"Həm iqtisadi, həm də siyasi nöqteyi-nəzərdən uğurlu sazişdir"
"Azərbaycan və İran arasında imzalanmış "Xudafərin" və "Qız qalası" Sazişi bu yaxınlarda İran parlamenti tərəfindən ratifikasiya edilib. Sazişin siyasi və iqtisadi əhəmiyyəti böyükdür". Bu barədə dekabrın 27-də Bakıda keçirilmiş Azərbaycanla İran arasında iqtisadi, ticarət və humanitar sahələrdə əməkdaşlıq üzrə Dövlət Komissiyasının 11-ci iclasında iqtisadiyyat naziri Şahin Mustafayev bildirib.
Qeyd edək ki, "Azərbaycan Respublikası Hökuməti ilə İran İslam Respublikası Hökuməti arasında Araz çayı üzərində "Xudafərin" və "Qız qalası" hidroqovşaqlarının və su elektrik stansiyalarının tikintisinin davam etdirilməsi, istismarı, energetika və su ehtiyatlarından istifadə sahəsində əməkdaşlıq haqqında" saziş 2016-cı il fevralın 23-də imzalanıb.
Ratifikasiya olunan sazişdə nəzərdə tutulan ərazilər Ermənistanın işğal altında saxladığı zonalardır. Belə olan təqdirdə, bu sazişin nə kimi strateji əhəmiyyəti olur?
Ekspert Elşən Mustafayev qəzetimizə açıqlamasında bildirdi ki, Azərbaycanın xarici siyasət kursunda yaxın qonşularla münasibətlərin normal olmasına xüsusi önəm verilir: "İranla münasibətlərimiz ideal səviyyədə olmasa da, normal saymaq olar. Çünki bir çox sahələr üzrə bizim birgə və yaxın münasibətlərimiz mövcuddur. Araz çayı üzərində "Xudafərin" və "Qız qalası" hidroqovşaqlarının və su elektrik stansiyalarının tikintisinin davam etdirilməsi ilə bağlı sazişin İran parlamenti tərəfindən ratifikasiya edilməsinin bizim üçün strateji əhəmiyyəti də var. Düzdür, bu bir iqtisadi layihədir. Araz çayı üzərində tikiləcək su elektrik stansiyasının imkanlarından hər iki ölkə yararlanacaq. Həmin ərazilər Azərbaycanın ərazi vahidinə aid olsa da, hazırda Ermənistanın işğalı altındadır. Belə bir razılaşmanın əldə olunması həm də o anlama gəlir ki, İran həmin ərazilərdə Azərbaycanın iştirakını qanuni olaraq tanıyır. Bu da Ermənistanın həmin torpaqlarda müvəqqəti olduğunun qonşumuz tərəfindən qəbul edilməsinə bir işarədir. Həm iqtisadi, həm də siyasi nöqteyi-nəzərdən uğurlu sazişdir. Son dövrlər İranda mütərəqqi addımların atıldığını görürük. İran parlamentində "Türk fraksiyası"nın yaradılmasını buna misal göstərə bilərik".
Məhəmmədəli QƏRİBLİ