"Azərbaycanı bu mövzuda Ermənistanla eyniləşdirmək ən böyük ədalətsizlikdir"
ATƏT-in Minsk Qrupunun həmsədrləri növbəti məsuliyyətsiz bəyanat veriblər. Onların son bəyanatında deyilir: "Biz tərəfləri qarşılıqlı ittihamlara son qoymağa və yerlərdə vəziyyətin sabitləşdirilməsi üçün bütün zəruri tədbirləri görməyə çağırırıq".
Həmsədrlər Ermənistan və Azərbaycanı Vyana və Sankt-Peterburq görüşlərində əldə edilmiş razılaşmalara ciddi riayət etməyə çağırıb. Həmçinin, 2010-cu ildə Həştərxan görüşündə əldə olunan razılaşmaya uyğun olaraq, həlak olan hərbçi nəşinin vətəninə qaytarılması üçün çağırış edib.
Bunun ardınca Minsk Qrupunun ABŞ-dan olan həmsədri Riçard Hoqland deyib ki, ABŞ hökuməti həmsədrlərin vasitəçiliyi ilə münaqişənin sülh yolu ilə həllinə sadiqdir.
Diplomat qeyd edib ki, həmsədrlər tərəflərlə uzunmüddətli həllə gətirib çıxara biləcək istənilən yolla işləməyə hazırdır: "Biz əsas məsələləri, o cümlədən atəşkəs rejiminə hörmət, Vyana və Sankt-Peterburq görüşlərində əldə olunmuş razılıqları tam həyata keçirmək istiqamətində addımlar atılmasını müzakirə etmək üçün prezidentləri və xarici işlər nazirlərini ilk fürsətdə görüşə həvəsləndirməyə davam edirik".
Göründüyü kimi, bu bəyanatları ilə də tərəflərin üzərinə bərabər məsuliyyət qoyurlar və hər iki tərəfi konstruktiv mövqe nümayiş etdirməyə çağırırlar. Hətta ABŞ-dan olan həmsədr bu ifadəni həvəsləndirmək kimi təqdim edir.
Çox maraqlıdır ki, həmsədrlər danışıqlar prosesində məhz Ermənistanın qeyri-konstruktiv mövqe nümayiş etdirdiyini bilə-bilə, konkret olaraq onların adını çəkmirlər. Məsuliyyətin bərabər paylaşılmasını özündə əks etdirən bu məzmunlu ehtiyatlı bəyanatlar nəyə hesablanır?
Politoloq Qabil Hüseynli bildirdi ki, biz həmsədrlər tərəfindən oxşar məzmunlu bəyanatların verildiyinin çox şahidi olmuşuq: "Əslində, heç qəribə də görünmür. Çünki həmin missiyada təmsil olunanların işi elə orta mövqeli bəyanatlar verməkdən ibarət olub. İndiyə kimi siz ATƏT-in Minsk Qrupunun hansı uğurlu addımını qeyd edə bilərsiniz? İstər əsgər meyitinin qaytarılması barədə, istərsə də ABŞ-lı həmsədrin verdiyi ayrıca bəyanat heç bir konkret mənanı ifadə etmir. Tərəfləri görüşə həvəsləndirmək diplomatik ifadə sayıla bilməz. Onlar bilməmiş deyil ki, görüşlərdən, konstruktiv mövqedən imtina edən məhz Ermənistan və onun rəhbərliyidir. Yaxşı olar ki, həmsədrlər məhz konkret ad çəksinlər. Azərbaycanı bu mövzuda Ermənistanla eyniləşdirmək ən böyük ədalətsizlikdir".
Məhəmmədəli QƏRİBLİ