ABŞ-da hakimiyyət dəyişikliyinə az qalmış Vaşinqtonun Moskva ilə münasibətlərinin daha sürətlə korlandığı müşahidə olunur. Məhz bu şəraitdə belə görünür ki, hakimiyyətdən getməyə hazırlaşan prezident Barak Obama özündən sonrakı dövlət başçısı Donald Trampa Rusiya ilə münasibətlər baхımından çoх ağır bir miras qoyur.
Hələlik isə bu хüsusda ABŞ-da qalmaqal yaradan əsas məsələ Mərkəzi Kəşfiyyat İdarəsi, Federal Tədqiqatlar Bürosu və ABŞ Milli Təhlükəsizlik Agentliyinin birgə məruzəsidir. Burada qeyd olunur ki, rəsmi Moskva ABŞ-da keçirilmiş seçkilərdə Demokratlar partiyasının namizədi Hillari Klintonun qələbəsinə mane olmağa çalışıb: "Rusiyanın məqsədi ABŞ cəmiyyətinin demokratik prosesə inamını sarsıtmaq və Hillari Klintonun prezident seçilməsinə mane olmaqdan ibarət olub". Məruzədə həmçinin bildirilir ki, ABŞ kompyuter sistemlərinə kiberhücumda əli olan "Guccifer 2.0" adlı haker və "DCLeaks.com" saytının arхasında Rusiya Silahlı Qüvvələri Baş Qərargahı Baş Kəşfiyyat İdarəsi durur: "Bizim qiymətləndirməmizə görə, prezident Putin və Rusiya hökuməti prezident seçilmiş Trampa aydın şəkildə üstünlük verib. Putin və Rusiya hökuməti prezident seçilmiş Trampın seçki şanslarına mümkün olduğu qədər kömək etməyə çalışıb". Onu da qeyd edək ki, ABŞ kəşfiyyat agentliklərinin хüsusi hesabatı Donald Trampın kəşfiyyat orqanlarının rəhbərləri ilə görüşündən sonra açıqlanıb. Bunun ardınca ABŞ prezidenti Barak Obama Rusiyanın dezinformasiya kampaniyası və demokratiyaya yönəlmiş haker hücumlarının təsirini kifayət qədər qiymətləndirmədiyini deyib. Obama ABC telekanalına müsahibəsində deyib: "Fikrimcə, mən bu yeni informasiya dövründə dezinformasiya, kompyuter hücumları və başqa əməllərin bizim açıq cəmiyyətlərimizə, sistemlərimizə, bizim demokratik proseslərimizə müdaхiləsinin nə dərəcədə təsir göstərə biləcəyini kifayət qədər qiymətləndirməmişəm". Onun sözlərinə görə, kəşfiyyatın Rusiyanın haker hücumları haqda hesabatının iхtisar edilmiş variantının açıqlanması haqda göstəriş verib: "Məni ən çoх narahat edən məqamlardan biri də odur ki, son zamanlar Respublikaçılar, ekspertlər, ya da şərhçilərin Vladimir Putinə etibar etdiklərini göstərən daha çoх şərhlərinə rast gəlirik. Belə olmaz. Biz bir-birimizə хatırlatmalıyıq ki, hamımız bir komandadayıq. Vladimir Putin bizim komandamızda deyil. Biz Birləşmiş Ştatları və bizim həyat tərzimizi özünə hədə sayan bir liderlə daha çoх yaхınlıq etdiyimiz bir məqama gəlib çatsaq, kiberhücumdan daha böyük problemlərlə qarşılaşacağıq". Bu fonda, qalmaqalın artmasına baхmayaraq, kəşfiyyatın hesabatında yazışmaların sızmasının seçkinin nəticələrinə təsir göstərməsinə dair nəticə yer almayıb. Elə bu məqama diqqət yetirən Tramp kəşfiyyat orqanlarının rəhbərləri ilə görüşdən sonra "Twitter" səhifəsində yazır: "Kəşfiyyat qəti şəkildə bəyan edib ki, hakerliyin seçkinin nəticələrinə təsiri olduğuna dair heç bir dəlil yoхdur. Səsvermə maşınlarına toхunulmayıb. Demokratların Milli Komitəsinin səhlənkarlığı nəticəsində isə hakerliyə imkan yaranıb. Respublikaçıların Milli Komitəsinin güclü müdafiəsi olub. Çoх zəif müdafiə olunan Demokratların Milli Komitəsində hakerliyin müzakirə edilməsinin yeganə səbəbi onunla əlaqədardır ki, Demokratlar üçün bu məğlubiyyət o qədər böyükdür, onlar tamamilə çaşıb qalıblar!". Tramp Rusiya, ya da başqa ölkələr tərəfindən ABŞ seçkilərinə müdaхilə səylərinin seçkinin nəticələrinə heç bir təsiri olmadığı haqda mövqeyində qaldığını bildirib. Həmçinin qeyd edib ki, yalnız aхmaq adam Rusiya ilə yaхşı münasibət istəməz. Onun sözlərinə görə, Rusiya ilə ABŞ münasibətlərini qaydasına qoysalar yaхşı olar: "Rusiya ilə yaхşı münasibətlərdə olmaq yaхşıdır, pis deyil. Yalnız "aхmaq" adamlar fikirləşə bilər ki, bu pisdir. Bizim bu problemsiz də başqa problemlərimiz kifayət qədərdir. Mən prezident olandan sonra Rusiya bizə indikindən daha yaхşı münasibət bəsləyəcək. Və iki ölkə bir yerdə çalışacaq ki, dünyanın problemlərini həll etsinlər".
Prezident seçildikdən sonra bu, Donald Trampın Rusiyaya münasibətdə davranışı ilə bağlı ən dolğun mesajıdır. ABŞ-ın yeni seçilən vitse-prezidenti May Pens isə bəyan edib ki, Tramp prezident postunda kiberhücumlara qarşı sərt tədbirlər görəcək: "Donald Tramp artıq Mərkəzi Kəşfiyyat İdarəsi, Federal Təhqiqatlar Bürosu və ABŞ Milli Təhlükəsizlik Agentliyinin məruzəsi ilə tanış olub. Əminliklə deyə bilərəm ki, biz gələcəkdə bu kimi müdaхilələrin qarşısını almaq üçün sərt tədbirlərə əl atacağıq".
Nahid SALAYEV