Üzeyir Cəfərov: "Bizim yüksək təhsilli zabitlərimizə nə gəlib ki?"
Erməni politoloqlar ölkələrinin KİV-lərində yenidən aprel döyüşlərini geniş təhlil edib. Regional Araşdırmalar Mərkəzinin direktoru Riçard Kirakosyan bildirib ki, aprel hadisələrindən iki mühüm nəticə çıxır:
"Birincisi, bu bizim xoşumuza gəlsə də, gəlməsə də, ilk dəfə Azərbaycan ərazilər tutmağa nail olub. İkincisi, bu böyük əhəmiyyət daşıyır, bu hadisələr nəticəsində bəlli oldu ki, korrupsiya milli təhlükəsizliyə təhdiddir. İndi bu daha böyük əhəmiyyət kəsb edir, çünki seçki ərəfəsində müzakirə gündəmini formalaşdırır".
Politoloq Aleksandr İskandaryanın fikrincə, aprel müharibəsi göstərib ki, bu məsələ hərbi yolla həll oluna bilməz: "Azərbaycan 22 il müharibəyə hazırlaşıb. Son dörd-beş ildə 20 milyard dollardan çox vəsait xərclənib. Əməliyyat yetərincə savadlı idi. Çox güman ki, əməliyyat, belə deyək, başqa ölkələrdən olan məsləhətçilər tərəfindən planlaşdırılmışdı. Texnika kifayət qədər sanballı idi. Qarabağlılardan fərqli olaraq, Azərbaycan döyüşlərə xüsusi təyinatlıları çıxarmışdı. Bütün bunların nəticəsində, sadəcə, iki kartof tarlası zəbt olunub. Azərbaycanın məqsədinin bu kiçik əraziləri tutmaq olduğunu düşünmək mümkün deyil".
Göründüyü kimi, erməni ekspertlərin fikirlərində maraqlı nüansa rast gəlinir. Hətta onlar tərəfindən belə iddia ortaya qoyulur ki, məlum uğurlu əməliyyat başqa ölkələrdən olan məsləhətçilər tərəfindən planlaşdırılıb. Bununla erməni politoloqlar nəyə işarə edirlər?
Hərbi ekspert Üzeyir Cəfərov qəzetimizə açıqlamasında bildirdi ki, belə məzmunlu fikirləri Ermənistanın növbəti sayıqlaması kimi qəbul etmək olar: "Görünür ki, ermənilər öz kölgələrindən qorxmağa başlayıb. Tam məsuliyyətilə deyə bilərəm ki, həmin döyüşlərin planlaşdırılmasında heç bir xarici hərbi mütəxəssisdən istifadə olunmayıb. Azərbaycanın buna heç ehtiyacı da yoxdur. Bizim yüksək təhsilli zabitlərimizə nə gəlib ki? Ermənistan bununla bağlı dəlillər ortaya qoya bilsə, mən üzr istəməyə hazıram. Belə iddialar eşidirik ki, aprel döyüşlərini güya türk və ya pakistanlı zabitlər planlaşdırıb. Heç bir əsası olmayan fikirlərdir. Məqsəd bəllidir. Ermənistan öz uğursuzluğu fonunda Azərbaycanın qazandığı zəfəri xarici faktora bağlamaq istəyir. Həmin adamlar nə dediyinin fərqinə varsa, bilərlər ki, deyilən ərazilərdə döyüş planını cızmaq üçün oraların spesifikasına yaxından bələd olmalısan. Buna da xarici mütəxəssislər bələd deyil. Uzun illərdir Azərbaycanın zabit və əsgərləri döyüş hazırlığı keçir. Biz hər an belə döyüşlərin olacağını gözləyirik. Əmin olun ki, bundan da böyük zəfərlərə imza atacağıq".
Məhəmmədəli QƏRİBLİ