Ötən il noyabrın 8-də Donald Trampın ABŞ prezidenti seçilməsindən sonra onun Ağ Evə gedən yolunun o qədər asan olmayacağına dair verilən proqnozlar özünü doğruldur.
Qeyd edək ki, Trampı prezident kürsüsündən məhrum etmək üçün əvvəlcə Seçicilər Kollegiyasında ona verilən səslərin sayının azaldılması və Hillari Klintonun prezident seçilməsi nəzərdə tutulurdu. Amma bu plan reallaşmadı. Daha sonra gözlənirdi ki, Konqres Trampı prezident postuna təsdiq etməyəcək. Amma yenə də əks nəticə meydana çıxdı. Ardınca Rusiyanın seçkilərin nəticələrinə haker hücumları ilə təsir etməsi ön plana atıldı. Amma bu da Trampın yolunu kəsə bilmədi. İndi isə Trampa qarşı Rusiyanın əlində kompromtaların olması gündəmə gətirilib.
ABŞ mediasının yazdığına görə, Rusiya agentləri ABŞ-ın yeni seçilmiş prezidenti Donald Trampı etibardan salan informasiyalara malikdir. "Buzfid" nəşri bir neçə gün əvvəl Rusiya xüsusi xidmət orqanlarının Trampa qarşı təxribat hazırlaması haqqında 35 səhifəlik hesabat dərc edib. Hesabatın müəllifi Kristofer Steel qəzetə açıqlamasında bəyan edib ki, Rusiya xüsusi xidmət orqanlarının keçmiş əməkdaşlarından biri ona Federal Təhlükəsizlik Xidmətinin Trampı izləməsi haqqında məlumat verib. Müəllif bu barədə məlumatı 2013-cü ildə əldə etdiyini söyləyib. Rusiya xüsusi xidmət orqanları, xüsusən Trampın fahişələri dəvət etdiyi "Ritz Çarlton" otelini dinləyiblər. KİV-in istinad etdiyi sənəddə Trampın Rusiyaya Trampın səfərləri zamanı elit fahişələrlə "eyş-işrətləri", həmçinin milyarderin Rusiya kuratorları ilə əməkdaşlığı təsvir edilir. Sənədə görə, Tramp özünün siyasi rəqibləri haqqında Rusiya kəşfiyyatının informasiyalarına əvəz olaraq xaricdə yaşayan və Vladimir Putinin şəxsən maraqlandığı Rusiya oliqarxları və onların ailələrinin həyatı haqqında məlumatlar verib.
Rusiya prezidentinin mətbuat katibi Dmitri Peskov sözügedən iddiaları "kriminal əsər", "tam cəfəngiyat" və "bulvar əsəri" adlandırıb. Moskvada əmindirlər ki, Rusiya ilə ABŞ arasındakı münasibətlərdə hörmət daha çox olmalıdır və ümid edirlər ki, ABŞ-ın yeni seçilmiş prezidenti Donald Trampla dialoq mümkün olacaq. Bu isə bəzilərini narahat edir. Peskovun sözlərinə görə, Rusiyada Vladimir Putinlə Donald Trampın "yola gedəcəyinə" ümid edirlər: "Ən azından, Tramp dialoq aparmağa hazır olduğunu bəyan edib. Bu o demək deyil ki, tərəflər hər məsələdə razılıq əldə etməyə hazırdır. Çətin ki, bu mümkün olsun və Moskvada bunu gözləmirlər. Amma dialoq aparmaq bizə bir çox çətin vəziyyətlərdən çıxmaqda kömək edəcək". Amma Trampa düşmən kəsilən media mövzunu davamlı qabardır. ABŞ Milli Kəşfiyyat İdarəsinin direktoru Ceyms Klapper isə Trampa deyib ki, Rusiyanın Trampı şantaj etmək məqsədilə məlumata malik olması barədə sənədi kəşfiyyat icması yaratmayıb. Klapper verdiyi bəyanatda ABŞ kəşfiyyatının bu informasiyanın dürüst olduğuna dair qərar vermədiyini bildirib və Trampa deyib ki, bu məlumatın mediaya kəşfiyyat tərəfindən sızdırıldığına inanmır. Klapperin ona zəng etdiyini təsdiq edən Tramp həmin dosyeni "saxta və uydurma" adlandırıb. Tramp haqqında irəli sürülən iddiaları keçirdiyi mətbuat konfransında qəzəblə inkar edib: "Biabırçılıqdır ki, bu cür informasiya açıqlanıb. Mən həmin informasiyanı gördüm. Mən bunu həmin görüşdən kənarda oxudum. Bunlar hamısı saxta xəbərlərdir. Uydurma şeylərdir. Belə bir şey baş verməyib". Amma Nümayəndələr Palatasında Demokratların lideri Nensi Pelosi Trampa qarşı iddiaların ABŞ milli təhlükəsizliyinə təsir göstərməsinə yol verilməməli olduğunu qeyd edib. Trampın ABŞ-Rusiya münasibətlərinə yanaşmasına dair narahatlığını ifadə edən Pelosi qeyd edib ki, Rusiyanın Trampa dair hansı məlumata malik olduğu onu həmişə düşündürüb: "Heç kim təəccüblənməməlidir ki, ruslar daim hansısa siyasətçiyə dair kompromat axtarır". ABŞ mediası da eyni mövqedədir. Rusiyanın "Gazeta.ru" saytı isə hesab edir ki, Tramp barədə hesabat şübhəli görünsə də, onu Amerika cəmiyyətinin gözündə etibardan salmaq arzusu açıq şəkildə görünür. Sayt bildirir ki, inauqurasiyasına bir neçə gün qalan ABŞ-ın 45-ci prezidentinin ətrafında casus xəfiyyəsi fırlanır. Kremlə yaxınlığı ilə tanınan Rusiya politoloqu Sergey Markov bildirir ki, "Washington Post" dinc hakimiyyət çevrilişi formatını, yəni Trampın devrilməsini açıq müzakirə edir: "Bu, ABŞ-da siyasi qarşıdurmanın hələ çox sərt olacağını göstərir. ABŞ mümkün inqilabın kandarındadır. Rusiya indi Trampı maksimun dəstəkləməlidir. Trampı açıq dəstəkləmək lazımdır. Rusiyanın xüsusi xidmət orqanları Trampa mümkün dövlət çevrilişinin qarşısını almağa kömək etməlidir".
Sergey Markov "Washington Post"a istinad edərək qeyd edir ki, Trampın mümkün impiçmenti haqqında söhbət getmir və bu, çox mürəkkəb prosesdir. Söhbət ABŞ konstitusiyasına 25-ci düzəlişin tətbiqetmə imkanından gedir. Bu düzəliş vəzifələrinin icrasının qeyri-mümkünlüyünə görə prezidentin səlahiyyətlərinin vitse-prezidentə ötürülməsini nəzərdə tutur: "Kremlin seksual dosyesi"ndən heç nə çıxmasa, Tramp əlbəttə ki, heç yerə getməyəcək. Tramp ona qarşı açılan informasiya kampaniyasını tamamilə öz xeyrinə dəyişdirə bilər. "Rusiyanın oğlanı" olan Trampın siyasi səhnədən gedişi ölkəmiz üçün ciddi məsələdir. Bu halda, yeni sanksiyalar üzrə təhlükələr görünür".
"The Daily Telegraph" isə yazır ki, Tramp barədə ifşaedici dosyeni tərtib etmiş keçmiş MI6 zabiti kimliyi ABŞ-da açıqlandıqdan sonra "həyatının təhlükədə olmasından narahatdır". Məqalədə deyilir ki, adının tezliklə açıqlanacağını hiss edən 52 yaşlı Kristofer Steel Londonun Surrey qraflığındakı evindən qaçıb. Steelə yaxın çevrələrdən mətbuata bildirilib ki, keçmiş casus Moskvanın intiqamından qorxur. "The Telegraph" yazır ki, keçmiş casus Moskvadakı mənbələrindən Trampın Kremllə əlaqələri barədə yığdığı məlumatları jurnalistlərlə paylaşmaqla təhlükəli oyuna girib.
Tahir TAĞIYEV