Aqşin Əliyev: "Buna yetişən proses də demək olar"
Ermənistanda həm iqtisadi, həm də siyasi vəziyyət stabil deyil. Ölkəni iqtisadi fəlakətin bürüməsini Ermənistanın tanınmış siyasətçiləri də açıq etiraf edir. Buna səbəb kimi ölkənin düzgün siyasi kursla idarə olunmaması göstərilir. İddia edilir ki, Ermənistanı bu vəziyyətə onu idarə edən rejim salıb. Fakitiki olaraq, başqa ölkənin ərazisini işğal edən ölkə özünü bütün regional layihələrdən təcrid durumu ilə üz-üzə qoyub.
Bu səbəbdən də Sarkisyana müxalif olan siyasi qüvvələr ondan Dağlıq Qarabağla bağlı sülh mövqeyinə getməyi tələb edir. Ancaq mövcud Ermənistan rejimi bütün tənələrdən yaxa qurtarmağın yolunu cəbhədə süni gərginlik yaratmaqda görür. Təsadüfi deyil ki, Azərbaycan Xarici İşlər Nazirliyi bir neçə gün bundan əvvəl məhz belə məzmunlu bir bəyanat verdi. Həmin bəyanatda qeyd edilirdi ki, Ermənistanın daxilində baş qaldıran etirazları sakitləşdirmək üçün Sarkisyan rejimi müəyyən təxribatlara əl atır. Belə manevrlərlə Sarkisyan hakimiyyəti etirazlardan yayınmağı bacaracaqmı?
Ekspert Aqşin Əliyev qəzetimizə açıqlamasında bildirdi ki, artıq Ermənistanda fərqli bir vəziyyət hökm sürür: "Buna yetişən proses də demək olar. Xalq dərk edib ki, mövcud rejim onları uçuruma aparır. Bu səbəbdən heç nədən çəkinmədən həqiqətləri Sarkisyandan tələb edirlər. Görün nə qədər erməni fəalı Azərbaycanın haqq mövqeyini dəstəkləyib. Onların əksəriyyəti bunu Ermənistanda ola-ola edir. Ermənistanın tanınmış siyasətçiləri Dağlıq Qarabağla bağlı, demək olar ki, Azərbaycanın mövqeyinə haqq qazandırır. Artıq prosesə xaricdə yaşayan erməni diasporunun nümayəndələri də qoşulub. Düşünürəm ki, Sarkisyanın, nə qədər yayındırıcı jestlərə əl atmağa çalışsa da, bu etiraz dalğasını saxlamağa gücü yetməyəcək. Çünki proses artıq siyasi etiraz formasına qədəm qoyub və bu platformanı eks-prezident Ter-Petrosyan belə dəstəkləyir. Yəqin ki, prosesin ilkin mərhələsi Sarkisyanın hakimiyyətdən uzaqlaşdırılması ilə başlayacaq. Sonra isə danışıqlar prosesində bir qədər konstruktivlik müşahidə ediləcək".
Məhəmmədəli QƏRİBLİ