"Heç olmasa, bunu pərdə arxasında etsinlər"
Ermənistan KİV-ləri xəbər verir ki, Fransa prezidenti Fransua Olland ölkəsində fəaliyyət göstərən erməni təşkilatlarının koordinasiya şurasının ənənəvi olaraq təşkil etdiyi illik ziyafətə qatılmağı planlaşdırır. Sözügedən tədbirin fevralın 8-də baş tutacağı gözlənir.
Qeyd edək ki, Olland bundan əvvəl də sözügedən qurumun təşkil etdiyi tədbirlərdə iştirak edib, hətta orada Yaxın Şərq və Dağlıq Qarabağdakı ermənilərin yaşadığı problemlərdən danışıb.
Dağlıq Qarabağ münaqişəsinin nizama salınması ilə bağlı vasitəçilik formatında təmsil olunan bir ölkə başçısının bu cür davranışına nə ad vermək olar?
Qarabağ Azadlıq Təşkilatının sədri Akif Nağı qəzetimizə açıqlamasında bildirdi ki, Fransanın belə addımlar atdığını çox görmüşük: "Deyəsən bizim vasitəçilər sarıdan heç bəxtimiz gətirməyib. Lavrovun nə danışdığını gördünüz. Əslində, bizim bildiyimiz mövqeyi ortaya qoyurlar. İndi sadəcə bunu çəkinmədən edirlər. Biz təşkilat olaraq dəfələrlə bəyan etmişik ki, ATƏT-in Minsk Qrupunun bütün həmsədrləri ermənilərə daha yaxın münasibət bəsləyir və bunun nəticəsidir ki, ortaya heç bir nəticə qoyula bilmir. Bu xüsusda Fransanın adı məxsusi qeyd edilməlidir. Həmin ölkənin bütün rəhbərləri bəlkə də məcburiyyətdən ermənilərin təsirinə düşür. Bunun da obyektiv səbəbləri var. Çünki həmin ölkədə ermənilərin mövqeyi çox güclüdür. Hətta prezidentlərin seçilməsinə təsir imkanaları mövcuddur. Bu da siyasətçiləri onların əlində vasitəyə çevirə bilir. Onlara istənilən sözü dedirdə bilirlər. Ancaq Fransanın prezidenti bilməlidir ki, onun bu addımı qətiyyən vasitəçilik missiyası ilə bir araya sığmır. Biz onsuz da onların ermənilərə yaxın olduğunu bilirik. Heç olmasa, bunu pərdə arxasında etsinlər. Artıq utanmadan bütün kartları açırlar. Azərbaycan etirazını bildirməlidir. Çalışmalıyıq ki, ya Minsk Qrupunun həmsədrləri dəyişsin, ya da bu təsisat ləğv edilsin".
Məhəmmədəli QƏRİBLİ