Rufiz Qonaqov: "İnvestorların cəlb edilməsi, ölkəmizin iqtisadi potensialının təbliğ olunması baxımından tədbir olduqca əhəmiyyətlidir"
Məlum olduğu kimi, İsveçrənin Davos qəsəbəsində ənənəvi Ümumdünya İqtisadi Forumu bu il də öz işinə başlayıb. Forumda il ərzində dünyanı gözləyəcək əsas iqtisadi hadisələr müzakirə olunur, müxtəlif panellərdə fikir mübadiləsi aparılır.
Bu il də dünya ölkələrinin dövlət və hökumət başçıları, müxtəlif iri korporasiyaların rəhbərləri Davosda bir araya gəlib. Sayca 49-cu forumda dünya liderləri, iri şirkətlərin rəhbərləri, ekspertlər dünyanın qarşılaşdığı çətinlikləri müzakirə edəcək, yeni il üçün iqtisadi gündəliyi müəyyənləşdirəcək. Forum yanvarın 21-nə kimi davam edəcək.
Prezident İlham Əliyev Davosda xarici ölkələrin rəsmiləri, hökumət başçıları, eləcə də dünyanın tanınmış şirkətlərinin rəhbərlərilə görüşlər keçirir. Belə ki, İlham Əliyev İsveçrəyə işgüzar səfəri çərçivəsində Davosda CISCO şirkətinin icraçı sədri Con Çambers ilə görüşüb. Həmçinin, Britaniyanın BP şirkətinin baş icraçı direktoru Robert Dadli ilə görüşü olub. Görüşdə BP şirkətinin baş icraçı direktoru R.Dadlinin Azərbaycana son səfəri məmnunluqla xatırlanıb. BP ilə SOCAR arasında əməkdaşlığın uğurla inkişaf etdiyi, BP-nin Azərbaycanda ən böyük investor olduğu qeyd edilib, "Azəri-Çıraq-Günəşli" yataqlar blokunda gedən işlər müzakirə olunub. Söhbət zamanı "Cənub Qaz Dəhlizi", TAP, TANAP layihələrinin uğurlu icrası və perspektivləri ətrafında fikir mübadiləsi aparılıb. Bununla yanaşı, İlham Əliyev Lüksemburqun baş naziri, dövlət naziri Ksavyer Bettel ilə görüşüb.
Müşahidələr göstərir ki, İlham Əliyevin Davosda dövlət rəsmiləri ilə, bir sıra nüfuzlu şirkət rəhbərləri ilə keçirdiyi bütün görüşlər yüksək səviyyədə olub. Ümumilikdə, bütün bunların Azərbaycan üçün əhəmiyyəti necə şərh olunur? Məsələyə münasibət bildirən Prezident yanında QHT-lərə Dövlət Dəstəyi Şurasının üzvü, BMAM sədri Rufiz Qonaqovun fikrincə, dövlət başçısının forumda şəxsən iştirak etməsi Azərbaycana bir sıra üstünlüklər qazandırır: "Azərbaycan Prezidenti Davos Forumunda 10 dəfədən çox iştirak edib. Cənab İlham Əliyev Davos Forumunda ən fəal iştirak edən prezidentlərdəndir. Bu da Azərbaycan üçün bir sıra dividendlər gətirir. Prezident hər il Davosda 30-a yaxın görüş keçirir. 1995-ci ildən başlayaraq Azərbaycan Dünya İqtisadi Forumunda ölkə rəhbəri səviyyəsində təmsil olunur. Davos Forumu Azərbaycan üçün ölkədə həyata keçirilən iqtisadi islahatların yaratdığı yeni imkanları dünyaya çatdırmaq, ölkəyə investisiyaların və texnologiyaların axınına zəmin yaratmaq baxımından çox əhəmiyyətlidir. Dünyanın aparıcı iş adamları ilə birbaşa ünsiyyət, onlarda ölkə iqtisadiyyatına investisiya etimadının daha da artırılmasına çalışmaq və bunu müasir yanaşmalarla nümayiş etdirmək vacibdir. Prezident Davos Forumunun imkanlarından görüşləri, çıxışları ilə uğurlu şəkildə faydalanır. Dünyada iqtisadi inkişaf tempinin zəiflədiyi, qeyri-müəyyənliklərin artdığı bir zamanda Azərbaycanın 2017-ci il üzrə iqtisadi prioritetlərini aydın şəkildə açıqlaması forumda ölkəmizə olan marağı daha da artırır. Dünyanın aparıcı şirkətləri, dünya iqtisadiyyatını müəyyən edənlər fərdi qaydada Azərbaycan iqtisadiyyatının vəziyyətini öyrənir, yəni Azərbaycan iqtisadiyyatının problemi nədir, ölkə bu problemdən çıxış yolunu necə görür, bütün bu suallara Davosda aydın cavablar verilir. Ölkəmizə investorların cəlb edilməsi, ölkəmizin iqtisadi potensialının təbliğ olunması baxımından forum olduqca əhəmiyyətlidir. Müşahidələr göstərir ki, forum iştirakçılarının Azərbaycana böyük marağı var. Hər bir güclü şirkət çalışır ki, Azərbaycanda nümayəndəliklərini açsın. Düşünürəm ki, indiki vacib məqamda Davos Forumu Azərbaycana bir sıra iqtisadi və siyasi dividendlər qazandıracaq".
Vidadi ORDAHALLI