"Artıq Ermənistanda xalqın başladığı sülh çağırışlarının qarşısını almaq mümkün olmayacaq"
Azərbaycan Xarici İşlər Nazirliyinin mətbuat xidmətinin rəhbəri Hikmət Hacıyev Ermənistanın ictimai-siyasi və diaspor dairələrində münaqişənin həlli ilə əlaqədar səsləndirilən bəyanatlar, Ermənistan rəhbərliyi və xarici işlər nazirinin açıqlamalarına münasibət bildirərkən bunları deyib:
"Ermənistanın siyasi-ictimai və diaspor dairələrində bir sıra sağlam qüvvələrin Ermənistan-Azərbaycan, Dağlıq Qarabağ münaqişəsinin tezliklə sülh yolu ilə həll edilməsinə yönəlik çağırışları müsbət addımlar olsa da, Ermənistanın siyasi-hərbi rəhbərliyi yenə də hər bir vəchlə danışıqlar prosesinin irəliləməsinin qarşısını almağa çalışır".
H.Hacıyev bildirib ki, Ermənistan rəhbərliyinin məqsədi münaqişənin həlli və regionda davamlı sülhün təmin edilməsi deyil, Ermənistanın danışıqlarda iştirakı yalnız imitasiya məqsədi daşıyır: "Ermənistan rəhbərliyi Azərbaycana qarşı təcavüz və işğala əsaslanan mövcud status-kvonu saxlamağa xidmət edən siyasət yürüdür. Bütün beynəlxalq ictimaiyyət, o cümlədən ATƏT-in Minsk Qrupunun həmsədrləri Ermənistan qoşunlarının Azərbaycanın işğal olunmuş ərazilərindən çıxarılmasını tələb etsələr də, Ermənistan buna məhəl qoymur və münaqişənin həllinin əsasını təşkil edən bu kimi köklü məsələdən yayınmaq üçün yeni-yeni təxribatlara əl atır".
Xarici İşlər Nazirliyi rəsmisinin bu bəyanatını necə xarakterizə etmək olar?
Politoloq Qabil Hüseynli qəzetimizə açıqlamasında bildirdi ki, son günlər biz Ermənistanın daxili ictimai rəyində fərqli tendensiyanın baş qaldırdığını görürük: "Bir sıra ictimai fəallar açıq şəkildə bəyan edir ki, Ermənistanın tutduğu mövqe doğru deyil. Onların arasında hətta elələri var ki, Dağlıq Qarabağın Azərbaycana məxsus olduğunu, Ermənistanın çabalarının fayda verməyəcəyini bəyan edir. Ən maraqlısı isə budur ki, belə bəyanatların çoxu Ermənistanın və Dağlıq Qarabağın daxilində olan şəxslər tərəfindən səsləndirilir. Artıq heç bir repressiya, təzyiq onları qorxutmur. Hətta Ermənistanın aktiv siyasətçilərindən olan, eks-prezident Levon Ter-Petrosyan konkret konsepsiya ilə çıxış edərək, Ermənistanın sülhə getməli olduğunun vacibliyini vurğulayıb. Bütün bu vəziyyət Ermənistanın hərbi xuntadan ibarət olan rəhbərliyini ciddi narahat etməyə başlayıb. Bu səbəbdən də onlar cəbhə xəttində təxribatlar törətməklə, fikri əsas mövzudan yayındırmaq istəyirlər. Xarici İşlər Nazirliyi çox doğru olaraq bu məqamı xüsusilə vurğulayıb. Bəllidir ki, Ermənistan tərəfi bütün danışıqlar prosesini cəbhədə törətdiyi provokasiya xarakterli əməllərilə pozub. Artıq Ermənistanda xalqın başladığı sülh çağırışlarının qarşısını almaq mümkün olmayacaq. Çünki onlar bu şəraitdə yaşamaqdan bezib".
Məhəmmədəli QƏRİBLİ