Azərbaycanın hərbi potensialı bu gün ölkəmizə düşmən Ermənistanda istənilən nöqtəyə zərbə endirilməsinə tam şəkildə imkan verir. Bu fakt, əslində, Ermənistan rəhbərliyinə də məlumdur və düşmən tərəf onu da bilir ki, bu ölkəyə Azərbaycan ilk növbədə Naxçıvandan kifayət qədər sərt zərbələr vura bilər.
Ümumiyyətlə, Azərbaycanın Naxçıvanda kifayət qədər hərbi güc cəmləşdirməsi Ermənistanı daim qorxudan başlıca faktorlardan sayılır. Yeri gəlmişkən qeyd edək ki, Prezident İlham Əliyev də Naxçıvana səfəri zamanı bir daha burada cəmləşdirilmiş hərbi potensialı yüksək qiymətləndirib: "Naxçıvanın hərbi potensialı lazımi səviyyədədir. Biz bu istiqamətdə də böyük iş aparmışdıq və bu gün də aparırıq. Bu gün Naxçıvan ordusu istənilən vəzifəni icra etməyə hazırdır, öz sərhədlərini qoruyur və siz burada düşmənlə üz-üzə yaşayırsınız, cəsarətlə yaşayırsınız, rəşadət göstərirsiniz və göstərmisiniz". Dövlət başçısı qeyd edib ki, bu gün Naxçıvanın hərbi potensialı ən yüksək səviyyədədir: "Ən müasir texnika, silah, sursat buraya göndərilir və döyüş qabiliyyəti artır, xidmət şəraiti yaxşılaşır. Bu gün olduğum hərbi hissədə ən yüksək şərait yaradılıb". O, Naxçıvanın hərbi potensialının və müdafiə qabiliyyətinin daim diqqət mərkəzində olduğunu diqqətə çatdırıb.
Daha bir vacib məqamı qeyd edək ki, Prezident İlham Əliyevin Naxçıvana səfəri zamanı Əlahiddə Ümumqoşun Ordusunun silahlanmasında yer alan T-300 "Qasırğa" uzaq mənzilli raket sistemi ilk dəfə nümayiş olunub. Prezidentə Əlahiddə Ümumqoşun Ordusunun inventarındakı "Qasırğa"nın buraxıcı kompleksi və yükləyici maşını göstərilib. Azərbaycan Müdafiə Nazirliyinin Türkiyənin ROKETSAN şirkətinə sifariş verdiyi "Qasırğa" komplekslərinin çatdırılmasına 2014-cü ilin sentyabr ayında başlanıb və proses 2016-cı ildə yekunlaşıb. Sistemlərin çatdırılması ilə yanaşı, onu idarə edən heyətə də müvafiq təlimlər keçilib. KamAZ avtomaşınlarının şassisi üzərində yerləşən Azərbaycan "Qasırğa"ları universal dizayna malikdir. ROKETSAN şirkətinin İdarə Heyətinin sədri Emin Alpman "Azeri Defence" jurnalına müsahibəsində Azərbaycana idarəolunan "Qasırğa" raketlərinin ixrac olunması barədə razılaşmanın imzalandığını bildirib. T-300 "Qasırğa" kompleksinin atış mənzili 105 kilometr, yeni hazırlanmış TRG-300 idarə olunan raketlərlə 120 kilometrdir. GPS və İNS naviqasiyasına malik TRG-300 raketinin dəqiqliyi maksimum məsafədə 30 metr təşkil edir. TRG-300 raketinin uzunluğu 5.24 metr, ağırlığı 585 kiloqramdır. Naxçıvan Əlahiddə Ümumqoşun Ordusunun silahlanmasındakı "Qasırğa"lar, İrəvan şəhəri də daxil olmaqla, Ermənistanın dərinlikdəki strateji hədəflərini vurmaq imkanı qazandırır. Amma Naxçıvandan Ermənistana sərt zərbələr enidirilməsi üçün ordumuzun ixtiyarında digər silahlar da mövcuddur. Ümumiyyətlə, ordumuzun təchizatında yüksək dəqiqliyə və çox böyük məhvetmə gücünə malik müasir silahlar, döyüş və nəqliyyat helikopterləri, təyyarələri, hava hücumuna qarşı ən müasir qurğuları, zirehli maşınları, tankları və artilleriya qurğuları var. Bu fonda qeyd etmək vacibdir ki, Naxçıvanda yerləşdirilmiş "Smerç" raket sistemləri də təkbaşına düşmən ərazisindəki istənilən hədəfi məhv etməyə qadirdir. Azərbaycanın ən azı 30 "Smerç" sistemi var. Bunlar ədəd 9A52M və 9K58 təsnifatlarına daxildir. 9K58 "Smerç" "Katyuşa" nəslindən olan reaktiv yaylım atəşi sistemidir. "Smerç" sistemi dördoxlu MAZ-543M yük avtomobilinin üzərində yerləşdirilmiş 300 millimetr çaplı 12 boru paketindən ibarətdir. Bu sistem bütün raketləri 38 saniyəyə ata bilir. Tərkibində dörd "Smerç" sistemi olan batereya 48 ədəd raketlə böyük bir sahəni qısa zaman ərzində məhv edə bilir. Yeni model 9A52M "Smerç-M" sistemi isə beşoxlu Tatra-816 modelli yük avtomobilin üzərində quraşdırılır. Bu sistemə avtomatik atəşaçma texnikası və rabitə aparatları əlavə edilib. Həmçinin təkmilləşdirilmiş raket sistemi də inkişaf etdirilib. Yeni sistemin zərbə dairəsi artıq 90 kilometr məsafəni əhatə edir və onun bu məsafədə vurma xətası 170 metr həddindədir. Altı ədəd "Smerç"dən ibarət briqada bir diviziyanın hərəkətini dayandırmaq və ya kiçik bir şəhəri tam məhv etmək mümkündür.
Xatırladaq ki, 70-90 kilometrlik məsafədə hədəfi vurmaq qabiliyyətinə malik "Smerç"lərin Naxçıvanda saxlanması təsadüf deyil. Naxçıvanla İrəvanın arası 80 kilometrdir. Bu və digər silahlar isə Azərbaycanın Ermənistan üzərində üstünlüyünü əhəmiyyətli dərəcədə artırır. Ermənistan ərazisinin dərinliklərindəki hərbi-strateji hədəflər isə məhz Naxçıvan istiqamətindən daha əlçatandır və Azərbaycan ordusunun muxtar respublikada dislokasiya olunmuş qoşun birləşmələri sərəncamındakı raket sistemləri ilə, İrəvan da daxil olmaqla, düşmən ərazisinin dərinliklərini hədəf ala bilər.
Nahid SALAYEV