"Bizi ABŞ-la ciddi iqtisadi münasibətlər bağlayır və Azərbaycan bu istiqamətdə aparıcı tərəfdaşa çevrilib"
Amerika Birləşmiş Ştatlarının (ABŞ) yeni seçilmiş prezidenti Donald Trampın andiçmə mərasimindən sonra hansı ölkəyə səfər edəcəyi sual altındadır.
Seçkinin nəticələri elan olunandan sonra ABŞ-ın Respublikaçılar Partiyasındakı yüksək vəzifəli mənbəyə istinadən "İzvestiya" qəzeti məlumat yaydı ki, Trampın prezident kimi ilk səfəri Moskvaya reallaşacaq. Hətta bu səfərin andiçmədən əvvəl reallaşacağı da təxminlər sırasında idi.
Nəşr yazırdı ki, Amerikanın "The National İnterest" jurnalının naşiri Dmitri Saymsın fikrincə, Trampın andiçmə mərasimindən əvvəl Rusiyaya səfəri "hazırkı siyasətin pozulması" və "Barak Obama administrasiyasının arxasından" beynəlxalq danışıqlar aparmağa cəhd kimi qiymətləndirilə bilər.
İstənilən halda, təxminlər özünü doğrultmadı. Təbiidir ki, hər bir ölkə istəyər ki, ABŞ kimi hegemon bir ölkənin yeni prezidenti yolunu onlar tərəfdən salsın. Bəllidir ki, ABŞ-ın ciddi maraqlarının olduğu regionlardan biri də Cənubi Qafqazdır. Hətta bəzi analitiklərin dəyərləndirməsinə görə, ABŞ-ın bu regionda Rusiya ilə maraqları ciddi toqquşur. Belə olan təqdirdə, Trampın Azərbaycana səfəri lazımdırmı?
Politoloq Qabil Hüseynlinin sözlərinə görə, ABŞ öz geopolitik maraqları uğrunda ciddi mübarizə aparmaq istəyirsə və yeni administrasiya üçün bu, prioritet olacaqsa, təbii ki, lazımdır: "Adətən ABŞ-ın yeni seçilən prezidentləri ilk səfərlərini nisbətən böyük ölkələrə edirlər. Bu baxımdan da Trampın ilk səfərini Azərbaycana edəcəyinə inanmaq sadəlövhlük olardı. Ancaq biz ümumi anlamda hesab edirik ki, belə bir səfər tez bir zamanda reallaşsa yaxşı olar. Bu həm də ABŞ üçün zəruridir. Çünki son vaxtlar keçmiş SSRİ coğrafiyasında Rusiyanın özünü arxayın aparması və hətta bəzi əraziləri ilhaq edərək öz tərkibinə qatması səbəblərindən biri də ciddi müqavimətlə rastlaşmamasıdır. Artıq Trampın komandasında müdafiə naziri postunu tutmağa yaxın olan şəxs bildirib ki, ABŞ-ın sabiq rəhbərliyi Rusiyanın Krımı ilhaq etməsi məsələsində çox böyük yanlışlıq və zəifliyə yol verib. O bildirib ki, yeri gəlsəydi, ABŞ silahlı müqavimət göstərməli idi. Bu baxımdan da, hesab edirəm ki, Tramp administrasiyası Rusiyaya yaxın olan ərazilərə diqqəti daha da artıracaq. Regionun aparıcı ölkəsi kimi Azərbaycana səfər Trampın proqramına daxil edilə bilər. Çünki bizi ABŞ-la həm də ciddi iqtisadi münasibətlər bağlayır və Azərbaycan bu istiqamətdə aparıcı tərəfdaşa çevrilib".
Məhəmmədəli QƏRİBLİ