Günel Fərhadqızı: "Hazırda regional təcrid vəziyyətinə düşən Ermənistanda şərait getdikcə daha gərgin mərhələyə qədəm qoyur"
"Çiçəklənən Ermənistan" Partiyasının sədri Naira Zoqrabyan etiraf edib ki, Ermənistan iqtisadiyyatı çox ağır vəziyyətdədir. Deputatın sözlərinə görə, Ermənistanda inkişafın qeydə alındığı bir sahənin adını belə çəkmək çətindir.
"Ola bilsin, çox ağır vəziyyətdə olan ölkə iqtisadiyyatında irəliləyiş əldə etmək üçün lazımi qədər vaxt keçməyib. Lakin indiyə qədər hansısa nikbin ipucu olmalı idi. Təəssüflər olsun ki, ictimai mühitdə nikbinlik yoxdur" - Zoqrabyan vurğulayıb.
Ermənistanda acınacaqlı vəziyyətin olması ilə bağlı bizim ekspertlər nə düşünür?
İqtisadçı Günel Fərhadqızı qəzetimizə açıqlamasında bildirdi ki, Ermənistan iqtisadiyyatının acınacaqlı vəziyyətdə olması, əhalinin maddi rifah halının gündən-günə ağırlaşması beynəlxalq qurumların hesabatlarında da göstərilir: "Məsələn, Dünya Bankının (DB) hesabatına görə, Ermənistan iqtisadiyyatı ilə MDB regionunda və dünyada ən aşağı yerlərdən birini tutur. Müqayisə üçün qeyd edək ki, Azərbaycan iqtisadiyyatı Ermənistan iqtisadiyyatını dəfələrlə üstələyir.
Ermənistanın üzləşdiyi sosial-iqtisadi böhranın dərinləşməsi fonunda ölkəni tərk edənlərin sayı da durmadan artır. Bu isə ölkədə demoqrafik duruma mənfi təsir göstərir. Real demoqrafik durumun təhlili vəziyyətin sürətlə pisləşməsindən xəbər verir. Hətta burada uşaqların doğumu ilə bağlı problemlər də şəraitə öz mənfi təsirini göstərir.
Bütün bunlar Ermənistanda sosial-iqtisadi böhranın ildən-ilə dərinləşdiyindən xəbər verir.
Həyata keçirdiyi işğalçılıq siyasəti üzündən hazırda regional təcrid vəziyyətinə düşən Ermənistanda şərait getdikcə daha gərgin mərhələyə qədəm qoyur. Xüsusən də sürətlə davam edən bahalaşma insanların sosial durumunun daha acınacaqlı hal almasına rəvac verir. Bu fonda qabarıq müşahidə edilən odur ki, iqtisadiyyatı ildən-ilə tənəzzülə uğrayan Ermənistanda inflyasiya sürətlə dərinləşməkdədir. Məsələn, bu ölkədə konkret ərzaq məhsullarının qiyməti son bir ildə 10 faiz, qeyri-ərzaq məhsullarının qiyməti isə 5,1 faiz bahalaşıb. Həmçinin əhaliyə göstərilən xidmətlərin qiymətlərində də bahalaşma qeydə alınıb. Ermənilər vəziyyətdən çıxış yolunu isə, qeyd etdiyimiz kimi, müxtəlif ölkələrə qaçmaqda görürlər.
Ermənistandan baş götürüb qaçan ermənilərin əksəriyyəti dözülməz şəraitdə yaşayır və onlar xarici ölkələrdə ən ucuz işçi qüvvəsi hesab olunur".
Məhəmmədəli QƏRİBLİ