Kollektiv Təhlükəsizlik Müqaviləsi Təşkilatına (KTMT) üzv ölkələrin Dağlıq Qarabağ münaqişəsi ilə bağlı tutduğu mövqe Ermənistanda hələ də böyük narazılıq yaradır. Çünki təşkilata üzv ölkələr, Ermənistan istisna olmaqla, Azərbaycanın mövqeyini açıq şəkildə müdafiə edir.
İrəvanın müttəfiqlik əlaqələrindən dəm vurması da hansısa yeniliyə səbəb olmur. Belə bir vaxtda Rusiyanın Sankt-Peterburq şəhərində keçirilən Kollektiv Təhlükəsizlik Müqaviləsi Təşkilatı (KTMT) Şurasının iclasında Ermənistana qurum tərəfindən növbəti zərbə vurulub. Belə ki, təşkilatın yeni baş katibi seçilməyib. Buna səbəb iclasda Belarus nümayəndə heyətinin iştirak etməməsi olub.
KTMT baş katibi Nikolay Bordyuja bildirib ki, Şuranın sessiyasının iclasında Belarus nümayəndə heyətinin olmaması səbəbilə yeni baş katib təyinatı məsələsinin təxirə salınmasına qərar verilib. Onun sözlərinə görə, Rusiya, Ermənistan, Qırğızıstan, Qazaxıstan və Tacikistan liderləri bu məsələnin 2017-ci ilin aprel ayına qədər təxirə salınması barədə razılığa gəliblər. Qeyd edək ki, KTMT-nin iclasında təşkilata baş katibin seçilməsi məsələsi də müzakirə olunmalı idi. Hazırkı baş katib Nikolay Bordyuja 2003-cü ildən bu postdadır. 2005-ci ilin dekabrında keçirilən iclasda onun səlahiyyətlərinin 2017-ci ilin 1 yanvar tarixinə qədər uzadılması haqqında qərar verilmişdi. Hazırda növbəti ilin ilk günündən onun səlahiyyətləri başa çatır. Lakin son iclasda baş verənlərdən sonra Bordyujanın səlahiyyətləri yenidən uzadılıb. Halbuki, onun əvəzinə Sankt-Peterburqda erməni hərbçisi qurumun baş katibi seçilməli idi. Lakin Belarus nümayəndə heyətinin olmaması buna imkan verməyib.
Ümumiyyətlə, Ermənistan Belarusun mövqeyindən çox narazıdır. Belarus prezidenti Aleksandr Lukaşenkonun ötən ay Bakıda olması hələ də Ermənistanda qəzəblə xatırlanır. "Armenainreport" saytı yazır: "Aleksandr Lukaşenko noyabrın 28-29-u tarixlərində Bakıda səfərdə oldu. Bu səfər Belarus-Azərbaycan münasibətləri fonunda olduqca əhəmiyyətli idi. Lukaşenkonun Bakı səfəri onu göstərdi ki, Belarus kimin yanındadır". Sayt qeyd edir ki, əslində, Minsk Bakının yanında olduğunu hələ aprel hadisələrində göstərmişdi: "Bu dəyişməz olaraq qalacaq və gələcəkdə də belə olacaq. Artıq Belarus da Ermənistanın digər müttəfiqləri kimi Azərbaycana silah satmaq qərarına gəlib. Əslində, KTMT-də və Avrasiya İqtisadi İttifaqında Putindən Lukaşenkoya qədər hər kəs Bakının yanında olduğunu çoxdan sübut edib".
Qeyd edək ki, aprel müharibəsi zamanı Aleksandr Lukaşenko İlham Əliyevə zəng edərək, Azərbaycan ordusunun ərazi bütövlüyünün bərpası üçün atdığı bütün addımları dəstəklədiyini ifadə etmişdi. Bu zəngdən sonra Belarus XİN bəyanat yayaraq, Lukaşenkonun dediklərini bir daha qeyd etdi və tərəfləri atəşi dayandırmağa çağırdı. Həmin vaxt Belarusun Ermənistandakı səfiri İqor Nazaryuk Ermənistan XİN-ə çağırılmışdı. "Yerkir" qəzeti isə yazır ki, Belarus Azərbaycana silah satmasının Ermənistanda narazılıq yaradacağını bilə-bilə bunu edir: "Çünki Lukaşenko üçün Sarkisyanın nə deyəcəyi əhəmiyyətli deyil. Ümumiyyətlə, onun üçün Ermənistanın KTMT-də və Avrasiya İqtisadi İttifaqında olması maraqsızdır".
Rusiyalı politoloq Aleksandr Karavayev isə daha maraqlı məqamlara diqqət çəkir: "Kollektiv Təhlükəsizlik Müqaviləsi Təşkilatının yeni baş katibi Ermənistanın nümayəndəsi ola bilər. Ermənistan öz nümayəndəsinin KTMT-yə rəhbərlik etməsini istəyirsə, o zaman Dağlıq Qarabağla bağlı söz verməlidir. Ermənistanın Qarabağ məsələsində mövqelərini gücləndirmək üçün KTMT-dən təzyiq meydançası kimi istifadə etməyə başlamayacağı müəyyən edilərsə, təşkilatın baş katibinin erməni olması müzakirə edilə bilər". Lakin politoloq hesab edir ki, bu bir qədər problemi məsələdir: "Çünki Ermənistanın KTMT-dən münaqişədə təzyiq meydançası kimi istifadə etmək niyyəti var. Ehtimal ki, baş katib Ermənistan nümayəndəsi olacaqsa, o, KTMT-də daim Dağlıq Qarabağ məsələsini qaldıracaq. Belə təhlükə var". Erməni politoloq Levon Şirinyan isə deyir ki, Rusiya Qarabağ kartını oynamaqda davam edir: "Moskva Ermənistanın daxilində baş verən hadisələrdən narahatdır. Çünki baş verənlər Rusiyanın Ermənistanı tamamilə itirməsi ilə nəticələnə bilər. Ehtimal ki, Kreml yeni ssenari hazırlayıb və bu ssenaridə Ermənistanda bəzi dəyişikliklər etmək yer alır. Qarabağ kartı bu prosesdə mühümdür. Xüsusilə münaqişənin Rusiya planına uyğun, yəni ərazilərin qaytarılması ilə həlli əsas götürülür. Bunun reallaşması üçün, lazım olsa, müharibə də başlaya bilər". Bu durumda Rusiyaya qarşı alternativ olaraq Qərbə üz tutmaq təklifləri səslənsə də, İrəvan rəhbərliyinin buna getməyəcəyi, daha doğrusu, bunu bacarmayacağı da məlumdur. Digər tərəfdən, Qərbin də Ermənistana münasibəti birmənalı deyil.
Nahid SALAYEV