Elçin Mirzəbəyli: "Bu məsələdə Azərbaycanın mövqeyi haqlıdır, çünki beynəlxalq hüquq normalarına əsaslanır"
"Bloger Aleksandr Lapşinin ekstradisiyasına dair məsələləri bu prosesə cəlb olunmuş ölkələr şərh etməlidir. Bununla belə, ABŞ söz azadlığının qorunmasının vacib olduğunu xatırladır". Bu barədə ABŞ Dövlət Departamentinin nümayəndəsi Con Kirbi bildirib.
"Yaxşı olardı ki, bu barədə konkret aidiyyəti ölkələr danışsın. Söz azadlığı bizim üçün önəmlidir", - deyə Con Kirbi ABŞ-ın bloger Aleksandr Lapşinin Belarusdan Azərbaycana ekstradisiyası məsələsinə münasibəti ilə bağlı suala cavabında bildirib.
Xatırladaq ki, Azərbaycan XİN rəhbəri Elmar Məmmədyarov bloger Lapşinin ekstradisiyasının sırf hüquqi müstəvidə baxılan məsələ olduğunu qeyd edib: "Azərbaycan Respublikasının Cinayət Məcəlləsinə uyğun olaraq, Azərbaycan sərhədlərini qanunsuz olaraq keçmiş, Azərbaycanın ərazi bütövlüyü və suverenliyinə hörmətsizlik nümayiş etdirmiş S.Lapşin barəsində cinayət işi açılıb. Onun barəsində "İnterpol" xətti ilə beynəlxalq axtarış elan edilib. MDB çərçivəsində Mülki, ailə və cinayət işləri üzrə hüquqi yardım və hüquqi münasibətlər haqqında 2002-ci il Kişinyov konvensiyası əsasında Belarusda saxlanmış A.Lapşinin ekstradisiyası üçün müvafiq sənədlər təqdim olunub. Rusiyaya qarşı eyni hərəkətləri törətmiş və onun sərhədlərini qanunsuz keçmiş şəxsə münasibətdə də Rusiyanın hüquq-mühafizə orqanları eyni addımları atardılar".
Bundan əvvəl Rusiya XİN rəhbəri Sergey Lavrov məsələ ilə bağlı qeyd edib ki, Moskva istənilən jurnalist və şəxsin dünyanın istənilən yerində hər hansı yeri ziyarət etməsini kriminallaşdırılmasının və cinayət məsuliyyətinə cəlb edilməsinin əleyhinədir. O, həmçinin, Moskvanın hər hansı ölkədə saxlanan Rusiya vətəndaşlarının üçüncü ölkəyə ekstradisiyasının əleyhinə olduğunu bildirib.
Qeyd edək ki, A.Lapşin Azərbaycan tərəfinin sorğusu əsasında Minskdə saxlanıb. Onun adı 2013-cü ildə Azərbaycan Xarici İşlər Nazirliyinin "qara siyahı"sına salınıb. Buna səbəb blogerin digər əcnəbilərlə Dağlıq Qarabağa qanunsuz səfər etməsidir. 2015-ci ildə Lapşin Ukrayna pasportu ilə Azərbaycan ərazisinə Gürcüstandan keçib. Pasportda Aleksandr adı Ukrayna dilinə uyğun Oleksandr yazıldığı üçün Lapşin Azərbaycana maneəsiz daxil ola bilib. Azərbaycan tərəfi dövlət sərhədini qanunsuz keçdiyinə görə blogeri beynəlxalq axtarışa verib.
Həm ABŞ-ın, həm də Rusiyanın Lapşin məsələsində vahid mövqedən çıxış etməsi nə ilə bağlıdır?
Ekspert Elçin Mirzəbəyli qəzetimizə açıqlamasında bildirdi ki, Lapşin məsələsində Rusiyanın mövqeyi ilə ABŞ-ın mövqeyi arasında fərqlər mövcuddur: "Amma ümumi anlamda hər iki yanaşmanı absurd saya bilərik. ABŞ məsələyə daha çox söz azadlığı prizmasından yanaşır. Baxmayaraq ki, Lapşinin məsələsində söz azadlığının boğulmasından söhbət belə gedə bilməz. Çünki o, konkret cinayət əməlinə yol verib. Bununla da görünür ki, siyasi ömrünə bir neçə saat qalan köhnə administrasiya ənənəvi ambisiyasını ortaya qoyur.
Rusiyanın məntiqi isə tamamilə hüquqaziddir. Çünki onların elə öz qanunvericiliyinə edilən dəyişiklik ikili vətəndaşlıqla bağlı bir sıra müddəaları özündə cəmləyir ki, Lapşin onlara uyğun gəlmir. Ən başlıcası isə budur ki, Lapşinin Rusiyada yaşamaması və cinayəti törətdiyi ərazinin həmin ölkəyə aid olmaması Lavrovun məntiqini alt-üst edir. Bu məsələdə Azərbaycanın mövqeyi haqlıdır, çünki beynəlxalq hüquq normalarına əsaslanır".
Məhəmmədəli QƏRİBLİ