"Bu minvalla, danışıqların uzadılmasını, münaqişənin dondurulmuş vəziyyətdə saxlanmasını istəyir"
"Bu faciəvi insident Azərbaycanla Ermənistan arasında baş verib. Hesab edirik ki, iki ölkə özündə müdriklik, güc və diplomatik imkan tapıb bu problemi həll etməlidir".
Bunu keçirdiyi brifinqdə Rusiya Xarici İşlər Nazirliyinin rəsmi nümayəndəsi Mariya Zaxarova Azərbaycanı təmsil edən jurnalistin "Ermənistan bütün çağırışlara məhəl qoymayaraq, ötən il dekabrın 29-da Azərbaycan-Ermənistan sərhədində baş verən insident zamanı həlak olmuş Azərbaycan hərbçisinin meyitini qaytarmır. Rusiya XİN-in buna münasibəti necədir" - sualına cavabında deyib.
M.Zaxarova bildirib ki, ölkələr bu çətin situasiyanı həll etməlidir. "Bu problemin açarı hər iki tərəfin əlindədir".
Qeyd edək ki, 2016-cı il dekabrın 29-da, səhər saatlarında Ermənistan silahlı qüvvələrinin kəşfiyyat qrupu Azərbaycan-Ermənistan dövlət sərhədini pozmağa cəhd göstərərkən bölmələrimizin pusqusuna düşüb. Hadisə nəticəsində Silahlı Qüvvələrimizin hərbi qulluqçusu əsgər Qurbanov Çingiz Salman oğlu itkin düşüb. Sonradan məlum olub ki, onun meyiti qarşı tərəfdədir.
Müdafiə Nazirliyi əsgər Qurbanov Çingiz Salman oğlunun meyitinin geri qaytarılması ilə bağlı BQXK-nin Azərbaycan nümayəndəliyinə, ATƏT-in Minsk Qrupuna, o cümlədən ATƏT-in fəaliyyətdə olan sədrinin şəxsi nümayəndəsi Anjey Kasprşikə rəsmi qaydada müraciət edib. Ancaq indiyə qədər qarşı tərəf meyiti vermək istəmir.
O da məlumdur ki, Ermənistana əsaslı təzyiq imkanlarına malik olan Rusiya istəsə, meyitin qaytarılmasına nail ola bilər. Necə ki, 2010-cu ildə Rusiya prezidenti Dmitri Medvedyevin vasitəçiliyi ilə işğalçı tərəf Mübariz İbrahimovla Fərid Əhmədovun meyitlərini geri qaytardı. Belə ki, Ermənistan aylarla meyitləri təhvil vermirdi.
Sözügedən məsələni "Bakı-Xəbər"ə şərh edən VİP-in sədr müavini Ramil Hüseynovun sözlərinə görə, Rusiya istəsə, qarşı tərəf tez bir zamanda meyiti qaytarar: "Ancaq görünən odur ki, Rusiya bunu istəmir. Ona görə istəmir ki, bununla sanki Ermənistanın güclü tərəf olduğunu göstərmək istəyir. Bu minvalla, danışıqların uzadılmasını, münaqişənin dondurulmuş vəziyyətdə saxlanmasını istəyir. Yoxsa bunun həlli rəsmi Moskva üçün adi bir məsələdir. Zatən, Ermənistanın marionet dövlət olması heç kəsə sirr deyil. Aprel döyüşlərində Ermənistan bütün meyitləri qaytardı. Ona görə ki, işğalçı tərəfin ordumuzun nəzarətində olan ərazilərdə çoxsaylı meyitləri qalmışdı. Ermənistan hakimiyyəti böyük narahatlıq içində idi. Ölən hərbçilərin valideynlərindən çəkinirdilər. Ona görə də onlar buna məcbur idilər. Ancaq o zaman da qarşı tərəf iyrənc əməllərini saxlaya bilmədi. Belə ki, bəzi meyitlərin üzərində işgəncə izləri aşkarlandı. Budur erməni xisləti. Bənzər hallar birinci Qarabağ müharibəsi dövründə də baş vermişdi. Ona görə də Ermənistandan nə desən gözləmək olar".
Vidadi ORDAHALLI