa çıxır". Ovik Abramyan buna sərt cavab verib və Sarkisyanı zərərli tullantı adlandırıb: "Unutmamalıyıq ki, nə vaxtsa ana çaya qarışan zərərli tullantılar onu tam yararsız hala sala və bütün yatağı ürküdə bilər. Ola bilsin ki, bunadək ondan ayrılan və hələ də torpaq qoxusu verən qollar məhv olanadək heç olmasa bir-iki kəndə həyat verə bilər". Respublika Partiyasının sözçüsü Eduard Şarmazanov deyib ki, Sarkisyan hakim partiyadan ayrılanlara demək istəyir ki, sonları olmayacaq: "Bu xəbərdarlıq yox, reallıqdır. Siyasi əsas və motiv göstərmədən və siyasi proqramı olmadan başqa yolla gedənlərin gələcəyini görmürəm". Şarmazanov hesab edir ki, partiya qarşıdan gələn seçkilərə prezidentin rəhbərliyi altında daha sıx şəkildə gedəcəyindən daha da möhkəmlənəcək. Amma siyasi müşahidəçilər Abramyanın hakim partiyadan gedişini Sarkisyana ciddi zərbə sayır. Çünki Abramyan böyük imkanlara malikdir və onun sabiq məmurlarla birləşməsi Sarkisyan üçün ciddi problemlər yaradacaq. Onun ilk növbədə Sarkisyanın aprel döyüşlərindən sonra hökumətdə yenilik etməsi nəticəsində vəzifəsindən atılan Seyran Ohanyanla birləşməsi gözlənir. Artıq o da məlumdur ki, Seyran Ohanyanla keçmiş xarici işlər naziri Vardan Oskanyan artıq seçkiyə bir neçə siyasi partiya ilə blok şəklində getmək qərarına gəlib. Həmçinin digər müxalifət partiyaları seçkiyə ayrıca blok şəklində gedəcəklərini bəyan ediblər. Bu qüvvələrə Ermənistanın ən varlı adamlarından biri sayılan Haqik Çarukyan da dəstək verməyə hazırlaşır. Artıq Sarkisyan Çarukyanın siyasətə dönməsindən narazılığını bildirib və bunu Eduard Şarmazanov da təsdiq edib: "Prezidentin açıqlamaları göstərir ki, hakimiyyət Çarukyanın siyasətə dönməsini alqışlamır və onu siyasi səhnədə görmür. Bu, həm də Çarukyanın prezident və hakim partiyanın planı ilə yenidən siyasətə dönməsi barədə deyilənlərin doğru olmadığını göstərir". Baş verənlərlə bağlı "Azatutyun"radiosu da bildirir ki, bu ilin aprelində Ermənistandakı parlament seçkiləri Sarkisyan iqtidarı üçün çox çtin olacaq. Bildirilir ki, getdikcə pisləşən iqtisadi vəziyyət və 2012-ci ildə qazandığı seçki qələbəsinin legitimliyi ətrafında mübahisələrin davam etməsi də belə vəziyyətin yraanmasında az rol oynamır: "Bu seçkidə Respublika Partiyasının koalisiya hökuməti quracağı gözlənir. Yalnız bundan sonra ikinci prezidentlik müddəti 2018-ci ildə başa çatmalı olan Sarkisyan hakimiyyətini baş nazir kimi davam etdirə bilərdi. 2015-ci ildə keçirilmiş referendumda kiçik səs fərqi ilə ölkənin yarıprezident üsul-idarəsindən parlament üsul-idarəsinə keçidi qərarı əldə edilib. Lakin Sarkisyanın prezidentdən baş nazirə çevrilməsinin o qədər də sadə olmayacağını düşünməyə əsas verən faktorlar mövcuddur. Son altı ildə əhəmiyyətli islahatlar, daha geniş demokratikləşdirmə vəd edən prezident vədlərinə əməl edə bilməyib. Üstəlik, son 1 ildə baş vermiş bir-birinə bağlı iki hadisə göstərdi ki, Sarkisyanın partiyası yalnız vədlərlə əvvəlki kimi rahat hakimiyyət sürə bilməyəcək. Bu hadisələrdən biri ötən ilin aprelində Qarabağdakı 230 kilometrlik təmas xətti boyunca dörd gün davam edən müharibə idi. Bu müharibədə Ermənistan yüzlərlə əsgərini itirdi, Azərbaycansa 1990-cı illərdə itirdiyi ərazilərin bir hissəsini özünə qaytardı. Bu müharibədə erməni tərəfinin itkiləri silah-sursatın çatışmaması ilə əlaqələndirilmişdi. Bu isə erməni cəmiyyətində hakimiyyətin çoxdan cilovlamağı vəd etdiyi korrupsiyaya bir daha diqqət çəkdi. Bəlli oldu ki, ölkədə baş alıb gedən korrupsiya artıq birbaşa milli təhlükəsizliyə hədə yaradır. İkinci hadisə isə iyul ayında "Sasna Tsrer" adlı silahlı qruplaşmanın İrəvanın mərkəzindəki polis şəhərciyini ələ keçirməsi, müxalifət liderlərindən Jirayr Səfilyanın azad edilməsini və Sarkisyanın istefasının tələb etməsi idi. 10-15 silahlının polis şəhərciyini əldə saxladığı günlərdə İrəvanda bu aksiyaya dəstək verən çoxminlik mintinqlər keçirilirdi. Bundan sonra Rusiya "Sasna Tsrerin" girov əməliyyatının yalnız beşinci günü bəyanatla çıxış etməyə cəsarəti çatan Sarkisyandan bədgümanlığına görə əhalinin istəklərinə daha real cavab verəcək dəyişiklikləri həyata keçirəcəyinə inandığı Karen Karapetyanı meydana gətirdi". O da bildirilir ki, Karapetyan İrəvanda güclü qüvvə dayaqlarına malik deyil və onun bir neçə nazir təyinatları da bundan xəbər verir: "Karapetyan son dərəcə ağır iqtisadi vəziyyətin düzəldilməsi üçün islahatların həyata keçiriləcəyini elan etsə də, sonradan monopoliyaların heç də mənfi bir şey olmadığını deyib. Belə görünür ki, Karapetyan monopiliya sahiblərinin hakim partiyada olduğundan xəbərdardır". Belə vəziyyət isə hakimiyyətdə yeni komanda daxilində də ziddiyyətləri dərinləşdirir. Bu halda Sarkisyanın devrilmə ehtimalı da artır.
Nahid SALAYEV