"Keçən ilin sonunda ATƏT-in İrəvan ofisinin atdığı addımlar, faktiki olaraq, bu qurumum fəaliyyətinin sabotaj olunmasına istiqamətlənmişdi"
Azərbaycan Xarici İşlər Nazirliyi ATƏT-in İrəvan ofisinin mandatının uzadılması məsələsinə reaksiya verib.
Azərbaycan XİN-in açıqlamasında nəzərə çatdırılır ki, 2016-cı ilin dekabr ayında məlumat verildiyi kimi, Azərbaycanın ATƏT yanında Daimi Nümayəndəliyi qanuni əsaslı narahatlıqlardan çıxış edərək, ATƏT-in İrəvandakı ofisinin son illər ərzində həyata keçirdiyi minalardan təmizləmə ilə bağlı fəaliyyətə öz etirazını bildirib: "ATƏT-dəki tərəf-müqabillərin əksəriyyəti məsləhətləşmələr zamanı ATƏT-in İrəvandakı ofisinin minalardan təmizləmə ilə bağlı fəaliyyətini mandatın açıq-aşkar pozulması kimi qiymətləndiriblər. Buna görə Azərbaycanın ATƏT yanında Daimi Nümayəndəliyi ATƏT-in İrəvan ofisini öz mandatı çərçivəsində fəaliyyət göstərməyə məcbur etmək üçün müvafiq tədbirlər görülməsini xahiş edib. Azərbaycan tərəfinin haqlı narahatlığına cavab olaraq Ermənistan özünün həmişəki girov götürmə ənənəsinə sadiq qalaraq, 31 dekabr 2016-cı il tarixində heç bir dəlil göstərmədən ATƏT-in Özbəkistan və Bişkekdəki mərkəzlərinin layihə əlaqələndiriciləri, Rusiya-Ukrayna sərhədində yerləşən iki Rusiya sərhəd-yoxlama məntəqəsindəki ATƏT müşahidəçilərinin müvafiq mandatlarının uzadılmasını, həmçinin, ATƏT-in 2016-cı il üçün vahid büdcəsinə düzəlişlərə dair qərarını blok edib. Ermənistan tərəfinin bu kimi şantaj hərəkətləri ATƏT-in bu mühüm missiyalarının funksiyalarını qeyri-işlək və öz nazından asılı vəziyyətə salıb, onların, demək olar ki, bağlanmasına səbəb olub. Yalnız 27 yanvarda Ermənistanın xarici işlər naziri E.Nalbandyan ATƏT rəhbərliyi və baş katiblə təcili məsləhətləşmələr üçün Vyanaya çağırıldıqdan sonra Ermənistan tərəfi müvafiq qərarlar üzrə öz əsassız qadağasını geri götürməyə məcbur edilib".
Bəyanatda bildirilir ki, Ermənistan ATƏT-in İrəvan ofisinin ev sahibi statusundan sui-istifadə etmək üçün özünün şantaj siyasətini ATƏT-ə tətbiq etməkdə davam edir. Nəticədə ATƏT-in İrəvan ofisi tərəfindən mandatın pozulması cavabsız qalır və onun əməliyyat fəaliyyəti dayandırılmış vəziyyətdədir: "Məsələyə dair Azərbaycanın mövqeyi konstruktiv və prinsipial olaraq qalır. ATƏT-in İrəvan ofisinin fəaliyyətinin şəffaf olması, ATƏT qarşısında məsuliyyət daşıması və mandat çərçivəsində həyata keçirilməsi təmin olunmalıdır. Daimi Nümayəndəlik ümid edir ki, ATƏT öz prinsipləri, ortaq dəyərləri və öhdəliklərini güdaza verməyərək, həmrəylik və birlik formasında Ermənistan tərəfindən yaradılan bu növbəti problemin də öhdəsindən gələcək".
Azərbaycan Xarici İşlər Nazirliyi niyə məhz ATƏT-in İrəvan ofisinin fəaliyyətindəki şəffaflığı yoxlamaq istəyir?
Beynəlxalq münasibətlər üzrə ekspert Yeganə Hacıyeva "Bakı-Xəbər"ə açıqlamasında bildirdi ki, Azərbaycan Xarici İşlər Nazirliyinin ATƏT-in İrəvan ofisinin mandatının uzadılması məsələsinə reaksiyası düzgündür. XİN ATƏT-in İrəvan ofisini öz mandatı çərçivəsində fəaliyyət göstərməyə məcbur etmək üçün müvafiq tədbirlər görülməsini xahiş etməkdə tam haqlıdır: "Biz zaman-zaman ATƏT-in İrəvan ofisinin Ermənistan və Azərbaycan arasında Dağlıq Qarabağ münaqişəsinin nizamlanması prosesinə və beləliklə də ATƏT-in Minsk Qrupunun səlahiyyətlərinə müdaxilə cəhdlərinin və bu istiqamətdə fəaliyyət göstərmə cəhdlərinin şahidi oluruq. Bu isə ATƏT-in İrəvan ofisinin mövcud mandatına qətiyyən uyğun deyil. Məsələn, ATƏT-in İrəvan ofisinin minalardan təmizləmə ilə bağlı fəaliyyəti mandatın açıq-aşkar pozuntusudur.
Həmçinin Azərbaycan XİN-in ATƏT-in İrəvan ofisinin mandatının uzadılması məsələsinə reaksiyasını, ümumilikdə, ATƏT-in fəaliyyətinin nizamlanmasına dəstək kimi qəbul edə bilərik. Bildiyiniz kimi, keçən ilin sonunda ATƏT-in İrəvan ofisinin atdığı addımlar, faktiki olaraq, bu qurumun fəaliyyətinin sabotaj olunmasına istiqamətlənmişdi. Belə ki, ATƏT-in İrəvan ofisi ev sahibi statusundan sui-istifadə etməklə, heç bir arqument göstərmədən bu qurumun Özbəkistan və Bişkekdəki mərkəzlərinin layihə əlaqələndiriciləri, Rusiya-Ukrayna sərhədində yerləşən iki Rusiya sərhəd-yoxlama məntəqəsindəki ATƏT müşahidəçilərinin mandatlarının uzadılmasını və ATƏT-in 2016-cı il üçün vahid büdcəsinə yekun düzəlişlərə dair qərarını blok etmiş, bu mühüm missiyaların funksiyalarını həyata keçirməsinə mane olmuş və nəticədə qurumun fəaliyyətində böhran yaratmışdı. Ermənistanın xarici işlər naziri Nalbandyanın Vyanaya çağırılması və ATƏT rəhbərliyi ilə məsləhətləşmələrdən sonra Ermənistan tərəfi müvafiq qərarlar üzrə öz əsassız qadağasını geri götürməyə məcbur edilmişdi. Məndə olan məlumata görə, ATƏT rəhbərliyi Azərbaycan Xarici İşlər Nazirliyinin bəyanatını müsbət qəbul edir və ATƏT-in İrəvan ofisinin bundan sonra mandatın pozuntusu və ümumilikdə, qurumun fəaliyyətindən sui-istifadə cəhdlərinin qarşısının alınmasına yönəlik preventiv addımlar atmağa, ATƏT-in İrəvan ofisinin mandatına uyğun əməliyyat fəaliyyətini davam etdirməsi istiqamətində nəzarəti gücləndirməyə hazırlaşır".
Məhəmmədəli QƏRİBLİ