"Ölkələr ortaq geosiyasi mövqeyə malikdir, eyni fürsətlər və təhdidlərlə qarşılaşır"
Xarici işlər naziri Elmar Məmmədyarov İranın rabitə və informasiya texnologiyaları naziri Mahmud Vaezinin başçılıq etdiyi nümayəndə heyətini qəbul edib.
Nazirliyin mətbuat xidmətindən verilən məlumata görə, görüşdə Azərbaycanla İran arasında əməkdaşlığın bütün sahələrdə uğurla inkişaf etdirilməsindən, o cümlədən ölkələrimiz arasında ticarət dövriyyəsinin və sərmayə qoyuluşunun artımından, habelə kənd təsərrüfatı, nəqliyyat, turizm, sənaye və digər istiqamətlərdə uğurlu inkişafdan məmnunluq ifadə olunub.
M.Vaezi Dövlət Komissiyasının fəaliyyəti və əldə olunan nailiyyətlər barədə məlumat verib, İranın bütün sahələrdə Azərbaycanla əməkdaşlığı dərinləşdirmək niyyətində olduğunu vurğulayıb.
E.Məmmədyarov iki ölkənin dövlət başçılarının iradəsinə, müəyyən etdikləri strateji xəttə və xalqlarımızın ənənəvi dostluğuna uyğun olaraq, Azərbaycanın da İranla bütün sahələrdə əməkdaşlığı daha da inkişaf etdirməkdə maraqlı olduğunu bildirib və Dövlət Komissiyasının işini, xüsusilə M.Vaezinin fəaliyyətini yüksək qiymətləndirib.
Görüşdə "Şimal-Cənub" nəqliyyat dəhlizinin tikintisi istiqamətində hazırda görülən işlər, layihənin əhəmiyyətindən söz açılıb və bu layihənin regionlararası əməkdaşlığın inkişafına mühüm töhfə verəcəyinə əminlik ifadə edilib. Tərəflər bu ilin avqustunda Bakıda keçirilmiş Azərbaycan-İran-Rusiya dövlət başçılarının üçtərəfli görüşünün əhəmiyyətini qeyd edərək, bu formatda İranda keçiriləcək növbəti görüşü müzakirə ediblər.
Regional məsələləri müzakirə edən nazirlər terrorizmə qarşı birgə mübarizə və informasiya mübadiləsinin vacibliyini vurğulayıb və qarşılıqlı maraq doğuran digər məsələlər ətrafında fikir mübadiləsi aparıblar.
Göründüyü kimi, yaxın vaxtlarda üç ölkə rəhbəri arasında zirvə görüşünün keçirilməsi planlaşdırılır. Nəzərdə tutulan zirvədə hansı məsələlər müzakirə oluna bilər?
Ekspert Aqşin Əliyevin sözlərinə görə, bu formatda təmaslar əvvəl də olub: "Belə bir zirvənin keçirilməsi Bakı görüşündə razılaşdırılıb. Bu format "Şimal-Cənub" nəqliyyat dəhlizi, energetika, neft, qaz yataqlarının işlənməsi ətrafında müzakirələrin aparılması baxımından da vacibdir. Zirvə gələcəkdə də qarşılıqlı faydalı xarakter daşıyacaq və ölkələrimizin maraqlarına xidmət edir. Bu formatda əməkdaşlıq Xəzər regionunun dinamik inkişafına töhfə verəcək. Bu kimi üçtərəfli format, İran, Azərbaycan və Rusiya arasında bu münasibətlər fikir mübadiləsinə, ortaq mənafelərin meydana çıxmasına imkan yaradır. Belə bir formatın yaranması regionun hazırkı durumunda üç ölkə arasında əlaqələrin genişləndirilməsi və dərinləşdirilməsi üçün son dərəcə əhəmiyyətlidir. Ölkələr ortaq geosiyasi mövqeyə malikdir, eyni fürsətlər və təhdidlərlə qarşılaşır. Bu təhdidlər müştərək anlaşmanı daha da vacib edir. Hesab edirəm ki, faydalı görüş olacaq".
Məhəmmədəli QƏRİBLİ