Hüsniyə Soltanlı: "Ermənilərin həmin adla deyilən yarışda iştirak etməyə nə hüquqi, nə də mənəvi haqqı çatır"
Soçi şəhərində keçirilən Şən Hazırcavablar Klubu yarışması ilə bağlı ziddiyyətli xəbərlər alırıq. Azərbaycan tərəfinin sərt etirazına baxmayaraq, qondarma Dağlıq Qarabağ rejimini təmsil edən komanda Soçidə keçirilən ŞHK festivalında çıxış edib. Bu barədə Ermənistan KİV-ləri məlumat yayıb.
Qeyd edək ki, bu ərəfədə Rusiya KİV-i ŞHK aparıcısı, "AMİK YB" MMC-nin direktoru Aleksandr Maslyakovun bəyanatını yaymışdı. Həmin bəyanatda Azərbaycanın Ermənistan tərəfindən işğal olunmuş ərazilərində yaradılan qondarma Dağlıq Qarabağ rejimini təmsil edən komandanın Soçidə keçiriləcək ŞHK festivalında çıxış edəcəyi xəbəri təkzib edilmişdi.
"Qondarma "DQR"in komandaları heç vaxt beynəlxalq festivalda iştirak etməyib. Festivala dəvət ŞHK saytında qeydiyyatda olan bütün istifadəçilərə avtomatik olaraq göndərilir. ŞHK həmişə siyasətdənkənar və millətlərarası münaqişələrin qızışdırılmasına qarşı olub", - Maslyakov bildirib.
Amma Soçidə olan separatçılar komandasının nümayəndəsi Georgi Avetisyan "Novosti-Armenii" agentliyinə verdiyi müsahibədə bildirib ki, komanda artıq birinci turda çıxış edib və nəticələri gözləyir.
"Mən ŞHK-nin siyasətdənkənar olduğu ilə razıyam. Bu, şən və hazırcavab gənclərin oynadığı bir oyundur. Bizim komanda Stepanakertdəndir", - Avetisyan bildirib.
Azərbaycan ŞHK-nın mətbuat xidmətindən bildirilib ki, festivalın ilk günlərində "Duz-çörəklə" və "DeleYaman" komandaları özlərini qondarma Dağlıq Qarabağ rejiminin təmsilçisi kimi təqdim etməyə çalışıb. Bununla əlaqədar olaraq Azərbaycanın Gənclər və İdman Nazirliyi ŞHK İttifaqına etirazını bildirib. Azərbaycan nümayəndə heyəti isə festival zamanı onun rəhbərliyi ilə görüşüb. Nəticədə ŞHK Beynəlxalq İttifaqının prezidenti Aleksandr Maslyakov bəyan edib ki, ŞHK ən böyük qeyri-formal gənclər hərəkatı, bütün dünyada milyonlarla gəncin oynadığı oyundur: "Burada diskriminasiya və ksenofobiyaya, eləcə də siyasi təxribatlara yer yoxdur. Biz AR Gənclər və İdman Nazirliyinin müraciətinə baxdıq və bununla əlaqədar olaraq bəyan edirik ki, festivalda Azərbaycan ərazilərində yaradılmış tanınmamış subyekti heç bir komanda təmsil etməyəcək. Və biz bu tipli addımları gələcəkdə də diqqətlə izləyəcək və qarşısını alacağıq".
Belə situasiyada "mədəniyyət tədbirlərinin siyasətlə əlaqəsi yoxdur" iddiasını ortaya atan ermənilərə nə kimi cavab verilməlidir?
Mədəniyyətşünas Hüsniyə Soltanlı qəzetimizə açıqlamasında bildirdi ki, Soçi şəhərində keçirilən ŞHK yarışmasına ermənilərin qondarma qurum adından qatılmaq istəməsi məhz siyasətə xidmət edən addımdır: "Bilirsiniz ki, idman və mədəniyyət sahəsini əhatə edən tədbirlər həm də ölkələrin təbliğinə xidmət edir. Kim bunun əksini iddia edirsə, yanlışlığa yol verir. ŞHK yarışması MDB məkanında böyük maraqla izlənir. Azərbaycanın bu sahədə ciddi nailiyyətləri var. Bizim komandanın güclü rəqiblərindən biri hər zaman ermənilər olub. Bu qarşıdurmalar maraqla izlənib. Soçiyə ermənilərin qondarma "DQR" adından komanda çıxarması təsadüfi deyil. Onların bu addımı, heç də iddia etdikləri kimi, mədəniyyətə deyil, siyasətə xidmət edir. Onlar bu vasitə ilə separatçı rejimin legitimliyini dünyaya sırımaq istəyir. Azərbaycanın əlaqədar dövlət qurumlarının məsələyə sərt reaksiya verməsi doğrudur. Ancaq təəssüflər olsun ki, bu mövzu ilə bağlı fərqli xəbərlər alırıq. Bəziləri deyir ki, qondarma qurumun komandası yarışdan uzaqlaşdırılıb, bəziləri isə əksini söyləyir. İstənilən halda, onların həmin adla deyilən yarışda iştirak etməyə nə hüquqi, nə də mənəvi haqqı çatır".
Məhəmmədəli QƏRİBLİ