ABŞ-da hakimiyyət dəyişikliyi reallaşana qədər baş verənlər Rusiya ilə bu ölkənin münasibətlərinin kəskinləşməkdə davam edəcəyini göstərir. Belə ki, NATO ABŞ-ın dəstəyi ilə Şərqi Avropada sərhədlərini gücləndirməkdə davam edir.
Əldə olunan razılaşmaya əsasən, ABŞ Polşada tank qoşunlarının sayını artırmağa başlayıb. "Atlantic Resolve" adlı əməliyyat çərçivəsində ABŞ-ın tank briqadası Polşada dislokasiya edilib. Polşaya gələn briqada Jaqan, Sbentoşuv, Skvejin və Boleslavç bölgələrində yerləşdirilir. Yanvarın sonuna qədər Polşadakı ABŞ hərbi birləşmələrinin sayı 3,5 minə qədər artırılacaq. Bu birləşmənin inventarına 400 özüyeriyən tırtıllı artilleriya qurğusu, 900 təkərli özüyeriyən, 87 tank, 18 haubitsa, 400 avtomobil daxil edilib.
Polşanın müdafiə naziri Antoniy Maçereviç də informasiyanı təsdiqləyərək, ölkəsində NATO-nun çoxmillətli qoşun birləşmələrinin dislokasiya olunduğunu deyib. Bundan başqa, mediada ABŞ-ın Litvaya da xüsusi hərbi birləşmələr göndərdiyinə dair xəbərlər yer alıb. Litvanın müdafiə naziri Astı Qaldikaytın sözlərinə görə, ABŞ-la müttəfiqlik ölkənin təhlükəsizliyi baxımından əhəmiyyətlidir. Rusiya isə, öz növbəsində, Qərb sərhədlərində NATO hərbi birləşmələrinin sayının artırılmasını milli təhlükəsizliyi üçün hədə hesab edib. Bu fonda Kreml hazırda Kalininqrad istiqamətində hərbi gücünü artırır. Bura çoxsaylı texnika, o cümlədən müxtəlif ballistik raketlər yerləşdirilir. Polşa və Litva arasında yerləşən Kalininqrad anklavına Rusiyanın artıq S-400 zenit-raket və nüvə imkanlarına malik "İsgəndər" sistemlərini yerləşdirdiyi məlumdur. Amma Kremlin cavab tədbirləri təkcə bununla məhdudlaşmır. Moskva son dövrlərdə bütün NATO ölkələrini, o cümlədən ABŞ-ı vura biləcək raket sistemlərini də intensiv inkişaf etdirir. Onlardan biri də "Yars" raket kompleksləridir.
Qitələrarası RS-24 "Yars" ballistik strateji raket kompleksi RT-2PM2 "Topol-M" komplekslərinin inkişafı çərçivəsində hazırlanıb. Ötən il ərzində strateji təyinatlı raket qoşunları bu tipli 73 raket əldə edib. 2016-cı ildə isə strateji təyinatlı raket qoşunlarının müxtəlif diviziyalarının beş raket alayına 19 "Yars" raketi verilib. Ümumiyyətlə, son illər Rusiya geniş əraziləri üzrə yerini dəyişən mobil komplekslərini özünün qitələrarası ballistik raketləri ilə əvəz edir. RS-24 "Yars" raketləri bu sinfin ən yeni nümayəndəsidir. Raket müstəqil manevr etmək qabiliyyətinə malik olan dörd hissədən ibarətdir və onların hər biri 150-dən 250 kilotona qədər nüvə yükü çatdıra bilir. "Yars" raketinin uçuş məsafəsi 11 min kilometr təşkil edir. Buna görə də raket Birləşmiş Ştatların əsas hissəsi, Alyaska və Havay adalarının istənilən nöqtəsini vurmağa qadirdir. Raketin radial səhvi 250 metr təşkil edir. Belə dəqiqlik "Yars" raketini ən təhlükəli zərbə silahı edir. ABŞ mediası "Yars" raketini Rusiya silahının 5 ən öldürücü nümunəsi sırasına daxil edib. Hərbi ekspertlər hesab edir ki, Rusiya və ABŞ arasında mümkün qarşıdurmada sözügedən raketlər ABŞ ərazisinə öldürücü zərbə vurmaq üçün Moskvanın əlindəki əsas silahlardan sayılır.
Bundan əlavə, Rusiya özünün yeni və ən böyük nüvə silahı sayılan "RS-28 Sarmat" adlı qitələrarası ballistik raketini hazırlayıb. "Sarmat" strateji raket kompleksi 15A18M ağır raketləri ilə təchiz olunan sovet istehsalı "Voyevoda" R-36M2 komplekslərini əvəz edir. "Voyevoda" R-36M2 kompleksləri Qərbdə "Satana"a adlanır. "Sarmat" isə "Voyevoda" R-36M2-dən daha güclüdür və Qərbdə onu "Satana 2" adlandırırlar. Moskvadakı silah mütəxəssisləri "Satana 2"nin müdafiə radarlarından yayınaraq 10 min kilometrə qədər məsafəni asanlıqla qət edə biləcəyini deyir. Bu o deməkdir ki, Rusiya bu nüvə silahı ilə Nyu-Yorku da vura bilər. Bu raket 4 tona yaxın nüvə başlığını 10 min kilometrə qədər məsafəyə daşıya bilir. Bəzi ekspertlər bu raketin NATO, xüsusən də ABŞ üçün "cəhənnəm silahı" ola biləcəyini bildirir. "Sarmat"ın tək ballistik trayektoriya üzrə yox, eyni zamanda atmosferin yuxarı qatlarında da hərəkət etmək imkanına malik olacağı bildirilir. Bu, gözlənilməz rakurslardan döyüş yükünü çatdırmağa imkan verir və raket əleyhinə müdafiənin təşkilini əhəmiyyətli dərəcədə çətinləşdirir. Sözügedən raketlər gələn ildən rus ordusunun ixtiyarına veriləcək. Amma NATO ilə qarşıdurmanın artması fonunda prosesin bu il ərzində də həyata keçməsi istisna olunmur. Bütün bunlar isə Qərb üçün əlavə təhdid yaradır.
Nahid SALAYEV