"Bütün mümkün vasitələrlə biz Ermənistanın işğalçılıq siyasətini beynəlxalq qurumlarda ifşa etməliyik"
Ukraynanın AŞPA-dakı nümayəndə heyətinin rəhbəri Volodimir Aryev hazırladığı "Avropada jurnalistlərə və mətbuat azadlığına qarşı hücumlar" adlı hesabatında qeyd edib ki, Gürcüstan və Moldovanın separatçı əraziləri ilə yanaşı, Azərbaycanın Dağlıq Qarabağ ərazisi separatçı qüvvələrin nəzarətində olduğundan, burada mətbuatın vəziyyətinin qiymətləndirilməsi mümkünsüzdür. Hesabat səs çoxluğu ilə qəbul olunub.
Erməni nümayəndə heyəti Dağlıq Qarabağın Azərbaycan ərazisi olaraq göstərildiyi bəndin sənəddən çıxarılmasını tələb edib və Aryevi Azərbaycanla yaxın münasibətdə ittiham edib. Öz növbəsində komitə sədri sözügedən sənədin Azərbaycanın ərazi bütövlüyünü təsdiqləyən beynəlxalq norma və prinsiplər əsasında hazırlandığını diqqətə çatdırıb. Bundan sonra erməni nümayəndə heyətinin tələbi rədd edilib və AŞPA sessiyası məruzəni olduğu kimi qəbul edib. Ermənilər bunu bacarmadıqda çıxışlarında Volodimir Aryevi qaralamağa, onun şəxsiyyətini alçaltmağa çalışıblar. Ancaq V.Aryev nəinki hesabatın qəbuluna nail olub, üstəlik, səsvermədən bir gün əvvəl erməni heyətin onu öz tərəfinə çəkmək üçün konyak qonaqlığına şirnikləndirməyə çalışdığını bildirib. Bu cəhdləri alınmayanda isə ermənilər tipik mahiyyətlərini büruzə verib. Belə ki, Aryevin açıqlamasına görə, Assambleyada "Aryevin nənəsi azərbaycanlıdır" yazılmış paketlər dövriyyəyə buraxılıb. Komitə sədri baş verənlərə özünəməxsus yumorla yanaşaraq, "Facebook" səhifəsində yazıb: "İndi mən dəqiq bilirəm, istəyirsən gülməli nəsə baş versin, erməni parlamentindən nümayəndə heyəti çağır"...
Bütövlükdə, bu uğuru siyasilər necə dəyərləndirir?
Sözügedən məsələ ilə bağlı fikirlərini "Bakı-Xəbər"lə bölüşən AMİP-in baş katibi Arzuxan Əlizadənin sözlərinə görə, bu, Azərbaycanın uğurudur: "Ukraynanı təmsil edən deputatın sona qədər dirəniş göstərməsi və təbii ki, haqlı mövqedən çıxış etməsi təqdirəlayiqdir. Bu, AŞPA-da ermənilərə endirilən zərbədir. Məlum olduğu kimi, son dövrlər erməni deputatlar sözügedən qurumda xeyli fəallaşıb. Eyni zamanda, müxtəlif vasitələrlə Azərbaycanı qaralamağa çalışırlar. Belə bir situasiyada sözügedən hesabatın qəbul olunması müsbət haldır. Bütün mümkün vasitələrlə biz Ermənistanın işğalçılıq siyasətini beynəlxalq qurumlarda ifşa etməliyik. Bu işdə Azərbaycana yaxın olan dövlətlərin imkanlarından istifadə edilməlidir. Həmçinin, AŞPA-da onlarla birgə işləmək lazımdır. Bir məqamı da qeyd edim ki, Ukrayna da separatizmdən əziyyət çəkdiyi üçün məsələyə daha ciddi yanaşıb. İstənilən halda, Ukraynanın AŞPA-dakı nümayəndə heyətinin rəhbəri V.Aryevin hazırladığı hesabat təqdirəlayiqdir". Vidadi ORDAHALLI