"Ölkədə digər sosial-iqtisadi problemlərin daha da dərinləşməsi gözlənir"
Ermənistanda demoqrafik vəziyyətin günbəgün ağırlaşması barədə erməni siyasiləri, Qərb nəşrləri həyəcan təbili çalmaqda davam edir. Son bir ildə Ermənistanı 60 min insan tərk edib. Bu barədə ölkə parlamentində məlumat verilib. Deputatlar miqrasiya tempinin sürətlənməsinin Ermənistana böyük fəlakətlər gətirəcəyini deyib.
Ümumi rəqəmlərə diqqət çəkən Erməni Milli Konqresi fraksiyasının katibi Aram Manukyan deyib ki, 2015-ci ildə ölkədən gedən vətəndaşların 57 mini, 2016-cı ildə isə 60 mini Ermənistana geri qayıtmayıb. Ümumilikdə, son beş ildə Ermənistanı tərk edənlərin sayı 230 mini keçib. Bu statistika ölkədəki Şrak və Zvartnots aeroportlarından alınan hesabat əsasında hazırlanıb. A.Manukyanın fikrincə, 60 min insanın ölkəni tərk etməsi 2016-cı ildə Ermənistan üçün ən böyük itkidir."Həmçinin 2 aprel hadisələri ilin ağrılı səhifəsi oldu. Təəssüf ki, hakimiyyət bundan heç bir dərs götürmədi". Kütləvi miqrasiyanın qarşısını almaq üçün hələ bir neçə il əvvəl proqram hazırlanıb. Bu proqramda sərhəd mühafizəsinin gücləndirilməsi, nizamsız miqrasiyanın idarə olunması, xaricdəki ermənilərin geri dönüşü və digər məsələlər əksini tapıb.
Ermənistan parlamentinin deputatları bildirir ki, bütün bunların müqabilində miqrasiyanın qarşısını almaq mümkün olmayıb. İşsizlik, yoxsulluq insanları ölkədən getməyə məcbur edir. Başqa bir səbəb isə ölkənin pis idarə olunması ilə bağlıdır.
Ermənistanda dayanmayan miqrasiya ölkəni hara aparır?
Məsələyə münasibət bildirən politoloq Fikrət Sadıqovun sözlərinə görə, müşahidə olunan tendensiya işğalçı ölkəyə yaxşı heç nə vəd etmir: "Artıq Ermənistanda rəsmi dairələr də etiraf edir ki, ölkədə miqrasiya baş alıb gedir. Belə bir ardıcıllıqla əhalinin ölkəni tərk etməsi müsbət bir şey vəd etmir. Düzdür, əminliklə deyə bilmərəm ki, bu gedişlə Ermənistanda bir nəfər də qalmayacaq. Ancaq görünən odur ki, sözügedən tendensiya yaxın gələcəkdə də davam etsə, orada faktiki olaraq qocalar, pensiyaçılar, uşaqlar və əlillər qalacaq. Çünki əhalinin ölkəni tərk etməsi prosesi ölkədə vəziyyəti çox mürəkkəbləşdirir. Nəzərə alsaq ki, tərk edənlərin əsas hissəsini əmək qabiliyyətli insanlar təşkil edir, bunun nə demək olduğunu təsəvvür etmək heç də çətin deyil. Nə qədər ki, Dağlıq Qarabağ məsələsi həll olunmayıb, bu səbəbdən Türkiyə və Azərbaycanla olan sərhədlər açılmayıb, Ermənistanı həm də demoqrafik fəlakət gözləyir. O cümlədən, digər sosial-iqtisadi problemlərin daha da dərinləşməsi gözlənir. Bunu bir müddət əvvəl Ermənistanın sabiq prezidenti Levon Ter-Petrosyan da xüsusi olaraq qeyd etdi. Reallıq ondan ibarətdir ki, vəziyyətin bu cür davam etməsi ölkəni uçuruma aparır".
Vidadi ORDAHALLI