"Onun bütün addımları, təmsil olunduğu postda qalma müddəti əsas verir ki, başqa işə keçirilməsini tələb edək"
Ermənistanın panorama.am saytının ingilisdilli versiyasında ATƏT-in fəaliyyətdə olan sədrinin şəxsi nümayəndəsi Anjey Kasprişikin qondarma qurumun rəhbəri Bako Saakyanla görüşdüyü barədə xəbər yayılıb. Qondarma qurum rəhbərinin ofisinin görüş barədə yaydığı məlumat təəccüb doğurur.
Bildirilir ki, tərəflər Azərbaycan və qondarma qurum arasındakı qoşunların təmas xəttindəki vəziyyət barədə fikir mübadiləsi aparıb. Aydındır ki, belə bir mövzuda müzakirə aparmaq Kasprişikin mandatına uyğun deyil. Çünki qondarma qurumun hazırda müvəqqəti qərar tutduğu ərazi elə Azərbaycanın sərhədlərinə aiddir və onların Azərbaycanla ayrıca sərhədi ola bilməz. Yox, görüşün məzmunu ermənilər tərəfindən təhrif olunursa, məsələ Azərbaycan-Ermənistan təmas xəttində gərginliyin müzakirə formasında olubsa, onda Kasprişik niyə buna reaksiya vermir və danışıqlar formatının saxtalaşdırıldığına etiraz etmir?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, onlar təşkilat olaraq daim belə səfərlərə qarşı çıxıb: "Qondarma qurumun rəhbərliyi və erməni icması xərc çəkir ki, kimsə gedib Saakyanla görüşsün. Onlara məsələnin piar tərəfi maraqlıdır. Kasprişikin lazımsız səfərləri onlar üçün hazır piardır. Düşünmürəm ki, Kasprişik bunu təmənna olmadan edir. Niyə gəlib bizə hesabat vermir ki, gedib Saakyanla hansı müzakirəni aparıb? Ümumiyyətlə, buna ehtiyac duyulurmu? Onun indiyə qədər keçirdiyi görüşlərin bir faydası varmı? Təbii ki, bütün bu sualların cavabı bizə bəllidir. Görürsünüz ki, Ermənistanın dünya informasiya məkanına çıxış imkanları olan rus və ingilisdilli saytları bunu tirajlayır. Məsələni də dediyiniz kimi təqdim edirlər. Niyə Kasprişik cavab vermir? Niyə demir ki, qondarma qurumla Azərbaycanın arasında heç bir sərhəd yoxdur? Çünki yayılan informasiya onun maraq dairəsindədir. Onun bütün addımları, təmsil olunduğu postda qalma müddəti əsas verir ki, başqa işə keçirilməsini tələb edək. Artıq dövlət olaraq bu işin üstünə ciddi düşməliyik".
Məhəmmədəli QƏRİBLİ