"Prezidentin bəyanatı bir daha göstərdi ki, Türkiyə Naxçıvanın təhlükəsizliyi üzrə öz öhdəliklərindən imtina etmək niyyətində deyil"
Türkiyə prezidenti Rəcəb Tayyib Ərdoğan bəyan edib ki, Türkiyənin təhlükəsizliyi Qaziantep, Hatay, Qars və Artvindən yox, İdlibdən, Hələbdən, Naxçıvandan, Batumidən və Balkanlardan başlayır.
Ölkədə törədilən terror aktlarından danışan dövlət başçısı heç kimin Türkiyənin birliyini və bütövlüyünü sarsıda bilməyəcəyini deyib: "Terrorçular və onlara dəstək olanlar məqsədlərinə çata bilməyəcək. Türkiyəni diz çökdürməyə çalışırlar. Amma türk xalqının qəhrəmancasına müqaviməti buna ən yaxşı cavabdır".
Ərdoğanın bu açıqlamasında maraqlı məqamlar var. Xüsusilə də bu xüsusda Naxçıvanın adının çəkilməsi hansı mənanı ifadə edə bilər?
Millət vəkili Zahid Orucun sözlərinə görə, Qars müqaviləsinin şərtlərinə əsasən, Naxçıvanın təhlükəsizliyinə Türkiyə tərəfindən də zəmanət verilib, amma Ermənistan onun təhlükəsizliyinə təhdidlərini davam etdirir: "Buna görə Naxçıvan Muxtar Respublikası öz müdafiə qabiliyyətini daim möhkəmlətməyə ehtiyac duyur. Ərdoğan bununla Türkiyənin Naxçıvanın təhlükəsizliyinə cavabdehlik daşıdığını xatırladıb. Prezidentin bəyanatı bir daha göstərdi ki, Türkiyə Naxçıvanın təhlükəsizliyi üzrə öz öhdəliklərindən imtina etmək niyyətində deyil. Bu onun təhlükəsizliyini dəfələrlə hədələyən Ermənistana yaxşı cavabdır.
Ərdoğan Naxçıvanla yanaşı, Qarabağı da qeyd etməli idi. Ermənistan və Rusiya arasında müxtəlif növ, o cümlədən hərbi əməkdaşlıq haqqında razılaşmalar var. Eyni razılaşma Bakı və Ankara arasında da mövcuddur. Ona görə Azərbaycan və Türkiyə arasında hərbi əməkdaşlıq haqqında razılaşmaya uyğun olaraq, Naxçıvanın təhlükəsizliyi kontekstində türk hakimiyyəti Qarabağı da yada salmalı idi. Bütün hallarda, bu yaxşı bəyanatdır və Ermənistana Naxçıvanla sərhəddə təxribatlar törətməməsi üçün bir xəbərdarlıqdır".
Məhəmmədəli QƏRİBLİ