"Ter-Petrosyan mərhələli həll variantını müdafiə edir"
Ermənistanın ilk prezidenti, "Ermənistan Milli Konqresi" partiyasının sədri Levon Ter-Petrosyan bəyan edib ki, Dağlıq Qarabağ münaqişəsinin həllinin uzadılması Ermənistanı daha da zəiflədəcək.
Onun sözlərinə görə, 2007-ci ildən etibarən Ermənistan tərəflərə təqdim olunan planla bağlı danışıqlar aparır: "Belə çıxır ki, bizi tənqid edənlər əslində öz planlarını tənqid edirlər".
Ter-Petrosyan danışıqlar masasında olan konkret planla bağlı fikirlərini ifadə edib: "İlk mərhələdə Azərbaycana 5 rayon qaytarılacaq. Kəlbəcər və Laçın istisna olmaqla. İkinci mərhələdə qoşunların təmas xəttində sülhməramlılar yerləşdiriləcək. Üçüncü mərhələdə Dağlıq Qarabağın statusunun tanınması məsələsinə baxılacaq".
Qeyd edək ki, eks-prezident bundan əvvəl Dağlıq Qarabağ münaqişəsinin həllində Ermənistan hakimiyyətinin tutduğu mövqeyi sərt tənqid edib. Maraqlıdır ki, Ter-Petrosyanın bütün bu fikirlərinə hakim komanda olduqca sərt reaksiya verir. Sarkisyanın Ter-Petrosyanla məhz bu məsələdə razılaşmaması nə ilə bağlıdır?
Millət vəkili Elman Nəsirovun sözlərinə görə, Ermənistan rəhbərliyinin Dağlıq Qarabağ münaqişəsi ilə bağlı mövqeyini indiki kimi saxlaması çox müşkül məsələyə çevrilib: "Ermənistanın güzəştsiz siyasət yürütməsinin limitinin tükəndiyini həm hakimiyyət, həm müxalifət, həm də vətəndaşlar daha çox dərk etməyə başlayıb. Xüsusilə Sülh Platforması elan edildikdən sonra onun sıralarının erməni ziyalıları hesabına genişlənməsi rəsmi İrəvanı qorxuya salmağa başlayıb. Bu gün Ermənistanın ilk prezidenti Levon Ter-Petrosyan ölkə rəhbərliyini Dağlıq Qarabağ münaqişəsinin həllində səhv siyasətinə görə kəskin şəkildə tənqid edir. Eyni zamanda Ter-Petrosyan son çıxışlarının birində hətta Azərbaycan Prezidenti İlham Əliyev haqqında müsbət fikirlər səsləndirib. Bildirib ki, ölkə başçısı ötən müddət ərzində öz dövlətinin möhkəmlənməsi istiqamətində çox qətiyyətli addımlar atıb. Belə ki, bu addımlar Ermənistan rəhbərliyi tərəfindən atılmır. Belə olan təqdirdə, həm sabiq prezident Levon Ter-Petrosyanın, həm də digər siyasətçilərin dilindən belə fikirlər səslənməkdədir ki, nəhayət, münaqişəni kompromislər əsasında həll etməyin zamanı yetişib.
Xüsusilə Ter-Petrosyan mərhələli həll variantını müdafiə edir. Əslində o, hələ 1998-ci ildə qeyd etmişdi ki, münaqişəni mərhələli həll variantı ilə nizamlamaq lazımdır və Azərbaycan indi buna razılıq verir, biz bu şansdan istifadə etməsək, Azərbaycan gələcəkdə indiki şərtlərdən belə imtina edə bilər. Çünki Azərbaycanın mövqeləri gücləndikcə, bunun belə olacağı şübhəsizdir. Yəni o hələ 1998-ci ildə bu barədə xəbərdarlıq etmişdi. Ter-Petrosyan indi faktiki olaraq həmin vəziyyətin getdikcə yaxınlaşdığının fərqindədir. Bu səbəbdən o, mərhələli həll variantını qətiyyətlə müdafiə edir.
S.Sarkisyan və komandası sadəcə varlanmaq üçün hakimiyyətini qoruyub saxlayır. Onları qətiyyən xalqın mənafeyi, sosial durumu narahat etmir. Münaqişədən öz cinayətkar əməllərini ört-basdır etmək üçün istifadə edirlər. Bu gün onları narahat edən məqam odur ki, artıq münaqişənin həlli ilə bağlı prosesdə həmsədr dövlətlərin mövqeyində dəyişiklik tendensiyası artıb. Siyasi qüvvələr arasındakı fikir ayrılığı da bu məqamlara görədir".
Məhəmmədəli QƏRİBLİ