Ramil Hüseynov: "Əlaqələrin müxtəlif tədbirlər çərçivəsində genişləndirilməsi hər iki tərəf üçün uğurlu nəticələrə gətirib çıxaracaq"
Bu ilin birinci yarısında Azərbaycan və Körfəz Əməkdaşlıq Şurasına (KƏŞ) üzv ölkələr arasında Bakı şəhərində strateji və iqtisadi forumun keçirilməsi nəzərdə tutulur.
Məqsəd iqtisadiyyat, ticarət, sərmayələr, enerji, turizm, kənd təsərrüfatı, ərzaq təhlükəsizliyi, nəqliyyat, mədəniyyət və idman kimi sahələrdə qarşılıqlı faydalı əməkdaşlığın inkişaf etdirilməsi üçün birgə layihələrin müəyyən edilməsi və biznes dairələri arasında birbaşa təmasların təşviq edilməsidir.
Tədbirdə Azərbaycan və KƏŞ-ə üzv dövlətlərin yüksək vəzifəli rəsmiləri, müvafiq olaraq xarici işlər, iqtisadiyyat, ticarət və sənaye nazirlikləri, ticarət palataları, iş adamları, özəl şirkətləri, suveren fondları və maliyyə-investisiya korporasiyalarının nümayəndələrinin geniş tərkibdə iştirakı nəzərdə tutulur. Forumun təşkili ilə əlaqədar məsələlərin müzakirəsi məqsədilə Xarici İşlər Nazirliyinin nümayəndə heyəti 2016-cı ilin dekabrında KƏŞ-in Ər-Riyadda yerləşən mənzil-qərargahına səfər edib və görüşlər keçirib.
Məlumatda o da qeyd olunur ki, Azərbaycan və KƏŞ-ə üzv ölkələr arasında Bakı şəhərində keçirilməsi nəzərdə tutulan strateji və iqtisadi forum hərtərəfli əməkdaşlığın inkişafına mühüm töhfə verəcək.
Nəzərə alsaq ki, körfəz ölkələrinin böyük əksəriyyətini ərəb dövlətləri təşkil edir, bu baxımdan tədbirin Bakıda keçirilməsinin Azərbaycan üçün nə kimi əhəmiyyəti var?
Məsələyə münasibət bildirən VİP-in sədr müavini Ramil Hüseynovun sözlərinə görə, bunun Azərbaycan üçün əhəmiyyəti var: "Məsələ ondadır ki, Azərbaycan maraqların üst-üstə düşdüyü bütün məsələlər üzrə dünya, o cümlədən, region və körfəz ölkələri ilə əməkdaşlıq etməyə hazırdır. Azərbaycan Orta Şərqdə yerləşdiyi üçün, körfəz ölkələrinə yaxındır. Bu baxımdan, yaxın ölkələrlə münasibətlərin qurulmasına böyük diqqət yetirilir. Azərbaycana ərazicə yaxın olan ərəb ölkələri ilə əməkdaşlığının çox böyük bir tarixi var. Müstəqillik əldə etdikdən sonra bu əlaqələr yeni müstəvidə inkişaf etməyə başlayıb. Körfəz ölkələri ilə əməkdaşlıq müxtəlif sferaları əhatə edir. Əlaqələrin müxtəlif tədbirlər çərçivəsində genişləndirilməsi hər iki tərəf üçün uğurlu nəticələrə gətirib çıxaracaq. Hesab edirəm ki, körfəz ölkələri ilə forumun keçirilməsi, ikitərəfli münasibətlərin qurulması tərəflər üçün müsbət nəticələnəcək. Bu, qarşılıqlı investisiyaların təşviq edilməsi, təcrübə mübadiləsinin həyata keçirilməsi, dünyada baş verən problemlərin bölgə ölkələrinə təsirinin minimuma endirilməsi baxımından mühüm əhəmiyyət kəsb edir. Yəni bu məsələlər tədbir çərçivəsində müzakirə oluna bilər. Ümumən götürdükdə, bu əməkdaşlıq ölkələrin iqtisadi inkişafına, ayrı-ayrı sahələrin, o cümlədən turizmin inkişafına, qarşılıqlı layihələrin həyata keçirilməsinə səbəb olacaq. Daha dəqiq desək, bu sahədə əlaqələrin daha da dərinləşməsinə təkan verəcək".
Vidadi ORDAHALLI